ھندوستان ءِ دستیگیں کشمیر ءَ ناشرکارانی گون ءَ جنگ ءَ سَے پوجی بیران

ھندوستان ءِ دستیگیں کشمیر ءَ گچینی ھیست ءِ ھلاس بوگ ءَ چار سال سرجم بوگ ءَ ناگتی ناشرکاریں ٹولیانی گون ءَ جنگ ءَ ھندوستان ءِ سَے پوجی کارندہ بیران بیتگ اَنت-

فرانسیسی ھال سرکنوکیں ادارہ اے ایف پی ءِ رد ءَ آدینگ ءِ شپ ءَ ھندوستانی پوج ءِ یک ٹولی یے وادی کشمیر ءِ زرباری پھنات ءَ ھلان ءِ جنگل ءَ سلاہ بندیں باگیانی شوھاز ءَ بیتگ اَنت کہ ھمے وھد ءَ میان ءَ جنگ ءُ چوپ بیتگ ءُ چریشی ءَ سَے پوجی کارندہ زدگ بیتگ اَنت-

کشمیر ءِ پولیس ءَ ٹوئٹر ءَ یک ٹوئٹے ءَ گوشتگ کہ ھرسئیں زدگ بیتگین پوجی کارندہ رند ءَ بیران بیتگ اَنت- ءُ ناشرکارانی ھلاپ ءَ پٹ ءُ پول برجاہ اِنت-

اگست دوھزار ءُ نوزدہ ءُ وھدیکہ سروزیر نریندر مودی ءِ سرکار ءَ بازیں ھلکاں وت واجھی ھلاس کتگ ات، ناشرکار ءُ پوج ءِ میان ءَ اُرشانی توک ءَ کنی گندگ ءَ آیگ ءَ ات-

ھندوستان ءِ سرکار ءِ گوشگ اِنت اے گامگیج ءِ مول ءُ مراد جنگ آماچیں دمگ ءَ امن ءُ دیمروی آرگ لوٹ ایت بلے اے دگری ءَ پد چار سالانی توک ءَ کساد نُھ سد مردم مرتگ اَنت کہ ایشانی توک ءَ ھندوستان ءِ لشکر ءِ یک سد ءُ چل ءُ چار کارندہ ھوار اَنت-

ھمے سال ءَ داں انگت ءَ شست ءُ سَے مردم مرتگ اَنت کہ ایشانی توک ءَ نُھ شھری، شانزدہ پوجی ءُ سِی ءُ ھشت ناشرکار ھوار اَنت گوستگین سال ءَ بیران بیتگین مردمانی کچ دوسد ےأ پنجاہ ءُ سَے بیتگ اَنت-

دھلی ءِ نیمگ ءَ کشمیر ءِ گچینی واک ءِ ھلاس کنگ ءِ پیسلہ ءِ ات وھد ءَ سپریم کورٹ ءَ ھلگ ءَ اِنت-