منی پت ءَ دھ سال انت کہ زورانسری آوار جنگ ءُ بیگواہ کنگ بوتگ، یل کنگ بہ بیت – سمیر ءِ زھگ

کیچ ءِ دمگ مند ءِ جھمنند بیگواھیں سمیر احمد ء صابر احمد ءِ زھگ ہانی سمیر ءَ رسانکدراں وتی شنگ کرتگیں درشانے ءِ تہ ءَ بُرزی تبک واکدار ءُ ادارھاں گوں لوٹ کتگ ءُ گوشتگ کہ منی پت ءَ دھ سال انت ریاستی ادارھاں گون انت آ یل کنگ بہ بیت ءُ مارا چہ اے دردانکیں زند ءِ تہ ءَ رکینگ بہ بیت –

آئی ءَ گوشتگ کہ منی پت سمیر احمد پنچ مئی سال دوھزار سینزدہ ءَ چہ مند ءَ زورانسری آوار جنگ بوتگ کہ ھنگت بیگواہ انت – اے میان ءَ مارا بس دروگیں تسلہ دیگ بوتگ بلے راستی ءَ ھچ کنگ نہ بوتگ ما چہ پاکستانی ادارھاں گوں لوٹ کن ایں کہ منی پت ءَ زاھر بہ کن انت ءُ یل بہ کن انت –

آئی ءَ گوشتگ کی باندا شپ ھشت ءَ بگر تاں دوازدہ ءَ آن لائن مہم ءِ چلائینگ انت اشی ءِ تہ ءَ بھر بہ زور ات ءُ سمیر بلوچ ءِ وش سلامتی یل کنائینگ ءَ وتی کرد ءَ پیلو بہ کن ات –