مروچی ائید ءِ روچ ءَزورانسری آوارجنیانی بگیری ءَ شال ءُ گوادر ءَ زھرشانی

ھمک سال ءِ وڈا اے سال ءَ ھم زورانسری آوار جنی ءَ پد بیگواھیں مردمانی کھول وتی دوستیگیں مردمانی ھاتر ءَ ائید ءِ روچ ءَ زھرشانی کنگ ءَ انت –

اے سال ءَ ھم مزنیں ائید ءَ بیگواھیں مردمانی پانکجنیں گل وائس فار بلوچ مسنگ پرسنز ءِ چیردستی ءَ زورانسری آوار جنیانی بگیری ءَ ماں شال ءَ روانک کشگ بوتگ ءُ شال ءِ پریس کلب ءِ دیم ءَ زھرشانی کنگ بوتگ وھدیکہ گوادر ءَ ھم ھق دو تحریک ءُ بیگواھیں مردمانی کھولانی نیمگ ءَ زھرشانی ءُ روانک کشگ بوتگ –

زھرشانیاں بیگواھیں مردمانی کھولاں ھوار سیاسی پاٹی نودربر گلانی باسک ءُ ھر تک ءُ پھناتاں سیادی داروکیں مردماں بھر زرتگ، زھرشانی ءَ ھواریں درنگاز کنوکانی دست ءَ بیگواھیں مردمانی اکس ءُ پلے کارڈ بوتگ انت کہ آھانی سر ءَ بیگواھیں مردمانی یل کنگ، بلوچستان ءَ زورانسری آوار جنیانی گر ءُ دار ءُ دروگیں میڑانی بگیری ءَ نارہ نبشتگ بوتگ –

شال ءَ وائس فار بلوچ مسنگ پرسنز ءِ زھرشانی ءَ وی بی ایم پی، بیگواھیں مردمانی کھول، سیاسی پاٹی ءُ نودربر گلانی رھشوناں تران کتگ –

زھرشانی ءَ تران کنان ءَ درنگاز کنوکانی گوشگ ات کہ بیگواھیں مردمانی کھول وتی دوستیگیں مردمانی بازیں وھدے بیگواھیں ماژگی نادراہ جوڈ بوتگ انت دگہ مردم وتی کھولانی گوم ءَ ائید ءِ وشیاں شاتکامی کنگ ءَ انت ءُ بیگواھیں مردمانی کھول ائید ءِ وشیانی روچ ءَ شال ءُ ملک ءِ دگہ شھراں زھرشانی کنگ ءَ انت –

زھرشانی ءَ تران کنان ءَ بلوچ پیپلز کانگریس سرکماش ڈاکٹر حکیم بلوچ ءِ گوشگ ات گوستگیں ھپتاد ءُ پنچ سالاں کہ بلوچ وتی آجوئی ءُ ھکانی ھاتر ءَ جنگ کنگ ءَ انت نوں آ جنگ وتی گڈی ءَ سر بوتگ ریاست ءَ مدامی بلوچانی گوم ءَ دگا کُتگ، آغا عبدالکریم لوٹارینتگ ءُ ھمراھانی ھمراھی ءَ بندیگ کتگ – ھرکسے ءِ کہ اقتدار بوتگ بلوچانی گوم ءَ دگایے کتگ بلے روچ مروچی بلوچ ءَ وتی زرمبشت برجاہ داشتگ ءُ وتی منزلے سربوگ ءَ تاں وتی مولاں گوں بندوک بنت –

زھرشانی ءَ ھواریں بیگواھیں بلوچ نودربر رھشون زاکر مجید بلوچ ءِ مات ءِ گوشگ ات کہ مناں گوستگیں چاردہ سال بیت کہ وتی بیگواھیں زھگ ءِ ودار ءَ گمانی گس ءِ بستگ ءُ نشتگاں مروچی ھنچوش کہ اے ریاست مئے ماتانی زھگاں آوار جنگ ءُ مئے سر ءَ زوراکی کنگ ءَ انت یک روچے کئیت کہ ریاست وت ھمے زوراکیانی دیمپانی ءَ کنت گڈا آ سرپد بیت –

چہ شال ءَ زورانسری آوار جنگ بوتگیں ظہور احمد ءُ سجاد علی ءِ گھار سعیدہ بلوچ ءَ گوشتگ کہ زھگ منگلیک زور انت شاتکامی کن انت بلے سمی ءُ سائرہ بینر جوڈ کن انت ءُ وتی دوستیگین مردمانی ھاتر ءَ دگانی سر ءَ کائنت ءُ ائید کن انت – تو جست کنے کہ شاری ءُ سمیہ ءَ کئے بوتگ انت گڈا آ مئے وڈیں گھار بوتگ انت کہ ریاست ءَ آ ھمے وڈ لاچار کتگ انت کہ آ وتی جان ءِ دیمھونی دیگ ءَ پدکنز نہ بوتگ انت –

زھرشانی روانک ءَ بیگواھیں جہانزیب بلوچ ءِ مات ءِ گوشگ ات کہ مناں گوستگیں ھشت سال انت کہ وتی زھگ ءِ یل کنائینگے ھاتر ءَ وتی پریات زرتگ ءُ آمیدگس ءُ کمیشناں ھوار ھر جاہ شتگاں بلے ھچ کجا مئے گوشداروک نیست، پہ بلوچ ءَ اے ملک ءِ تہ ءَ ھچ نیست بید چہ ھمے بیگواھیں مردمانی کھولاں کہ کراچی ءُ شال ءِ شھدگانی سر ءَ انت –

بیگواھیں راشد لانگو ءِ گھار ءَ گوشتگ کہ اگاں مروچی اے اکس مہ بوتیناں ما وتی براتانی دیم شمشتگ ات –

مزنیں ائید ءِ روچ ءَ بلوچستان ءِ ایندگہ دمگاں ھوار بلوچستان ءِ تیاب دپی دمگ گوادر ءَ ھم بیگواھیں مردمانی کھولاں ھک دو تحریک ءِ ھمراھی ءَ رونک ءُ زھرشانی کتگ – زھرشانی ءَ بیگواھیں مردمانی یل کنگ ءُ آھانی کھولاں چہ اے ازاب ءَ رکینگے لوٹ کنگ بوتگ –

گوادر ءِ زھرشانی ءَ ترانکارانی گوشگ ات کہ اگاں زورانسری آوار جنگ بوتگیں مردم اے ریاست ءِ مجرم انت گڈا کانود ءِ رِد ءَ آھاں پولیس دزگیر بہ کنت اے وڈ دزانی وڈا آوار جنی ءِ موکل ءَ ھچ وڈیں کانود نہ دنت –

آھانی گوشگ ات کہ ما دیمروئی ءِ بگیردار نہ انت بلے ھما سی پیک کہ مئے زھگانی جونانی سر ءَ جوڈ کنگ بوگ ءَ انت آ ھچ وڈا منگ نہ بیت انت –

گوادر ءِ زھرشانی ءَ پوج ءِ دست ءَ آوار جنگ بوتگیں عظیم دوست بلوچ، بولان کریم، نسیم بلوچ ءَ ھوار دگہ زورانسری آوار جنگ بوتگیں مردمانی کھولاں ھوار سیاسی پاٹی ءُ ھرتک ءُ پھناتاں سیادی داروکیں رھشون ءُ زھگ ءُ زالبولاں مزنیں کچے ءَ بھر زرتگ –