کیچ ءُ آواران ءَ زُل خان ءُ مجید ءِ کوش ءِ زمّہ واری بی ایل ایف ءَ منّ اِتگ انت

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب ” ءَ شنگ کرتگیں درشان ءِ تہ ءَ آواران ءِ دمگ جھاؤ ءَ مجید ء عطا محمد ءُ کیچ ءِ بنجاھی شھر تربت ءَ زُل خان ء نور احمد ءِ کوش ءِ زمہ واری منّ اِتگ ءُ گوشتگ کہ اے ھردو ریاستی چاریگ بوتگ انت –

بی ایل ایف ءِ جارکش میجر گوھرام بلوچ ءِ رِد ءَ کیچ ءِ بنجاھی شھر تربت آپسر ءَ چار جولائی ءِ شپ ءَ انٹلی جنس بیسڈ آپریشن (آئی بی او) ءَ زورگیریں پوج ءِ جوڈ کرتگیں کشندہ ٹولی ءِ کارمند زُل خان ء نور احمد جھمنند شاپک تیر آماچ کتگ ءُ کشتگ ءُ آئی ءِ سِی تیری توپک دستیگ کتگ –

جارکش ءِ رِد ءَ راجی کتکار زُل خان ء نور احمد آئی ایس آئی مزنیں کارمندے بوتگ کہ پوج ءِ گوشگ ءِ پد ءَ تربت، شاپک، سامی ءُ کش گوری ھند ءُ دمگاں بلوچانی نمیرانی، آوار جنی ءَ ھوار چادر ءُ چاردیوالی لگتمالی ءَ ھوار ءَ بوتگ اشی ءَ اھوار ھوار آ بلوچ سرمچارانی بگیری ءَ پوجی لشکر کشیاں ھوار بوتگ –

جارکش ءِ رِد ءَ آئی ءَ سال دوھزار ھبدہ ءِ دسمبر ماہ ءَ سامی سرمچارانی سر ءَ اُرش کتگ کہ یک سنگت ءِ زدگ بوتگ، سال دوھزار ھژدہ ءِ اپریل ماہ ءَ سامی عومری کھن ءَ سنگتانی نمیرانی ءَ آئی ءِ دست تچکی ءَ مان بوتگ – ھمے وڈ ھمے سال دوھزار بیست ءُ سَے ءِ بیست ءُ ھپت فروری ءِ بیڑ ءَ وتی کشندھ ٹولیانی ھمراھی ءَ گون بوتگ کہ اودا دو سرمچار نمیرانیں یحییٰ ءُ نمیرانیں شعیب نمیران بوتگ انت – اشی ءَ ابید اے مرد ءَ گوادر ءَ دو بلوچ زالبول جست ءُ پرس ءِ نام ءَ آوار جتگ انت زورانسری آوار جنگ بوتگیں مردمانی کھولاں ترسینگ ءُ بیگواھیں مردمانی کوشگ ءِ بیھار داتگ انت –

میجر ءِ رِد ءَ اے مرد زورگیریں پوج ءِ ھمراہ بوگ ءُ بلوچ راج ءِ سر ءَ زوراکی، چاگردی سلکاریاں ھوار بوگ ءُ چاریگی ءِ جرم ءَ مئے نشانگ ءَ بوتگ کہ گوستگیں شپ ءَ بی ایل ایف ءِ سرمچاراں انٹلی جنس بیسڈ آپریشن کنان ءَ تیرگواری کتگ ءُ مرگ ءِ سزا داتگ ءُ آئی سِی تیری توپک ھم دستیگ کتگ –

بی ایل ایف ءِ جارکش میجر گوھرام بلوچ ءِ رِد ءَ بلوچستان لبریشن فرنٹ ریاستی چاریگ زل خان ءِ کوش ءِ زمّہ واری ءَ منیت ءُ ریاستی زوراکیاں ھواریں ءُ راجی آجوئی جھد ءِ اڈاند پیداک کنوک ھچبر پھل کنگ نہ بنت –

بی ایل ایف ءِ جارکش میجر گھرام بلوچ ءَ وتی دگہ درشانے ءِ تہ ءَ جھاؤ ءَ مجید نامیں ریاستی چاریگے ءِ دزگیری ءُ پدا کوش ءِ زمہ واری منّ اِتگ ءُ گوشتگ کہ بی ایل ایف ءِ سرمچاراں آواران ءَ مجید نامیں ریاستی چاریگے دزگیر کرتگ جُست ءُ پرس ءَ میارباری ءِ منّگ ءَ پد مرگ ءِ سزا داتگ –

جارکش ءِ رِد ءَ سرمچاراں مجید ء عطا محمد جھمنند جھاؤ سوڑ ءَ بیست ءُ شش جون ءَ دزگیر کرتگ دزگیری ءِ وھد ءَ آئی ءَ وتی میارباری منّ اِتگ ءُ گوشتگ کہ آ چہ دوھزار ھبدہ ءَ پاکستانی پوج ءِ چاریگ اِنت ءُ آئی ءَ سرمچار ءُ آیانی ڈوارانی پیشدارگ، لشکرکشی، بلوچانی آوار جنگ ءُ آیانی کشگ ءِ وڑیں ناھکیں میارباریاں پاکستانی پوج کمک کرتگ- اے وھد ءَ آئی جھاؤ ءُ کِر ءُ کشاں یک کشندہ ٹولی یے برجاہ داشتگ ایشی ءِ سروکی ءَ وتگڑیں بلوچستان ءِ مزن وزیر ءِ برات جمیل بزنجو کنگ ءَ اِنت –

جارکش ءِ رِد ءَ پاکستانی پوج بلوچستان ءَ جنگی میارباری، مردمی اگبالانی لپاشگ ءُ بلوچ چکچینی کنگ ءَ اِنت۔ ھمے ناھکیں میارباریاں پاکستانی پوج ءِ کمک کنگ ءِ میار ءَ مجید دزگیر کرتگ ءُ میارباری ءِ منّگ ءَ پد مرگ ءِ سزا داتگ ءُ گوستگیں شپ ءَ جاؤ ءِ گوھری ءَ آ تیر آماچ کتگ ءُ کشتگ –