اِزم ءِ زیراپیں اِستان- سیپ بلوچ

اِزم ءِ زیراپیں اِستان

نبشتہ کار: سیپ بلوچ

دی بلوچستان پوسٹ

آئی ءَ اکسکاری ءِ هنچیں شوکے اَت کہ ابید ءِ اکس ءِ ندارگ کشی ءَ دگہ هچ پیمیں جیڑهانی سر ءَ گپ ئِے نہ کُت دائم کہ گِندُکی نیادے ءَ سرکپتی ماں اوتاک ءَ اتک گڑا کسہ اکسکاری ئیگ اَت ، اکسانی زیبائیاں هنچو کمار کتگ اَت کہ اکسانی میان ءَ زندگی ءِ زر ءِ چولان گوں رکس ءَ ات ، هرچ وهد کہ دامگ ءَ اتک درستاں ساری اکسانی لڑے دیم ءِ دات کہ پچار کجام اکس زیبا اِنت ، آئی ءِ اکساں من ءَ بازیں چم ندیستگیں ندارگ پیشداشت جنگل ءُ کوه درچک ءُ دار پل ءُ گواڑگ هرچ هما زیبائی کہ استان ءَ هست ات آئی ءَ وتی اندر ءَ کید ءِ کُتگ ات اَنت-

یکروچے کہ سستگیں سواساں گوں منی اوتاک ءَ اتک پاد ءَ پُچّے بستگ اَت ئِے ءُ هون ءُ هون ریچ اَت همے کہ منی چم کپت من جست کُت کہ باریں چوں گوبز ءَ وارتگ، یا دگہ ویلے ءَ گپتگ ، گوں بچکندیں لُنٹاں دراهینت ئِے کہ من آسکے ءِ رند ءَ کپتگاں کہ اکس ءَ ئِے کش آں سنگے ءَ لترینت کپتاں پاد زیمیگ بوت ، داں بچکندگ ءَ لگ اِت ما دوئیناں داں دیراں بچکند اِت بلے گپے هما ات کہ اے بری بڈے ندارگ گوں پہ ترا جتا جتائیں ساهدار ءُ رسترانی اکس ات اَنت ، آئی ءِ اکسکاری ءِ مستریں زیبائی ایش اَت کہ وهدے اکسے کش ات ئِے اکسے ءِ سر ءَ الم نبشتہ ئِے کُت کہ چے یے بلے یک گپے هست ات ئِے کہ من وتی اکسکاں شنگ کنگ نہ لوٹ آں
انسٹگرام ءُ پیسبک ءَ وهد وهد ءِ سر ءَ اتک بلے اکس ئِے نہ دات اَنت-

یکروچے کہ دامگ ءَ اتکگ اَت گڑا من جست کت کہ یار تو وتی اکساں چے ءَ دامگ ءَ ایر نہ کن ئے کمو بے تواری ءَ رند دراهینت ئِے انوں گلامی ءَ هچ چیز ءَ بستار نیست من هما وهد ءَ وتی اکساں دیم ءَ کاراں داں بنی آدم ءُ اکساں دوئیناں بستار بہ بیت، بلے آئی ءِ کیمره ءِ کش اتگیں تامر همک وهد راجے دیم ءَ اِت اَنت بلے هرکس تامرے ندارگ چار ات بلے کہ اے گپ کس ءَ نہ کُت کہ اے چونیں اکسکارے بس همے گپ ءَ دل ءَ آؤرتگ اَت ئِے-

مدتے گوستگ اَت کہ هچ هال ئِے نیست اَت باریں کجا اَت من ءَ نوں زهیر کنگ ءَ ات پہ آئی ءِ جند ءُ استان ءِ ندارگاں ، من پیسبک ءَ ندارگ کنگ ءَ اِت آں داں جندے اکسے منی دیم ءَ کپت سینگ ئِے چاک چاک اَت ءُ کیمرهے چُنڈ چُنڈ اَت کِرّ ءَ ئِے کپتگ اَت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔