وڈھ ءَ پوج ءِ نیمگ ءَ گسانی سر ءَ بیڑ، بازیں مردمے آوارجنی ءَ پد بیگواہ

وڈھ ءَ پوج ءَ بازیں گسے وتی انگر ءَ کُتگ ءُ گسانی سر ءَ بیڑ برتگ ، بازیں مردمے زورانسری آوار جتگ ءُ گوں وت برتگ انت –

وڈھ ءِ جھمنند ایں شیخ ٹک ءِ نیمگ ءَ شنگ کنگ بوتگیں درشانے ءِ تہ ءَ گوشگ بوتگ کہ دوشمبے ءِ روچ ءَ ایف سی ءَ وڈھ ءَ شیخ ٹک ءِ بازیں گسے ءِ تہ ءَ بیڑ برتگ پٹ پول کتگ – پٹ ءُ پول آپریشن ءِ میان ءَ پاکستانی پوج ءَ چادر ءُ چاردیوالی لگتمال کُتگ –

شیخ ٹک ءِ نیمگ ءَ شنگ کنگ بوتگیں درشان ءِ تہ ءَ گوشگ بوتگ کہ پوج ءَ انگیری ءِ میان ءَ ٹک ءِ بازیں ورنایے لٹ شاپ کُتگ ءُ زورانسری آوار جتگ ءُ گوں وت برتگ انت کہ ھما انت بیگواہ انت –

آھانی گوشگ انت مئے مردماں سَے سال انت کہ کشندہ ٹولی، دُز ڈنگ، آوار جنوکانی آماچ انت تنی وھدی مئے دوازدہ مردم شھید کنگ بوتگ انت بازینے زدگ کنگ بوتگ انت – شیخ ٹک ءِ وڈھ بازار ءَ باپاری بند انت – عبدالوحید شیخ ھماھانی بندیگ انت اشی ءَ ابید ھم شیخ ٹک ءَ ملکی ادارھانی گوم ء تعاون کتگ ءُ پرایمنیں زھرشانی کتگ بلے مروچیگیں وسریں بیڑ ھمے گپ ءَ پدر کنگ ءَ انت کہ وڈھ ءِ جاورھالاں گیش ھراب کنگ ءِ زمہ داری فرنٹیر کور ءَ دیگ بوتگ کہ آ ھچ وڈا وڈھ ءِ ایمنی ءَ پہ وشیں ھالے نہ بیت –

آھاں وتی درشان ءِ تہ ءَ گوشتگ کہ ما برزی تبک ءِ واکداراں گوں دزبندی کنیں کہ شیخ ٹک ءِ کسان سالیں ورنا ھمے زوتاں یل کنگ بہ بنت ءُ ٹک ءِ گسانی سر ءَ ایف سی ءِ انگر ھلاس کنگ بہ بیت اگاں ناں گڈا چدوگیشتر ما اوپار کرت نہ کنیں ءُ پدا ھرچی بیت آئی ءِ زمہ دار فرنٹیر کور ایف سی انت –