اَئید ءِ روچ ءُ بلوچ راج – ماہ بی بی بلوچ

اَئید ءِ روچ ءُ بلوچ راج

ماہ بی بی بلوچ

دی بلوچستان پوسٹ

اَئید ءِ روچ دْرستیں دگنیا ءِ واستا وشی ءِ روچ گُشگ بیت اِنت اے روچ ءَ مردم پہ گل ءُ شادانی گْوازینت نوکیں گُد ءُ پُچ پِر کن اَنت یکے دومی ءِ لوگ ءَ رو انت ءُ پکنک ءُ سیل ءُ سواد کن اَنت –

اَئید ءِ شاداهانی روچ سال ءِ تہ ءَ دو رند ءَ کئیت اِنت، سرجمیں دگنیا سالے دو رند ءَ اَئید کنت کسانیں اَئید بزاں عیدالفطر ءُ مزنیں ائید عیدالاضحی ءِ روچاں دْرستیں دگنیا ءِ وشی ءِ روچ گُشگ بنت بلے ھمے دگنیا ءِ تہ ءَ یک راجے کہ بلوچ گُشگ بیت اے راج ءِ واستا اے روچ گیش آزارانی دیمپانی ءِ روچ اِنت پرچہ کہ بلوچ یک گُلامیں راجے گُلامیں ءُ ایردستیں بلوچ راج ءَ زورگیریں ریاست اَئید ءِ روچ ءَ اَئید ءِ سوگات ءَ آیانی گار ءُ بیگوائیں مردمانی چکاریں کُنٹ آں(لاشیں) دنت سی ٹی ڈی ءِ دابیں ادارہ ردیں میڑ بزاں پیک انکاوٹر ءِ نام ءَ بلوچ ماتانی تاسُپیں بچانی لاش ءَ اَئید ءِ روچ ءَ سوگات کنت چْکانی پت ءِ کُنٹ(لاش) ءَ سوگات کنت ھما چُک کہ سالانی سال نِشتگ ءُ ودار ءَ اَنت وتی پت ءِ کہ منی پِت کدی آجو بیت ءُ گِس ءَ واتریت ، مات وتی بچ ءِ آجوئی ءِ وادار ءَ اِنت بلے اَئید ءِ روچ ءَ ریاست آئی ءِ دوستیگانی کُنٹ (لاش) ءَ سوگات کنت-

اَئید ءِ روچ ءَ بلوچ مات ءُ گْوهار وتی گار ءُ بیگواھیں کَس ءُ وارسانی آجوئی ءِ درگت ءَ دَگانی ءُ چار راهانی سرا اَنت اَئید ءِ روچ ءَ بلوچ مات ءَ وتی بیگواھیں بَچ ءِ اَئید ءِ گُد سواس گون اَنت ماں دَگانی سر ءَ نِشتگ ءُ ودار ءِ آس ءَ سُچگ ءَ اَنت کہ کَد بیت آئی ءِ بَچ آجو بیت او آئی ءِ گِس ءَ ھم ائید ءِ شادمانی مان اَنت-

اَئید ءِ روچ ءَ دْرستیں دگنیا ءِ جنکیں چُک وتی گُد ءُ پُچ چُوڑی ھِنّی ءَ گوں دز گٹ اَنت بلے بلوچ جنکو آں ءَ وتی گار ءُ بیگواھیں براتانی اَکس گون اَنت ءُ ودار اَنت کہ کدی آئی ءِ برات چہ زندان ءَ آجو بیت کدی بیت کہ آئی ءِ لالا کئیت ءُ آ ھم وتی اَئید ءِ پُچ آں پِر کنت اَئید ءِ روچ ءَ سمّی ءُ مھلب ءَ مروچی 14 پُریں سال بیت کہ وتی پیت ءِ اَکس گون اَنت ءُ دَگانی سرا نِشتگ اَنت مھلب ءِ کساں اُمبری ءَ بِگر تاں مروچی وتی ائید ءِ پُچ ایر کُتگ اَنت کدی آیانی ابّا کئیت ءُ آ گوں وتی ابّا اَئید بِہ کنت، ذاکر جان ءِ شیرزالیں مات مروچی چُنت سال بیت آئی ءَ وتی بَچ ءِ اَئید ءِ چَوِٹ ءُ گُد گون اَنت ءُ دَگانی سرا نِشتگ ءُ هَمُک ائید پہ وتی تاسُپیں چُک ءَ زهرشانی کنگ ءَ اِنت کہ آئی بچ یک روچے کئیت ءُ اے پُچاں پِرے کنت او چَوَٹاں پاد ءَ کنت زاہد جان ءِ سنگت مدام اَئید ءِ روچ ءَ دَگانی سرا ویل اَنت پہ زاہد جان آجوئی درگت ءَ زهرشانی روانک کَش اَنت ہمے ودار ءَ اَنت کہ کَد بیت زاہد جان کئیت ءُ آ گوں زاہد جان هوار اَئید کن اَنت نند ءُ نیاد کن اَنت مجلس ءُ دیوان کن اَنت شبیر جان ءِ لوگ بانُک مدام اَئید ءِ روچ ءَ دَگانی سرا نِشتگ ءُ شبیرجان ءِ آجوئی ءِ لوٹ ءَ کنت-

اے دْرستیں گپ ءَ چَہ یک جُستے چِست بیت کہ گُلام ءُ ایردستیں راج ءِ واستہ ائید بیت ؟ گُلامیں راج ھم اَئید کُ کنت؟ ءُ گُلام ءُ ایردستیں راج ءِ واستہ ءَ الّم ھم یک روچ ءِ کئیت کہ آ روچ ءَ گُلامیں راج ءِ اَئید ءِ روچ گُشگ بیت -آ روچ راجی آجوئی روچ بیت وھدے یک گُلامیں راجے آجو بیت آ وتی وت واجہ وت بیت آ وتی زمین وتی مال ءُ مڈّیانی واجہ وت بیت آئی ءِسرا دئیگے زورآور نہ بیت آ راج ءِ ورنا زندان ءَ بند نہ بنت ٹارچر سیل ءَ بند نہ بنت آ ہر وڑا آجو بیت ہمۓ روچ گُلامیں راج ءِ اَئید ءِ روچ گُشگ بیت ہمے روچ ءَ آ راج ءِ اَئید روچ ءَ پہ گَل ءُ شادانی کنت، ہمے وڑا بلوچ ءِ اَئید ھم ہما روچ کئیت کہ بلوچ راج آجو بیت بلوچ ءِ آجوئی پَد بلوچ ءِ ائید هم چو دریں راجانی وڈا سالے دو بر کئیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔