زرینہ ءِ دردناکیں ودار
ٹی بی پی شونگال
”منی لوگ واجہ چہ گوستگیں بازیں سالاں بیگواہ اِنت، من نزاناں کہ من وت ءَ را آئی ءِ لوگیگ سرپد بہ باں اگاں جنوزام” زرینہ چہ ھپت سالاں زورانسری بیگواھی ءِ آماچیں لوگ واجہ شبیر بلوچ ءِ یل کنائنگ ءِ ھاتر ءَ کراچی ءَ برجاھیں زھرشانی ءَ گُشتگیں اے لبزاں بلوچ زالبولانی درد ءُ ازیت ءَ پدر کن اَنت، کہ اے چہ بازیں سالاں زورانسری بیگواھیں دوستیگانی وداریگ اَنت ءُ ودار آیانی بھت جوڑ بیتگ۔
بلوچ اسٹوڈنٹس آرگنائزیشن ءِ بنجاھی انفارمیشن سیکٹری شبیر بلوچ چار اکتوبر دو ھزار ءُ شانزدہ ءَ چہ کیچ ءِ گورکوپ ھنکین ءَ فرنٹیر کور ءَ زورانسری بیگواہ کُتگ اَت۔ شبیر ءِ گوھار سیما ءُ لوگی زرینہ چہ ھپت سالاں آئی ءِ یل کنائنگ ءِ ھاتر ءَ زھرشانی کنگ ءَ اَنت، اسلام آباد ءُ شال ءِ ریڈ زون ءَ نندانک ھم داتگ اِش، شال، ھب چوکی ءُ کراچی ءَ یکشل ءَ زھرشانی کنگ ءَ اَنت۔ پاکستان ءِ آمید گس ءُ مردمی اگبالانی کمیشنانی در ٹُک اِتگ اَنت اِش بلے سالانی گوزگ ءَ پد ھم شبیر بلوچ یل کنگ نہ بیتگ۔
جنگ زدگیں بلوچستان ءَ بازیں زرینہ ھست اَنت کہ آ نزاناں آیانی لوگواجہ زندگ اَنت اگاں کُشگ بیتگ اَنت۔ سیما، فرزانہ ءُ رخسانہ ءِ پئیمیں گوھار چہ بازیں سالاں وتی براتانی راھاں چارگ ءَ اَنت ءُ بازیں پیریں مات ءُ پِتاں وتی بچانی ودار ءَ اے جھان یل کُتگ ءُ رپتگ اَنت۔ بلوچستان ءَ چشیں کجام ھم دمگے پشت نہ کپتگ کہ آ چہ زورانسری بیگواھیاں اسرمند نہ اِنت۔
پاکستان ءِ بلوچ جنگ ءِ دارگ ءِ ھاتر ءَ زورانسری بیگواھی ءَ سلاہ ءِ پئیم ءَ کامرز کنگ ءِ شوربندی ءَ بلوچستان ءِ تہ ءَ یک انچیں تُرسچاری ءِ ودی کُتگ کہ چریشی ءَ ھزارانی کھول اسرمند اَنت۔ زورانسری بیگواھیانی سر ءَ دگنیائے ءُ میان استمانی مردمی اگبالانی ادارگانی ھاموشی ءُ چہ پاکستان ءَ جُست گِرگ ءَ پھریز بلوچستان ءِ ناگیگیں جاورانی گنتر کنگ ءِ سوب جوڑ بئیگ ءَ اِنت۔