گوادر: پاکستانی پوج ءَ یک مردمے آوار جتگ، زورانسری آوار جمگ بوتگیں تاج محمد ءِ گس ءِ سر ءَ کبزہ

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ، دومی نیمگ ءَ ماں کراچی ءَ زورانسری آوار جنگ بوتگیں تاج محمد سرپرہ ءِ گِس ءِ سر ءَ کبزہ کنگ بوتگ –

گیشیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ، آوار جنگ بوتگیں مردمے پجار کمالان ء گل محمد ءِ نام ءَ چہ بوتگ –

اھوالکارءِ رِد ءَ اے مرد پاکستانی پوج ءَ یک ستمبر ءَ آوار جتگ کہ ھما انت گار ءُ بیگواہ انت –

دومی نیمگ ءَ چہ کراچی ءَ ھمے ھال آیگ انت کہ زورانسری آوار جنگ بوتگیں باپاری مردم میر تاج محمد سرپرہ ءِ گِس ءِ سر ءَ کبزہ کنگ بوتگ –

تاج محمد سرپرہ ءِ لوگبانک ءَ اے ھبر راست کتگ ءُ چاگردی ترامجاہ ایکس ءَ وتی پوسٹ ءِ تہ ءَ نبشتگ کہ ڈی ایچ اے کراچی فیز ھپت ءَ منی گِس ءِ سر ءَ کبزہ گیریں ٹولی ءَ در کانودی کبزہ کتگ کہ آیاں علی رضا مگسی (زولفقار مگسی ءِ زھگ) ءُ ندیم جلبانی ءِ سروکی ءَ کتگ کہ ھچ وڈا منگ نہ بیت –

آئی ءَ گوشتگ کہ ما چہ سندھ سرکار ءَ لوٹ کن ایں کہ اے درکانودی کبزہ گیری ءَ بہ داریت –

آئی ءَ گوشتگ کہ گس ءِ سر ءَ کبزہ کنوک ءُ مئے مال ءُ مڈیانی سر ءَ کبزہ کنوکاں چہ مارا پھریز کنگ بہ بیت پرچا کہ اے وھدی کبزہ کنوکیں ٹولی مئے گس ءَ ساڑی انت، سندھ ءِ پولیس ھم اشانی گوم ءَ گون انت ءُ مئے پھریز ءِ بدل ءَ کبزہ گیرانی ھمراہ انت ـ من چہ درساں لوٹ کناں کہ منی گوم ءَ بوشتاں ءُ اے کبزہ گیریں ٹولیانی بگیری ءَ توار چست بکناں –

زانگ بہ بیت تاج محمد سرپرہ نوزدہ جولائی سال دوھزار بیست ءَ چہ کراچی ءَ پاکستان ءِ چیریں ادارھانی کارمنداں ھما وھد ءَ آوار جتگ وھدیکہ آ ترکی ءَ روگ ءَ در آیگ ءَ بوتگ –

آئی ءَ گوشتگ کہ سَے سالے ءِ گوزگ ءَ پد ھم آئی ءِ ھچ ھال نیست کہ کجا انت کجام جاورانی تہ ءَ انت –