شال: پولیس کارمنداں ھوار نوزدہ مردم آوار جنگ بوتگ انت

بلوچستان ءِ بنجاھی شھر شال ءِ نزیکیں دمگے ءَ ناشناسیں مردماں پولیس کارمنداں ھوار نوزدہ مردم آوار جتگ انت –

ٹی بی پی ءِ اھوالکار ءِ رِد ءَ شال ءِ نزیکیں دمگ زرغون ءَ ولی تنگ ءِ ھند ءَ سلاہ بندیں مردماں پکنک ءَ شُتگیں نوزدہ مردم دزگیر کتگ انت کہ آھانی تہ ءَ دو پولیس کارمند ھم ھوار بوتگ انت –

ھالانی رِد ءَ اے مردم کم چہ کم سَے ادار ءَ دارگ بوتگ انت ءُ پدا رند ءَ آھانی تہ ءَ ھبدہ مردم سلاہ بنداں یل داتگ انت ءُ دو پولیس کارمند ہیڈ کانسیٹل غلام نبی ءُ ہیڈ کانسٹیبل محمد کاظم گوں وت برتگ انت –

دزگیری ءَ پد یل بوتگیں مردم ھزارہ برادری سیادی دار انت – تنی وھدی اے مردم گپ ءُ ھبر دیم ءَ نہ اتکگ انت کہ کجام سوب ءَ گرگ بوتگ انت وھدیکہ واکدارانی نیمگ ءَ ھم اے درگت ءَ ھچ وڈیں ھال شنگ کنگ نہ بوتگ –

شال ءَ گوستگیں دو روچانی میان ءَ اے دومی وئیل انت – گوستگیں روچ ءَ زرغون ءِ دمگ شابان ءَ ھم مزنیں کچے ءَ سلاہ بندیں مردماں پکنک جاہ ءَ شُتگ ءُ مردم جست پُرس کتگ انت وھدیکہ چہ اودا پنجاپ ءِ دمگ ملتان ءَ سیادی داروکیں محمد نادر ء عبدالمجید دزگیر کتگ ءُ گوں وت برتگ –

گوستگیں روچ ءَ بوتگیں دزگیری ءِ زمہ داری بلوچ لبریشن آرمی ءَ منّ اِتگ – جارکش ءِ رِد ءَ بی ایل اے ءِ سرمچاراں بیڑ برتگ ءُ پنجاپ ءِ دمگ ملتان ءِ شکئیں مردمے دزگیر کتگ ـ اے مرد بی ایل اے ءِ گور انت ءُ اشی ءِ جست ءُ پُرس برجاہ انت –

چدوپیش گوستگیں روچاں زیارت ءِ دمگ منگی ڈیم ءَھم سلاہ بندیں مردماں رحیم یار خان ءِ جھمنند سعید دزگیر کتگ ءُ آئی ءِ زمّہ واری ھم بی ایل اے ءَ منّ اِتگ –

بلے مروچی پولیس کارمندانی دزگیری ءِ زمہ واری ھچ گل ءَ نہ منّ اِتگ –