علی اصغر بنگلزئی ءِ زورانسری آوار جنی ءَ بیست ءُ دو سال سرجم، پِت یل کنگ بہ بیت – گلام فاروق

علی اصغر بنگلزئی ءِ زورانسری آوار جنی ءُ بازیں وھدے بیگواھی ءِ بگیری ءَ آئی ءِ زھگ گلام فاروق ءَ شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ءَ سرکماش نصراللہ بلوچ، ماما قدیر، حوران بلوچ ءُ علی اصغر ءِ مستریں برات داد محمد ءِ ھمراھی ءَ اھوالکاراں گوں تران کنان ءَ گوشتگ کہ آئی ءِ پت علی اصغر اولی رند ءَ سال دوھزار ءَ پوجی ڈکٹیٹر مشرف ءِ دور ءَچیریں ادارھانی کارمنداں آوار جتگ ءُ چاردہ روچاں پد یل داتگ، دومی رند ءَ سال دوھزار ءُ یک ءَ اکتوبر ءِ ماہ ءَ محمد اقبال ءِ ھمراھی ءَ ڈگری کالج ءِ دیم ءَ چیریں ادارھانی کارمنداں در کانودی آوار جتگ ءُ بیگواہ کتگ – محمد اقبال بیست ءُ چار روچاں پد یل داتگ ءُ علی اصغر روچ مروچی چیریں ادارھانی کارمنداں گون انت، مروچی ھژدہ اکتوبر ءَ منی پت ءِ زورانسری آوار جنی ءَ بیست ءُ دو سال سرجم انت –

آئی ءَ گوشتگ کہ اے بیست ءُ دو سالانی میان ءَ ما وتی پت ءِ ھاتر ءَ کانود ءِ جوڈ کتگیں ادارہ، سرکار ءِ در ٹک اِتگ انت ءُ اشی ءَ ھوار پرایمنیں زھرشانی ھم کنان ءُ پیداک انت، آمیدگس ءَ ھم اے زانگ بوتگ کہ اصغر علی چیریں ادارھانی کارمنداں آوار جتگ بلے اشی ءَ ابید ھم انساپ ءِ ھاتر ءَ جوڈ کنگ بوتگیں ادارھاں ملکی کانودانی رِد ءَ ھچ وڈ کرد پیلو نہ کتگ بلکنہ کیس گیشتر ھراب کنگ ءِ جھد کنگ بوتگ، بیگواھیں مردمانی ھاتر ءَ جوڈ کنگ بوتگیں کمیشن ءَ ھمے سال ءَ منی پت ءِ کیس سرا دوبر کٹ پول بندات کتگ مارا دوبر چہ بندات ءَ وتی پت ءِ ھاتر ءَ کانودی جنگ کنگ کپیت –

گلام فاروق ءَ گوشتگ پت ءِ زورانسری آوار جنی ءَ مئے کھول ءِ زند ازاب ءِ تہ ءَ گوزگ ءَ انت، منی برات ءُ گھار پت ءِ مھراں چہ زبھر انت – بازیں وھداں کانودی ءُ پرایمنیں جھد ءَ ابید ھم مارا انساپ نہ رستگ ءُ مئے باندات تباھ بوتگ –

آئی ءَ گوشتگ کہ مئے کھول ءِ اے جاورانی دیمپان کنوک ریاست ءُ ریاستی ادارہ ءُ آمیدگس انت – آئی ءَ گوشتگ کہ ما اے گپ جنگ ءَ رد گوشگ نہ بہ ایں کہ ریاست ءُ ریاستی ادارھاں ھوار انساپ ءِ ھاتر ءَ جوڈ کنگ بوتگیں درسیں ادارھ مئے کھول ءِ مجرم انت آ ھچ وڈا پھل کنگ نہ بنت –

آئی ءَ لوٹ کتگ ءُ گوشتگ کہ انسانی ھمدردی ءِ رد ءَ مارا بس ھمے گوشگ بہ بیت کہ علی اصغر زندگ انت اگاں ناں بندیگجاھاں شھید کنگ بوتگ –

گڈسر ءَ آئی ءَ انسانی ھکانی ادارھاں ھوار سیاسی پاٹی ؤ نودربر گل ءُ ھرتک ءُ پھناتاں سیادی داروکیں مردماں گوں لوٹ کتگ ءُ گوشتگ کہ علی اصغر ءَ ھوار درسیں بیگواھیں مردمانی یل کنائینگ ءُ زورانسری آوار جنیانی بگیری ءَ جوانیں وڈے ءَ توار چست بہ کن انت –