وڈھ ءَ برجاھیں ناگیگی
ٹی بی پی شونگال
بلوچستان ءِ کلات دمگ ءِ بنجاھی شھر ھزدار ءِ وڈھ ھنکین ءَ چہ گوستگیں یک ماھے ءَ جاورھال ناگیگ اَنت۔ مینگل ٹک ءِ سردار اسد مینگل ءُ بلوچستان نیشنل پارٹی ءِ سروک سردار اختر مینگل ءُ دومی نیمگ ءَ شفیق مینگل یک دومیگ ءِ بگیر ءَ سنگر بند اَنت ءُ میڑانی تہ ءَ مزنیں سلاھانی آجوئیں کارمرزی برجاہ اِنت۔ ترندیں میڑانی سوب ءَ وڈھ ءِ مھلوک گَٹ اِتگ اَنت ءُ شال – کراچی مزن شھدگ ءِ ھند ءَ چہ گاڑیانی رپت ءُ آمد سرجمی ءَ بند بیتگ اَنت۔
بلوچستان نیشنل پارٹی ءِ بھتام اِنت کہ شفیق مینگل چیریں ادارگانی پرمان ءِ پد ءَ سردار اختر مینگل ءَ نزور کنگ ءِ جھد کنگ ءَ اِنت۔ بی این پی ءَ شفیق مینگل ءِ بگیر ءَ سرجمیں بلوچستان ءَ پرگ بند ءُ تھتگ بندیں ھڑتال کُتگ ءُ بلوچستان سرکار ءُ ٹکی مسترانی کوشستاں ابید ھم وڈھ ءَ ناگیگی یکشلی ءَ گیشتر بوان اِنت ءُ شفیق مینگل ءِ مردم کوٹ مینگل ءَ سرداراختر مینگل ءِ لوگ ءَ گوں راکٹاں نشانگ کنگ ءَ اَنت۔
بلوچستان ءِ سیاسی پاٹیانی مدامی بھتام اِنت کہ پاکستانی چیریں ادارگاں بلوچ جنگ ءِ دارگ ءِ ھاتر ءَ چہ دو ھزار ءُ ھشت ءَ سرجمیں بلوچستان ءَ ڈیتھ اسکواڈ اڈ داتگ اَنت، کہ آ بازیں سیاسی باسکانی زورانسری بیگواھی ءُ کوشانی تہ ءَ ھوار اَنت ءُ چہ ھمیشاں یک ڈیتھ اسکواڈے شفیق مینگل ءِ مستری ءَ اَڈ دیگ بیتگ کہ آ ’مسلح دفاع‘ بلوچستان ءُ حق نا توار ‘ءِ نام ءَ زانگ بیت اِنت۔ بلوچستان ءَ ڈیتھ اسکواڈ ھمینکس تاکتور اَنت کہ آ ریاست ءِ تہ ءَ وت ریاست ءِ کرد ءَ پیلو کنگ ءَ اَنت۔
مسلح دفاع بلوچستان، جھالاوان عوامی پینل ءُحق نا توار شفیق مینگل ءِ مستری ءَ قلات ھنکین ءُ ھاسیں پئیماں ھزدار ءَ ڈیھی ادارگاں چہ گیشتر تاکت دار اَنت۔آ گمانی پئیم ءَ پہ لب بیگواہ کنگ، زورانسری بیگواھی ءُ کوشکاری ءِ بے کساسیں وئیلانی تہ ءَ ھوار بیتگ اَنت۔ لیویز لشکریانی دارگ ءِ سر ءَ وئیل جاہ ءَ ساڑی ایں نھ لیویز کارندھانی کوش ءَ ھم ھوار اَنت۔ سندھ پولیس ءِ جے آئی ٹی ارزی ءِ رد ءَ شفیق مینگل ءِ سیادی گوں لشکر جھنگوئی ءَ ھم ھست اِنت ءُ شکارپور اُرش، کہ آئی تہ ءَ شست ( 60 ) مردم کُشگ بیتگ اَت ھما وتکُشیں ارشکار ءَ وڈھ ءَ باھوٹی دیگ بیتگ اَت ءُ شفیق مینگل ءِ مردماں آ داں شکار پور ءَ سرکُتگ بیتگ ات۔
بلوچستان ءِ پارلیمانی پاٹی جتاھیں وھداں ڈیتھ اسکواڈانی ھلاپ ءَ پاکستان ءِ پارلیمان ءُ زھرشانیانی تہ ءَ توار چست کنان اَنت بلے بلوچستان ءَ داں ھما وھد ءَ ڈیتھ اسکواڈانی بگیری ءَ مھکمیں زرمبشت ءِ جُنزینگ گرام بیت دانکہ پارلیمانی پاٹی اے ڈیتھ اسکواڈزاں وتی پاٹیانی تہ ءَ باھوٹی دیگ بند نہ کن اَنت، تُری آ گمانی ڈیتھ اسکواڈ ءِ مستر قلات ءَ کوھی خان مینگل ءُ قمبر خان مینگل بہ بنت، مشکے ءَ علی حیدر محمد حسنی بہ بیت، مستونگ ءُ شال ءَ نور احمد بنگلزئی بہ بیت یا اگاں کیچ ءَ راشد پٹھان ءُ میر ھوتمان بہ بنت۔
یک دمگے ءَ ڈیتھ اسکواڈ ءِ بگیری ءُ دومی دمگ ءِ ڈیتھ اسکواڈ ءَ پاٹی ءِ تہ ءَ باھوٹی دیگ ءِ سوب ءَ اِیشانی ھلاسی باوری نہ اِنت۔ پارلیمانی پاٹیاں ابید کجام ھم تپاوت ءَ ڈیھی ڈیتھ اسکواڈ ءِ بگیری کنگ لوٹ ایت تھنا گُڑا بلوچستان ءِ ڈیتھ اسکواڈانی بگیری ءَ جُنز مھکم بیت کَنت۔
ڈیھی ادارگاں ھم سرپد بیگ لوٹ ایت کہ ڈیتھ اسکواڈ کارمرز کنگ ءَ گوں سیاسی جُنز ھلاس بیت نہ کن اَنت ءُ بلوچ راجی اگبالانی دیگ ءَ ابید بلوچستان ءِ جیڑہ گیوار نہ بنت اِنت۔