روبرکتی ڈیھ زالبولانی اگبال ءُ بلوچ زالبول
نبشتہ کار: سمیر بلوچ
دی بلوچستان پوسٹ
روبرکتی مُلک کہ چہ دنیا ءِ اے دِگہ کُنڈا آباد اِنت راج یاکہ مُلکاں ھرچ پڑا دیم ءَ اّنت ءُ دنیا ءِ رھبری کنگ ءَ انت، چہ افریقہ ءُ ایشیا ءِ مُلکانی چاگرد ءُ سائنس، سیاست ءُ ٹیکنالوجی یاکہ استار شناسی ءَ بیت کنت کرناں دیم ءَ شُتگ انت، بلے اے ھم راستی انت کہ انگت ھمے دنیا ءَ آباد انت ءُ افریقہ ءُ ایشیا ءِ ملکانی ھمراھی ءَ اے دنیا ءَ زندگی کنگ ءَ انت۔
اے درستیں گپ وتی جاگہ ءَ بلے چوکہ مروچی بلوچے مستریں جیڑہ زالبول ءُ آھانی چاگردی کِرد انت من اِد ءَ کموکیں گؤست ءَ روا کہ ھمے روبرکتی مُلک کہ ایشاں مروچی زالبولانی ھک ءَ کانون ٹئینتگ ایشانی وتی گؤست پہ زالبولاں چے گُش ایت؟-
سَے سّد سال پیش چہ مسیح یونان کہ روبرکتی مُلکانی واجہ ات آئی ءِ کانون تہ ءَ داکتری ءِ اجازت تھنا مردیں آدم ءَ بیتہ ءُ زالبول چہ اے کانون ءَ سّک دِل ریش بیتگ انت کہ آھانی وڑ وڑیں جیڑہ بیتگ انت کہ مردیں آدمیں داکتر ءَ گوں بیان کنگ پہ آھاں ارزان نہ بیتگ اَنت-
یک روچے لاپ پُرے زالے بازار تہ ءَ درد ءَ گیپت ءُ گریوگ ءَ بیتگ داکترے آئی ءِ کِرا کئیت ءُ آئی ءَ چارگ لوٹ ایت بلے زال مکن کنت ھچ وڑا نہ من ایت کہ داکتر آئی ءَ بہ چار ایت، زال مڑا کنت کہ بازار تہ ءَ داکتر آئی ءِ چارگ ءَ بہ کنت، گڈی ءَ داکتر مجبور بیت ءُ گُش ایت کہ من وت زالے ءَ ءُ منی نام اگنوڈس انت وتی گؤرجیگ ءَ پچ کنت ءُ پیش دار ایت کہ بچار من ءُ زالے ءَ ءُ من یک داکترے ءَ لاپ پُرے زال ایمن بیت ءُ اگنوڈس ءَ چارگ ءَ دنت۔ ھمے واقعات ءَ رند توامیں یونان ءَ اے ھال شنگ بیت ءُ اگنوڈس ءِ سر ءَ کانونی جارے شنگ بیت کہ اے زال کُجا ءُ چے پیم داکتری ونتگ کہ مُلک تہ ءَ داکتری وانگ ءِ اجازت ھالی مردیں آدم ءَ ھست زالبول داکتری ونت یا کُت نہ کنت کہ اے کارے سزا مرگ اِنت۔
اگنوڈس امیدگس ءَ پیش کنگ بیت ءُ جُست کنگ بیت کہ تو چہ کُجا داکتری ونتگ ءُ در بُرتگ؟-
اگنوڈس گُش ایت من وتی سرے میِد بُراِتگ انت ءُ مردینی پوشاک گّورا کُتگ ءُ پُریں سالاں وت ءَ مردیں آدم زائر کُتگ ءُ داکتری ونتگ کہ من زالبولانی الاج ءَ کناں ءُ من چیروکائی زالبولانی الاج ءَ کنگ ءَ بیتگ انت بلے اے زال کہ ماتی درداں نارگ ءَ بیتگ منی اوپار ءَ جواب داتگ ءُ من بازار تہ ءَ آئی ءِ چارگ کُت کہ آئی ءِ چُک سلامت بہ بیت۔
چوکہ وکیل ءُ جج آ زمانگ ءَ دُرست مردیں آدم بیتگ انت ایشاں اے دلیل رد کُت انت ءُ یونان ءِ کانون ءِ رِد ءَ اگنوڈس ءَ را مرگے سزا دات، بلے ھمے جج ءُ وکیلانی زالاں اے سزائے سر ءَ زارشانی کُت ءُ گُشت اگاں اگنوڈس ءَ سزا بیت ماں ھم گوں اگنوڈس ءِ مرگ ءَ وت کوشی کنیں اے زھرشانی ءَ چہ سرجمیں یونان ءِ مردیں آدمیں چاگرد چہ بُنا سُر اِت ءُ ناباوری بیت۔ گڈی ءَ جج ءُ وکیلاں وتی نزوری من اِت ءُ اگنوڈس ءِ سزا ھلاس کُت چہ اے واقعات ءَ پد یونان مجبور بیت کہ وتی کانون ءَ بدل بہ کنت ءُ زالبولاں داکتری وانگ ءِ اجازت بدنت، اگنوڈس یونان ءِ اولی گائناکالوجسٹ منّگ بیت۔
مروچی بلوچاں روبرکتی ملکاں کساس بیست سال بیت کہ شُتگ انت آباد انت ءُ ھودے چاگردے رد ءَ وتی زندگی ءَ گؤازینگ ءَ انت ءُ مروچی بلوچ زالبولانی جنگ ءِ پِڑا سرمچاری ءَ رّد گُشگءَ انت، وتی ھیالانی درشان کنگ ھرکسی ھک انت ءُ ایرادگری ھوں ھرکسے کُت کنت منی جُست اِش انت کہ آیا روبرکتی مُلکانی ادارھاں چوشیں سوالے یا بیانے آفیشلی داتگ کہ بلوچ زالبول سرمچاری مکن انت؟-
آھانی میڈیا ھوں بس ھمے گپ ءَ کنت کہ یک بلوچ تنظیم ءِ زالبولاں پاکستانی ریاستی فوج سر ءَ اُرش کُتگ ءُ اے جار آھانی میڈیا ءِ تہ ءَ بس یک دو مِلٹ ءَ جاگہ کنت۔
کینیڈین وت ءَ را مزنیں انسانی ھکانی رھشون گُش انت بلے ماں اے گپ ءَ بے ھال مہ بہ ایں کہ ھمے کینیڈین مھلوک ءَ ءُ اِیشانی مذھبی پیشوا آں کساس 1900 ءَ گیش ھودے بُنھکی ءِ آبادیں مھلوک ءِ تِپل ءُ چُک کُشتگ انت ءُ وتی ھمے وانگ جاھانی چیرا کّل کُتگ انت کہ مروچی انسانی ھکانی اسکول جوڑ بیتگ انت۔
دِگہ گپ ءِ ایش انت کہ ماں بلوچ پشت کپتگیں راجے گلامے بلے مئے گلامی ءِ تہ ءَ ھمے روبرکتی مُلکانی دست مان انت ءُ بائد انت کہ ماں چہ ھمے مُلکاں سوال بکن ئے کہ پرچا شُماں پاکستان وڑیں رستریں مُلک ءَ برداشت کنگ ءَ اِنت؟-
اگاں ماں چہ روبرکتی مُلک ءَ اے جُست ءَ کُت نہ کنیں گُڑا ماں وتی سرمچاراں ھم اے جُست ءَ مکن ات یا مہ گُش ات کہ چے پیم جُھد کنگی انت؟-
سیاستدان یا کہ جُھدکارے اگاں وتی آپشن ءَ بند کنت بزاں سیاستدان ءُ جُھدکارے نہ اِنت ءُ مئے بلوچ یک جیڑہ اِیش انت کہ ماں ھرچ مسلہ ءِ سر ءَ دمان ءَ اسٹینڈ زیریں ءُ ناتپاکی ءِ سرھالے پیداک کن ایں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔