تربت ءَ بوتگیں پدائی اُرش ءِ تامر شنگ بوتگ ، میجر ءُ برگیڈیئرے ءِ مرگ ءُ زدگ بوگ ءِ ھال

گوستگیں ماہ ءِ بیست ءُ چار جون ءَ تربت ءَ پاکستانی پوج ءِ “ہائی ویلیو ” کاروان ءَ نشانگ کنوکیں زالبول پدائی سُمیہ ءِ اُرش ءِ سی سی ٹی وی تامر شنگ بوتگ –

شمبے ءِ روچ ءَ تربت ءَ بلوچ لبریشن آرمی ءِ پدائی اُرش ءَ پاکستانی پوج ءِ ادارھانی یک بریگیڈئیر ءُ میجرے ءِ مرگ ءُ زدگ بوگ ءِ ھم ھال انت –

سی سی ٹی وی تامر ءِ تہ ءَ گندگ بیت کہ زالبول ءَ آیگ ءَ انت ءُ کمے ودار کنت –

وھدیکہ ایف سی ءِ اولی گاڑی کہ آئی ءَ پاسپان سوار انت آ گوزیت ءُ آئی ءِ گوزگ ءَ پد آپسرانی دو گاڑی کئیت کہ زالبول آھانی تہ ءَ اولی ءَ وتی نشانگ کنت –

تامرے تہ ءَ گندگ بیت کہ اولی گاڑی ءِ گوزگ ءَ پد جند ندری کنوکیں اُرشکار کمے اوشتیت تانکہ دومی گاڑی نزیک ءَ بہ ایت چوشکہ کہ ھمے آئی ءَ نشانگ کنگی انت –

ھمے وڈ اے سی سی ٹی وی تامرے تہ ءَ پولیس ءِ کاروان ھم گندگ بیت کہ دگ ءِ دومی نیمگ ءَ گوزگ ءَ انت –

چم دیستیں گواھانی رِد ءَ اُرش ءَ پد ایف سی ءِ کارمنداں کورکاؤ تیر گواری ءَ یک پولیس کارمندے مرگ ءِ دیمپان بوتگ وھدیکہ نادراھجاہ ءِ رپورٹ ءِ رِد ءَبیران ءُ زدگ بوتگیں پولیس کارمنداں تیر لگ اِتگ بوتگ –

دومی نیمگ ءَ چہ بلوچستان ءَ سیادی داروکیں اھوالکار کیّا بلوچ ءَ اے گپ ءِ پدرائی کُتگ کہ پدائی اُرش ءِ نشانگ بریگیڈیئر عرفان بوتگ کہ آئی ءِ سیادی ملٹری انٹیلی جنس بزاں MI انت –

کیّا بلوچ ءِ رِد ءَ برگیڈیئر ءِ زدگ بوگ ءِ ھال انت ءُ میجر عبدالباسط نامی مردمے اے اُرش ءَ مرتگ –

زانگ بہ بیت اے اُرش ءِ درگت پاکستانی پوج ءِ نیمگ ءَ ھچ وڈیں ھال شنگ کنگ نہ بوتگ –

زانگ بہ بیت شمبے ءِ نیمروچ ءَ چاکر آعظم چار راہ تربت ءَ جند ندری کنوکیں زالبولے ءَ چیریں ادارھانی کارمندانی کاروان ءِ نشانگ کتگ –

اُرش ءِ زمہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ ءُگوشتگ کہ اُرش بی ایل اے مجید برگیڈ ءِ جند ندری کنوک سمیہ کلندرانی بلوچ ءَ کُتگ –

بی ایل اے ءِ جارکش جیئند بلوچ ءَ وتی درشان ءِ تہ ءَ گوشتگ کہ اے پدائی اُرش مجید برگیڈ ءِ شیرزالیں زالبول پدائی نمیرانیں سمیہ کلندرانی بلوچ پنام ءِ سمو ء عبید کلندرانی ءَ کُتگ – آئی ءَ رزاکاری مجید برگیڈ ءِ تہ ءَ کار کتگ ءُ مروچی دژمن ءِ سر ءَ سوبمندیں اُرش کُتگ ءُ وت ءَ بلوچ راجدپتر ءِ تاکانی تہ ءَ نمیران کتگ –

جارکش ءِ رِد ءَ بیست ءُ پنچ سالی سمیعہ کلندرانی اھوالکارے بوتگ آئی ءَ پنچ سالاں بلوچ لبریشن آرمی ءِ میڈیا ونگ ءِ تہ ءَ وتی پرز پیلو کتگ ءُ اے میان ءَ آئی ءَ بی ایل اے ءِ میڈیا ونگ ءِ مھکم کنگ ءُ آئی ءِ تالان کنگ ءَ وتی کرد پیلو کتگ –

زانگ بہ بیت بی ایل اے مجید برگیڈ ءِ اے دومی جند ندری کنوکیں بلوچ زالبول انت چدوپیسر چہ کیچ ءَ سیادی داروکیں شاری بلوچ ءَ کنفیوشس انسٹی ٹیوٹ ءِ چینی باسکانی کراچی شھدربر جاہ ءَ نشانگ کتگ انت –