یک نیمگے بلوچانی کُشت ءُ کوش ءُ دومی نیمگ ءَ گند ءُ نند ءِ گپ جنگ بوگ ءَ انت – ماما قدیر

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی پریس کلب ءِ دیم ءَ برجاہ، زھرشانی بنجل ءَ مروچی پنچ ھزار ءُ یک سد ءُ ھپت روچ سرجم بوتگ انت – مروچی چہ مستونگ ءَ بلوچ کونسل ءِ گوستگیں سرکماش خلیل احمد وتی سنگتانی ھمراھی ءَ بنجل ءَ اتکگ ءُ دلپدردی درشان اِتگ –

گل ءِ کمک سرکماش ماما قدیر بلوچ ءَ گوشتگ کہ بلوچ سرڈگار ءَ بلوچ راج ءِ دردانی گندگ ءَ پد کزا یک مزن دلیں مردمے وتی چمانی ارساں بدار ایت۔ بلے بلوچ راج اِنت اے درداں اوپار کنگ ءَ اِنت – پرچاکہ ایردستیں راج اشی ءَ ابید دگہ ھچ کُت نہ کنت بلے پدا ھم بلوچ راج ءَ اے جھد ءِ راہ گچین کرتگ ءُ جھان ءَ را ھمے کلوہ داتگ کہ ما ایردستی ءَ نہ منّ ایں ءُ ایردستی ءِ بگیری ءَ جھدکن ایں –

ماما کدیر گوشتگ اے جھد ءَ ناکہ تھنا بلوچ راج چہ واب ءَ پاد کرتگ بلکنہ بلوچ بلوچ راجی زرمبشت بھر جوڈ کتگ ءُ یک رژناھیں گوستانکے نبیس اِتگ کہ جھان ءَ ھر کجا زرمبشت ءِ چست بوتگ آھانی سوبمندی گوں راج ءِ ھمکوپگی ءَ بوتگ بلوچ راجی زرمبشت ءَ ھم وتی منزل ءَ.سرکنگ ءِ ھاتر ءَ راج ءِ پلامرزی المی انت –

ماما قدیر ءَ گوشتگ کہ ریاست چہ بنداتی روچاں ھمے پروپکنڈہ ءَ کنگ ءَ انت کہ لھتے بلوچ انت ما آھانی گوم ءَ گند ءُ نند ءَ ساڑی انت – یک نیمگے بلوچ ءِ کُشت ءُ کوش ءَ کنگ ءَ انت ءُ آھانی ژانگولیں جوناں ویرانگاں چگل دیگ انت ءُ دومی نیمگ ءَ گند ءُ نند، سلاھانی چگل دیگ ءُ ایردستی ءِ منگے درونت دیگ بوگ ءَ انت –