بلوچستان ءَ جتاجتائیں وئیلانی آسر ءَ ھپت بیران ءُ شانزدہ ٹپی بیتگ اَنت

بلوچستان ءِ جتاجتائیں دمگاں تیرگواری ءُ دگ ءِ وئیلانی آسر ءَ زالبول ءُ چُکاں ھوار ھپت مردم بیران ءُ شانزدہ ٹپی بیتگ اَنت-

گیشیں ھالانی رِد ءَ ھُزدار ءِ دمگ وڈھ کلی میاندر ءَ نوراللہ لھڑی ءِ لوگ سر ءَ شپ ءِ ساھت دو ءِ نزیک ءَ سلاہ بندیں مردماں تیرگواری کتگ-

تیرگواری ءِ آسر ءَ آئی ءِ لوگ بانُک ءُ کسانیں چُک بیران بیتگ اَنت وھدے کہ نوراللہ لھڑی جند ٹپی بیتگ-

لیویز ءَ لاش پہ گیشیں چار ءُ ٹپاس ءَ پد کھول ءِ دست ءَ داتگ اَنت ءُ گیشیں پٹ پول بندات کتگ-

ھمے وڑ جھل مگسی ءِ ھیڈکوارٹر گنداواہ مھلہ بپڑ ءَ گوستگیں شپ ءَ ناشناسیں سلاہ بندیں مردم لوگ تہ ءَ پترتگ ءُ تیرگواری ءِ کتگ ءُ عندالکریم لاشاری ءُ آئی ءِ لوگ بانُک بیران بیتگ اَنت – وھدے کہ تیرگواری ءَ چہ آئی ءِ سئیں چُک فرمان ، سلیمان ءُ لاشار خان ٹپی بیتگ اَنت-

وئیل ءَ پد زوت میاربار تتکگ اَنت-

دومی نیمگ ءَ ڈیرہ مراد جمالی ءِ دمگ خان کوٹ ءَ لوگی جیڑھے ءِ سر ءَ چُک ءَ تیرگواری کتگ وتی مات کُشتگ ءُ برات سک ٹپی بیتگ-

پولیس ءَ میاربار ءِ دزگیر کنگ ءِ ھاتر ءَ ٹولی یے جوڑ کتگ-

یکشمبے ءِ روچ ءَ ساکران اٹک موڑ نزیک ءَ تُرند رؤکیں ڈمپر ءَ ڈرائیور نہ مرّ اِنتگ ءُ چپی بیتگ چریشی ءِ آسر ءَ چلّ سالی ئیں نقیب ء سمیع اللہ نامیں مردمے بیران ءُ دو مردم احسان ء اعظم ءُ عبیداللہ ء فیض اللہ ٹپی بیتگ اَنت-

لاش ءُ ٹپی جام غلام قادر گورنمنٹ نادُراھجاہ ھب ءَ برگ بیتگ اَنت ءُ ٹپی بندات دوا درمان کنگ ءَ پد کراچی نادُراھجاہ ءَ برگ بیتگ اَنت-

وئیل ءَ بیران ءُ ٹپی ئیں مردمانی سیادی پشاور ءَ اِنت چہ-

ھمے وڑ چہ سندھ سونمیانی وندر ءِ تیاب دپی دمگ ڈام بندر ءَ آؤکیں دریاورداں چہ پُریں سوزوکی پک اپ بُنجاھی راجی شھدگ سر ءَ پیر مجاھد نزیک ءَ تُرند رؤگ ءِ سبب ءَ ڈرائیورے نہ مرّ اِنتگ ءُ چپ بیتگ-

وئیل سبب ءَ سوزوکی ءَ سوار دریاوردانی تہ ءَ یک دریاوردے ابو سومرو ء محمد صدیق جھمنند عجائب سومرو سندھ ھما دمان ءَ بیران بیتگ، وھدے کہ سوزوکی ءَ سوار آ دگہ دریاورد راجہ رند ء دریا خان ، غلام مصطفی ء بچو ، جمن ء محمد اسحاق ، خدا بخش ء احمد ، واحد بخش ء رسول بخش ، عبدالعزیز ء سومرو ، بچو ء دھنی بخش ءُ یوسپ ء ھاشم سک ٹپی بیتگ اَنت-