بلوچستان ءَ جتا جتائیں وئیلاں زالبولے ءَ ھوار چار مردم بیران، بازینے زدگ بوتگ انت

ھالانی رِد ءَ تربت تاں گوادر ءَ رؤکیں پک اپ گاڑی کارواٹ گوادر ءَ ٹیر ءِ پنچر بوگ ءِ سوب ءَ چپی بوتگ –

وئیل ءَ یک زالبولے بیران بوتگ وھدیکہ سَے زالبولاں ھوار بازیں زھگے سک باز زدگ بوتگ انت – زدگ بوتگیں مردم گوادر ءِ انڈس نادراھجاہ ءَ برگ بوتگ انت –

وھدیکہ مزنیں ائید ءِ روچانی تہ ءَ بلوچستان ءِ جتا جتائیں ھند ءُ دمگاں دگانی وئیل بوتگ انت زھگ ءُ زالبولانی بیرانی ھال انت –

ھب ءَ جتائیں وئیلاں دو مردم بیران ءُ یک زھگے ءَ ھوار سَے مردم زدگ بوتگ انت –

ھب کئور ءَ جان شودگے میان ءَ دو مردم بُک اِتگ ءُ بیران بوتگ انت، ایدھی بحری ریسکیو ءَ جون چہ آپ ءِ تہ ءَ در کتگ ءُ نادراھجاہ ءَ برتگ انت کہ اودا اژدری چار ءُٹپاس ءَ پد جون کھول ءِ دست ءَ دیگ بوتگ انت – ھب کئور ءَ جان شودگے میان ءَ بیران بوتگیں مردمانی پجار عجب خان ء ریحان ءُ بیست ءُ شش سالی عبدالوہاب ء محمد موسی ءِ ناماں بوتگ انت –

ایدھی بنشون ءِ رِد ءَ ھب کئور ءَ جان شودگ ءِ میان ءَ یک دگہ مردمے بُک اِتگ بلے بحری ٹولی ءَ ھما دمان ءَ آ در کُتگ چہ مرگ ءَ رکیں اِتگ –

دگہ وئیلے دریجی ءَ دیم ءَ اتکگ کہ چہ ھب ءَ آؤکیں گاڑی ءِ تیز رؤگے سوب ءَ ڈرائیور ءَ داشت نہ کُتگ ءُ آ نورانی کراس ءُ لنگ لوہار ءِ میان ءَ حاجی ہوٹل ءَ چپی بوتگ چریشی ءَ گاڑی ءَ سواریں یک زھگے ءَ.ھوار سَے مردم ھاجی چاکر خان رند، علی حسن مری ءُ غفور رند زدگ بوتگ انت کہ ھما دمان ھب نادراھجاہ ءَ برگ بوتگ انت – ھالانی رِد ءَ ھچ وڈیں جانی تاوان نہ بوتگ –

اشاں ابید مزنیں ائید ءِ روچانی تہ ءَ ھزدار ءَ بازیں دگ ءِ وئیلاں دو ورنا بیران وھدیکہ بازیں ورنایے زدگ بوتگ انت –

گیشیں ھالانی رِد ءَ مزنیں ائید ءِ موکلاں ھزدار ءُ کش گوری ھند ءُ دمگاں دگ ءِ وئیلاں دو ورنا بیران بوتگ انت وھدیکہ بازیں وئیلاں دگہ بازیں ورنایے زدگ بوتگ انت –

اولی وئیل دراکھالہ ءَ گاڑی ءِ ڈیکر کنگ ءَ ھشت سالی جواد احمد ء خدابخش لانگو ھما دمان ءَ بیران بوتگ وھدیکہ دومی وئیل زیدی دگ ءَ ویگو گاڑی ءَ پرپٹ ءِ ڈیکر کتگ چریشی ءَ شاہد احمد موسیانی بیران بوتگ – اشاں ابید بازیں شوبازی کنوکیں ورنا پرپٹ ءَ یک ٹیر ءَ چلائینگے سوب ءَ وئیلے آماچ بوتگ انت – زانگ بہ بیت یک ٹیر ءَ پرپٹ چلائینوکیں ورنا آدینگ ءِ روچ ءَ وئیل ءِ آماچ بوتگ انت –