لاھور ءَ پنجاب یونیورسٹی ءَ لس پوشاکی گداں مردماں نودربر زورانسری وتی ھمراھی ءَ برتگ ،چاگردی رسانکجاھاں تامر شنگ-
آدینگ ءِ روچ ءَ پنجاب یونیورسٹی ءَ گیٹ نمبر چار ءَ لس پوشاکی گداں مردماں یونیورسٹی ءَ وانوکیں فرید بلوچ زورانسری بیگواہ کنگ بیتگ- فرید بلوچ بلوچستان ءِ دمگ شال ءِ جھمنند اِنت کہ پنجاب یونیورسٹی ءَ ماسٹر کنگ ءَ بیتگ-
وئیل ءِ تامر چاگردی ترامجاھاں شنگ بیتگ انت کہ گندگ بیت اِنت لھتے سلاہ بندیں مردمانی ھمراھی ءَ پنجاپ پولیس ءِ پوشکاں یک کارندھے بلوچ ورنایا زورانسری گاڑی ءَ سوار کنگ ءَ اَنت-
گندگ بیت اِنت بلوچ ورنا آوار جنوکاں وتی رکینگ ءَ گھگیری کنگ ءَ اِنت ءُ ھمے وھد ءَ ورنا ءَ لٹ ءُ کُٹ کنگ ءَ اَنت ءُ زورانسری گاڑی ءَ سوار کن اَنت-
وانوکیں نودربرانی رد ءَ فرید بلوچ سلاہ بندیں مردماں گوں وت برتگ چریشی ءَ پد فرید بلوچ ءَ آئی ءِ ھمراھاں سرپدی دیگ نہ بیتگ اَنت گمان بیت اِنت فرید بلوچ دگہ بلوچ نودربرانی ڈول ءَ بیگواھی ءِ آماچ کنگ بیتگ-
زانگ بہ بیت پنجاپ ءِ جتا جتائیں جاھاں گیشتر لاھور ءُ اسلام آباد ءَ ایشی ءَ پیش بازیں بلوچ نودربر دزگیر کنگ ءُ بیگواہ کنگ بیتگ اَنت ایشانی توک ءَ گوستگیں سال ءَ بیبرگ امداد بلوچ وئیل سرلبز گندگ بیتگ کہ آ پنجاپ یونیورٹی ءَ پاکستانی چیریں ادارھاں آوار جنی ءِ نشانگ کتگ ات کہ چریشی ءَ پد آئی ءِ تامر دیم ءَ اتکگ ات-
ھمے ڈول ءَ پنجاپ ءِ شھر راولپنڈی ءَ سال دوھزار ءُ بیست ءُ دو ءَ زورانسری آوار جنی ءِ آماچیں فیروز بلوچ دیم ءَ نیتکگ اے وھد ءَ ترسینگ ءُ دزگیری ءِ وئیل پیش اتکگ اَنت-
مروچی زورانسری آوار جنی ءِ آماچین بلوچ ءِ زورانسری آوار جنی ءِ درگت ءَ چاگردی ترامجاھاں بلوچ گل ءُ نودربر ترندیں زھرشانی کنگ ءَ اَنت ءُ پنجاپ یونیورسٹی ءَ وانوکیں بلوچ نودربرانی گوشگ اِنت جامعہ پنجاپ ءِ چیف سیکورٹی بلوچ نودربرانی ترسینگ ءُ نودربرانی ٹک ءُ نشان کنگ ءُ فرید بلوچ ءَ سلاہ بندانی دست ءَ بیگواہ کنگ ءِ زمہ وار اِنت-