سَے سال ءِ سَپر سَربُلند اُرپ اُمر جان ءِ ھمراھی ءَ
نبشتہ کار: زُورین اسلم بلوچ
رجانک: شاکرشیخ
دی بلوچستان پوسٹ
ھَردیں اولی رَند ءَ سَربُلند ءَ من ءَ دیست گوں من دُچار کَپت مئِے ھَردُکانی سنگتی بُوّت آ سَکّیں زِیبائیں روچ اِت اَنت-
چیز ءِ وَھد ءِ گْوَزگ ءَ رَند سَربُلند جان ءَ من ءَ گُشت کہ سنگت من ءَ اُستاد اسلم گِندگی اِنت من گُشت پَرچا نَاں۔
سَے روچ ءَ رَند وَھد ءِ رَسَگ ءَ من اُستاد اسلم ءَ گُشت کہ ترا سنگتے گِندگ لوٹ اِیت گُڑا اُستاد ءَ من ءَ گْوشت سنگت ءَ توار کَن من ھم باز وَش بُوّت آں کہ اے وَڑیں مَزَنیں ھَستی ءَ گْوشت کہ سنگت ءَ گِنداں ۔
من تَچان ، تَچان ءَ سَربُلند ءِ کِرّ ءَ شُت آں ءُ گُشت ترا اُستاد اسلم توار ءَ اِنت گِندگ ءِ واست ءَ گُڑا سَربُلند جان باز گَل بُوّت ءُ بچکَندگ ءِ جَت ئِے منی ھمراھی ءَ رَھادگ بُوّت ۔
ما جنرل اسلم ءِ کِرّ ءَ سَر بُوّتاں گُڑا سَربُلند ءُ اُستاد اسلم ءِ دیدار بِنا بُوّت تنزیم ءِ راز داری ءِ ھساب ءَ اے ھَردُکانی گَپّ ءُ تران بُوّتاں سَے گھنٹہ ءَ رَند سنگت بابر مجید ءَ اُستاد اسلم ءَ توار کُرت ءُ گْوشت کہ مَروچی ءَ رَند اے سنگت مئِے ھمراھی ءَ بیِت گوں ءُ اِیشی ءِ ھیال ءَ بِدَار اِت ءُ پَد ءَ اُمر جان ءَ جنرل اُستاد اسلم رُکست کُرت ءُ رَھادگ بُوّت ۔
دومی روچ ءِ سَے ءُ نیم ءِ وَھد اَت کہ جنرل اسلم ءُ آئی ءِ ھمراھانی سَر ءَ دُژمن ءَ اُرش کُرت اُستاد اسلم ءُ آئی ءِ ھمراہ چَہ بالاد ءِ ھساب ءَ مارا چے جِتا بُوّت اَنت۔
دو روچ ءَ رَند من اُمرجان ءَ یک زمہ داریں سنگتے ءَ گوں دُچار کَپائینت ءُ سنگت ءَ را گْوشت کہ اُستاد ءَ گُشتگ اے سنگت ءِ ھیال ءَ بِدَار اِت ءُ اے ھم من گْوشت کہ مَروچی ءَ رَند اے سنگت مئِے ھمراھی ءَ بیت گوں ۔
ھمئِے وَڑ ءَ رَوَان ، رَوَان ءَ اُمر جان ءَ وتی پیسلہ کُرت ءُ اُمر جان وتی پیسلہ ءِ سَر ءَ مُھکم اَت ءُ اوشتاتگ اَت ءُ آئی ءِ دیم ءِ سَر ءَ ھَر وَھد ءَ بچکندگ اَت گوں سنگتاں اَنچو دُچار کَپت گُش ئِے ھَردئِے جَمبر ءِ وَھد ءَ زَمین گَل بیت اُمر جان ءِ دیم ءَ ھما زِیبائی اَت ۔
سنگت اُمر جان ءَ مئِے ھمراھی ءَ سَے سال گْوَزِینت سنگت ءِ ھَر گَپّ یات کئیت اِیں برے ، برے من سنگت اُمرجان ءَ سَکّ یات کَن آں ءُ دل بے تائیر بیت ۔
اُمر جان ءِ بچکندگ ءُ وَش تَبّی من ءَ بِہ نِزوری ءَ نئیل اَنت سنگت ءَ مارا ھمت ءُ ھوسلہ بکشات ءَ ءُ ھَر بلوچ وَرنایانی واستا یک پیگامے ایرے کُرت ءُ گُشت ئِے من جِند نَدْری ریھان ءِ تُوپک رَکّینت ءُ آؤکیں وَرناہ منی تُوپک ءَ بِہ رَکّین آں ۔
لَھتے ماہ ءِ واستا اُمر جان ءِ گون ءَ منی دُوری بُوّت آ وتی کار ءِ تیاری ءَ کَنگ ءَ اَت مارا تنزیم ءِ راز داری ءِ ھوالہ ءَ ھچ سَرپدی نیست اَت کہ اُمر جان ءَ پیسلہ کُرتگ یک روچے من ءَ میسجے اَتک من میسج وَنت آ میسج منی زِیبائیں سنگت اُمر جان اَت من اُمر جان ءَ گِندگ ءِ گُشت من ساری گِندگ ءِ واست ءَ بے تائیر اِت اَنت گُڑا آئی ءَ گُشت کہ من تئی گون ءَ اَنّی گِند ءُ دیدار کُرت نَہ کَن آں بَلَے من آئی ءِ گِندگ ءِ واست ءَ سَکّ ءَ بے چاڑ اِت اَنت آئی ءَ گُشت من دُچار کَپ آں گوں تو ۔
کَمّیں کاراں دَز گَٹّ آں ءُ پَد ءَ رُکست اَف اَوارُن گُشت ئِے من ھم گُشت سنگت اَوارُن ۔
من پُوہ نَہ اِت آں کہ ھمئِے روچ ءَ چے اُمر جان ءِ نمبر بَند بُوّت چیزے روچ ءَ بے تائیری یے سَما بُوّھگ ءَ اَت ھچ سمج ءَ پیداک نیاَتَک کہ اے بے تائیری چے وجہ ءَ بُوّت کَنت بس من وتی موبائل ءَ چارگ ءَ اِت آں گُڑا اَناگہ ءَ من اُمر جان ءِ ٹوئٹ دیست من چیزے دیر ءَ ھاموش بُوّت آں ءُ ھیران بُوّت آں ۔ رُکست اَف اَوارُن سنگت کُلّانی راہ ھمیش اِنت من ریھان جان ءِ تُوپک رَکّینت ءُ نمیران بُوّت آں من ءَ بیسَہ اِنت کہ منی تُوپک ءَ منی آؤکیں وَرناہ زَنگ کَپگ ءَ نئیل اَنت ۔
سنگت اُمر جان ءِ واست ءَ منی نَدْ ءُ منی توک ءَ ھنچوک مُھکمی نیست کہ سنگت ءِ کُربانی ءُ شھادت ءِ سَر ءَ نِبشتہ کُرت بِہ کَن آں انُوں ھم منی دَست دْرَھَگ ءَ اَنت من ءَ بَکش ءَ کَن سنگت من تئی واست ءَ ھچ نِبشتہ کُرت نَہ کُت تو زندگ ئِے ءُ ھَر وَھد ءَ زندگ بہ ایں ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔