من یک کسھے آں
نبشتہ کار: زمین زھگ
رجانکار: سنگت بلوچ
دی بلوچستان پوسٹ
من ھما مزنیں مات ءِ چُک آں کہ آ گوں وژدلی ءَ منی کُتگیں سوڑگ (پیسلہ) ءِ سر ءَ من ءَ بلوچستان ءِ بیرک ءَ بڈّ ءَ دنت ءُ ھمباز کنگ ءَ پد اَنچو رکست نہ کنت بلکیں رکست کنت ءُ گوش ایت پد ءَ آوار ایں ءُ منی مرگ ءَ پیسر تاں پنچ روچ ءَ تھجد ءِ نماز ءَ بس دو دوا لوٹ ایت کہ یا اللہ منی چُک وتی مکسد ءَ سوبین بات ءُ آئی ءَ ھاٹی ءُ دلبڈّی بہ دے۔ من ھما پِت ءِ چُک آں کہ آ منی پیشانی ءَ بوس ایت ءُ آ گوں منی مات ءَ تھجد ءِ نمازاں منی سوبمندی ءِ لوٹ ءَ کنت۔ من اسلم ءِ پرزند آں ءُ یاسمین ءِ چُک آں، من ریھان آں۔
راج ءِ بے وسی، گلامی، ءُ چگل داتگیں جوناں بگر تاں بیگواھیں مردم ءُ آیانی لوگ بانک ءُ آیانی اُپّاراں، من چہ آیانی ارسانی بیر ءِ پیداور آں کہ گڈی تیر ءَ وتی نام ءَ کن آں بلے پشتہ نہ کنز آں۔ من وتی راج ءِ اُمیت زِر پھاز آں۔ من زر پھاز آں۔ من مُسیب آں۔
مکُران ءِ گرمیں روچ، گرمیں گوات، پارود ءِ سردیں شپ ءُ برپیں نیم روچ منی مھر ءِ گواھی ءَ دے اَنت۔ من سنگت سنا، زاکر جان ءُ ھمل سکی ءِ شاگرد آں۔ من وتی سنگتانی ھاتر ءَ دژمن ءِ واست ءَ کھرے آں۔ من ریھان آں۔ من سلمان آں۔
من اے سپر ءِ یک مساپرے آں اے راہ ءِ مساپراں بھ زات ارزشت نہ داتگ، وتی زاتی واھشت بھ پدْر نہ کُتگ اَنت، نیکہ نیزوری پدْر کُتگ اَنت۔ من ھید ءَ بگر تاں ھون ءِ گڈی کتراہ ءَ نبشتہ کُتگیں ھما داستان آں کہ چہ آس ءُ بمباں بندات بوتگ تاں جون ءِ ھر یک ٹُکرے کہ ماتیں وتن ءِ گوات ءِ تہ ءَ ھوار بیت ءُ من پہ دائمی ءِ ھاتر ءَ رکست باں۔ بلے پہ نوجواناں یک رژنائیں راھے پچ کن آں۔ من سربلند آں۔
بولان ءِ وڑیں جگر ءُ تمپ ءِ کلات ءِ پیمیں سینگ، منی اوپار چہ چلتن ءَ مستر، منی آگاھی ریاست پاکستان ءِ تباھی ءِ چیدگ، من گواڈگ ءِ پیمیں پُل، کولواہ ءِ ڈک ءِ سر ءَ چاردھی ماہ ءِ ندارگ، من میرو ءُ ماتانی مات ءُ ھیبو ءِ دلبڈّی ءِ دْروشم ءَ شاری آں۔
من ھما پدائی ءِ دشتار آں کہ مئے سور ءَ سے ماہ پیسر یک انچیں سوڑگے ءِ آسر کنگ ءَ رھادگ بوت کہ آئی ءَ مئے پدریچانی سوچ بدل کُت ءُ بلوچ جُھد ءَ را چہ یک مزنیں پلسپھے ءَ آگاہ کُت، من توتک ءِ گواڈگ ءُ ریھان ءِ مھروک آں، من سمعہ آں۔
من چہ مات ءِ لیلہ ءَ بگر تاں گوھار ءِ نازینک ءَ، پت ءِ مھر ءَ ، ءُ تئی داتگیں ترس ءِ سایگ ءَ مزن بوتگ آں، من آزاد بلوچ ءِ تہ ءِ کاروان جنرل اسلم ءِ راہ ءِ ھمسر آں، مجید ءِ سرباز آں، من یک بلوچے آں، کہ چہ تئی نام نیادیں ملک پاکستان ءِ ھر یک زُلمے ءَ بگر تاں بلوچ زالبول ءِ اِزمت دری ءِ بگیری ءَ گھگیری ءِ چیدگ آں، من یک کسھے آں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔