یکشمبے ءِ روچ ءَ بلوچستان نیشنل پاٹی ءِ نیمگ ءَ چہ وڈھ ءَ پندی روانک سردار اختر مینگل ءِ چیردستی ءَ شال ءِ نیمگ ءَ رھادگ بیتگ-
روانک ءَ پاٹی ءِ باسکاں ھوار بازیں کچے ءَ مھلوک گاڑی ءُ پرپٹاں سوار بیتگ ءُ روانک ءَ بھر مند بیتگ اَنت-
پاٹی ءِ درشان ءِ رد ءَ سدانی کچ ءَ گاڑی ءُ ھزارانی کچ ءَ مھلوک ھوار اَنت ءُ ھمک جاہ ءَ کہ روانک گوزگ ءَ اِنت ءُ ھمود ءَ زالبول ءُ زھگ لوگاں درایگ ءُ روانک ءَ وشھت کنان ءُ روانک ءَ بھر مند بوگ ءَ اَنت-
پاٹی ءِ درشان ءِ رد ءَ ھزدار ءَ زالبول ءُ زھگاں کوشک ءِ ھند ءَ روانک ءِ گچینی رنگے ءَ وشھت کتگ ءُ ڈیتھ اسکواڈز ءِ ھلاپ ءَ اوگام جتگ ءُ کوشک ءُ چمروک ءِ ھند ءَ بازیں کچے ءَ مردم روانک ءَ ھوار بیتگ اَنت-
سوراب ءِ ھند ءَ پنجگور،تربت،گوادر،بسیمہ ءَ ھوار دگہ ھندانی کاروان روانک ءَ ھوار بنت اِنت- ھمے ڈول ءَ کلات،مستونگ ءُ لک پاس ءِ ھند ءَ بی این پی شال ءِ نیمگ ءَ روانہ ءِ وشھت ءَ کیت اِنت ءُ نوشکی، چاگی، ءُ ھمے وڑ ءَ کسٹم ءَ نصیر آباد، سبی،جھل مگسی،گنداواہ مچھ ءَ ھوار کاروان روانک ءَ ھوار بنت اِنت ءُ روانک مروچی شال ءَ سر بیت اِنت ءُ ھاکی چوک ءَ سردار اختر مینگل تران کنت اِنت ءُ آیوکیں بنگپ ءِ جار ءَ جنت اِنت-