مبارک کازی ءِ سَے پاتیہ، ھزارانی کچ ءَ مردماں آئی ءِ مانشجاہ ءِ ترءُ تاب کتگ

بلوچ زبان ءِ نامدار ءُ بے دروریں شائر مبارک کازی ءِ سَے پاتیہ ءَ ھزارانی کچ ءَ مردماں پسنی ءَ شُتگ ءُ آئی ءِ مانش چار اِتگ وھدیکہ بلوچستان ءَ ھوار دری ڈیھاں آئی ءِ یات ءَ مراگش برجم دارگ بوگ ءَ انت –

دوشمبے ءِ روچ ءَ بلوچستان ءِ جتا جتائیں ھند ءُ دمگاں شائر، نودربر ءُ ھر تک ءُ پھناتاں سیادی داروکیں مردماں پسنی ءَ اتکگ ءُ واجہ ءِ پُرس سر ءَ دست داشتگ، وھدیکہ پدا رند ءَ مزنیں کچے ءَ مردماں مچی ءِ دروشم ءَ مانشجاہ ءَ شُتگ ءُ آئی ءِ مانش ءِ سر ءَ پُل ریتکگ ءُ دروت ندر کتگ –

چہ کیچ ءَ سربوتگیں ھالانی رِد ءَ تربت شھدربرجاہ ءِ نودربراں دوشمبے ءِ روچ ءَ مبارک کازی ءِ یات ءَ اوگام جتگ، روانک ءَ نودربراں مزنیں کچے ءَ بھر زرتگ ءُ ماسٹر ھم ھوار بوتگ انت –

روانک ءَ بھر زورکیں مردمانی دست ءَ بینر بوتگ انت کہ آیانی سر ءَ مبارک کازی ءِ شئیر نبشتہ بوتگ انت ءُ پہ آئی ءِ دروت ءَ نودربراں وتی ھیال درشان نبشتہ کتگ انت –

نودربراں ھوار پروفیسر ڈاکٹر عبدالصبور ، ڈاکٹر طاہر حکیم ، جمیل احمد بادینی، طارق رحیم ، گلاب مرزا ، سادق سبا ، باہدین احمد ، میر شریف ، میڈم شہناز ، میڈم فیروزہ ءُ ھوار دگہ بازیں مردمے اوگام جنگ ءَ ھوار بوتگ انت –

نودربراں لوٹ کتگ کہ مبارک کازی ءِ نام ءَ شھدربر جاہ ءِ تہ ءَ آئی ءِ یاتگیری چیزے جوڈ کنگ بہ بیت –

دومی نیمگ ءَ نودربر ءُ لبزانکی مردماں شال، ھزدار ءَ ھوار سرجمیں بلوچستان ءَ آئی ءِ یات ءَ چراگ روک کنگ بوتگ ءُ ھلیجی ڈیھاں آئی غائبانہ نماز جنازہ ءِ ھمراھی ءَ آ دروت ندر کتگ –

جتا جتائیں مراگشاں ھواریں مردماں آئی ءِ مرگ پہ بلوچ لبزانک ءُ زبان ءَ بلاھیں وئیلے گوشتگ کہ آئی ءِ وتی جتائیں شائری تہ ءَبلوچ راجی جھد ءُ زمین ءَ گوں مھر یک پدریچ ءَ دومی پدریچ ءَ سرکنگ ءَ وتی کرد پیلو کتگ –

مردماں گوشتگ کہ آئی ءِ بے دروریں شائری جھان ءِ ایردستیں راجانی رھشونی ءِ جوانیں بھرے بنت –