چیز دوبر جیڑگی اِنت – سازبان بلوچ

چیز دوبر جیڑگی اَنت

نبشتہ کار: سازبان بلوچ

دی بلوچستان پوسٹ

بلوچ سرڈگار ءَ بازیں جنگے دیستگ ءُ بازیں سرئِے ببا داتگ۔ محراب ھان ءَ بگر داں بالاچ ءَ چیئرمین گلام مھمد ءَ بگر داں ڈاکٹر منان ءَ، بانک کریمہ ءَ بگر داں شاری ءُ سمل ءَ، بلوچ سرڈگار ءَ دنیگا ھزاراں راج پھازیں سر  ندریگ کتگ، ذاکر زاھد ءُ دین جان ءِ وڑیں ھزاراں زندانی اَنت۔

“داں  آزات  اِنت  تئی  درد  وتن”
“زندان ءِ  تہ ءَ زندان  پْرش اَنت”

بلئے بژن ءِ ھبرے کہ دنیگا مئے تہ ءَ بازینے انچو بے سما اِنت کہ گش ئے زاناں ھچ بوھگ ءَ نہ اِنت۔ آ نہ زان اَنت کہ آیانی بے تواری آیاں چہ دژمن ءِ گزب ءَ نہ رکّین ایت۔ ھمے بے تواری ءِ سَوَب اِنت کہ بازیں کسہ اندیم بیتگ اَنت۔ بازیں کسھاں زبان نہ رس ایت۔ بس لھتے کِسہ نبشتہ بیت ، لھتے کِسہ اندیم بیت۔

بودناک ءُ زندگیں مھلوک ءِ چم بید ء ریا ءُ روہ ءَ مدام وتی ڈیھ ءَ سکّ بنت کہ باریں کسے منی ھاک ءَ بدیں چمے چارگ اِنت؟ کسے منی پسگاں بیگواہ کنگ ءُ کشگ ءَ اِنت۔ پرچا کہ راجی جنز انچیں جنزے کہ بید ء مھکمیں پالیسی ءُ ھورت چاری ءَ کنگ نہ بیت۔ واجہ صبا ءَ راست گْوشتگ-

“منی دستبندی ھمیش انت کہ ڈنّی ادارھانی سر ءَ زار جنگ یا فریاد کنگ ءَ چہ ھزار درجہ گھتر انت کہ تو وتی پولیٹیکل ھیسیت ءَ بمنائین. آزاتی ھم ترا وتی پولیٹیکل ھیسیت ءُ جد ءُ جھد ءِ ھیسیت ءِ سر ءَ رس ایت ءُ ھیومن رائٹس والا ہńھم ترا ھم ھما وھد ءَ اھمیت دئینت کہ تئی یک سیاسی “کیپیسٹی” یے جوڑ بہ بیت”-

مرچی سرکار ءَ تھنا تئی زمین نہ برتگ۔ تئی زبان ھم ولگوج کتگ۔ تئی دودمان ھم دست جتگ۔ تئی پتّر ھم۔گْوات ءَ داتگ۔ گڑا لازم اِنت کہ مرچی بلوچ گلامی ءِ مانا ءَ مستریں کانٹکسٹے ءَ بہ زوریت۔ آ بہ زانت کہ اے جنگ وجود ءِ جنگ اِنت۔

اژدری اِنت کہ مرچی بلوچ وتی نزوریاں بہ منّیت ءُ وتی پالیسیاں مھکم تِر بہ کنت۔ پہ اے جنگ ءَ بلوچ ءَ بے کساس ھون ءُ ھید ریتکگ۔ بے کساس سر ببا داتگ۔ پند برّ اتگ۔ باید نہ اِنت کہ مئے نابودی اے سپر ءَ بے آسر بہ کنت۔

اے جھد سرجمیں بلوچ ءِ جھد اِنت۔ بیا اِت اے گرانیں ساھتاں یک مشت بیں ءُ وتی پتّر ءَ یک کنیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔