روکپتی بلوچستان ءَ یک بلوچے ءَ ھوار سَے کس پاھو دیگ بیتگ اَنت ءُ ھر سئیں مردم کوش ءِ بھتام ءَ پاھو دیگ بیتگ اَنت –
پاھو دیگ بیتگیں مردمانی یکے ءِ پجار بیست ءُ ھپت سالی ئیں مھمد ناروئی ء شاہ مھمد جھمنند زاھدان ءِ نام ءَ زانگ بیتگ-
اھوالانی رد ءَ مھمد ایرانی سال سیزدہ سد ءُ نود ءُ نُھ ءَ کوش ءِ بھتام ءَ گرگ بیتگ ءُ پد ءَ آئی ءِ سر ءَ پاھو ءِ ھکم اتکگ بیتگ-
آ گوستگیں سَے شمبے ءِ روچ ءَ دگہ دو زندانی کہ بیرجند ءَ بندیگ بیتگ اَنت ھرسئیں مردم زاھدان ءَ مزنیں زندان ءَ جتائیں کوٹی ءَ آرگ بیتگ ءُ شمبے ءِ سھب ءَ پاھو دیگ بیتگ اَنت-
آ دویں کس بیرجند ءَ استان ھراسان ءِ نندوک اَنت کہ ھردوک کوش ءِ بھتام ءَ گرگ بیتگ اَنت –
اے سال ءِ بندات ءَ داں انگت ءَ ھشتاد ءُ ھپت مردم پاھو دیگ بیتگ اَنت کہ ایشانی توک ءَ چار زالبول ھوار اَنت – روکپتی بلوچستان ءَ گیشتر مردم نشہ باپاری ءُ کوشانی بھتام ءَ پاھو دیگ بوگ ءَ اَنت-