سمّو اِشک ءِ گوناب
نبشتہ کار منیر بلوچ
رَجانکار سمّاک مرید
دی بلوچستان پوسٹ
سمّو نامے نہ اِنت مھر ءِ چیدگے۔سمّو اِشک ءِ گوناب اِنت۔ سمّو ھرکجا کہ ودی بوتگ اود ءَ اِشک ءِ جزبھے زندگ کتگ، کوھلو ءِ سمّو مست توکلی ءِ دوستدار بہ بیت کہ خضدار ءِ سمّو بلوچستان ءِ آشِک کہ ہر وھد ءَ چو اشک ءِ گوناب ءَ یاد کنگ بیت اِنت۔
اشک جُھلانکیں مِھر ءِ نام انت کہ چار درجہ ءَ چہ گوزیت ءُ بے کِچھیں اِشک ءِ تہ ءَ پُتر ایت کہ اود ءَ آشِک دیوانگے جوڑ بیت ءُ ابید ء دوستدار ءَ آئی ءَ را ہچ یاد نہ بیت۔
سمّو ھم اِشک ءِ چاریں درجھاں شہ گوست ءُ بُندرین اشک ءِ تہ ءَ پُترت ءُ دائمی اِشک ءِ گوناب جوڑ بوت ءُ نمیران بوت۔
آ کجام جزبگ انت کہ آشِک ءَ را اِنچو مُھکم کنت کہ آ وتی دل ءُ دماگاں شہ دُرستیں شے آں کشّ ایت ءُ بس دوستدار ءِ یادانی تہ ءَ زندمان ءَ گوازین ایت؟ دوستدار ءِ آ کجام کِھیب اَنت کہ گوں وشّی ءَ جان ءَ شہ رَو اَنت؟
ما شیرین ءُ فرھاد، لیلیٰ ءُ مجنوں، سسّی ءُ پنّوں ءُ دگہ سک باز ھمے وڑیں کسّہ اِش کتگ کہ کسّے ءَ کوہ پُروشتگ ءُ شیر ءِ جوہ راہ کتگ، کسّے ءَ گرمیں رِیکاں سپر بُرّ اتگ ءُ مرچی مھر ءِ ھُدا گُشگ بنت۔ اے مُچّانی مول ءُ مراد بوتگ کہ وتی دوستدار ءَ گوں زند ءَ بِہ گوازیناں ءُ ھماوانی بَگل ءَ آیانی مَرگ بئیت بلے بیست ءُ یکُّمی کرن ءَ ءُ گلامیں زندمان ءَ اِشک ءِ مانا ءُ متلب ءُ مَکسد مٹّینتگ انت۔ مرچی سمّو ءُ شارل ءِ دور انت ،مرچی ریحان ءُ سربلند ءِ دور انت کہ گش انت مئے اِشک گوں زِمین ءَ انت ءُ ما لوٹاں کہ مئے دوستدار اے رَسترانی زندان ءَ چہ آجو بہ بیت ءُ مئے راج ھمے زِمین ءِ سرا آجوئیں زندگی یے بِہ گوازین ایت۔
وھدیکہ بنی آدم بے کچّہ ایں اِشک ءِ مِنزل ءَ داں سر بیت ءُ آئی ءَ را وتی دوستدار ءِ دیدار نسیب بیت گڑا آ سھت آئی ءِ یادگاریں سھتے بیت کہ آ اے سھت ءَ بِھ بے ھیال کُت نہ کنت۔ ھمے وڑیں مِھر بلوچستان ءِ بچّ ءُ جنکاناں گوں وتی زمین ءَ است ءُ مرچی اے مھر اِشک ءِ بے کچّہ ایں منزل ءَ داں سر بوتگ ءُ ھمے بُندریں اِشک آواناں ھر وڑیں دیمونیانی دیگ ءِ ھاترا ھر وھد ءَ جاڑی کنت۔
وتی زمین ءَ گوں مھر کدرتی چیزے ءُ اے کار ءَ را دارگ ءِ ھاترا کسّے وتی تاکت ءَ کارمرز بکنت ءُ تئی اولاداں بیگواہ بکنت، آواں شھید بکنت ، زالبول ءُ گونڈواں زھنی ءُ جانی لٹّ ءُ کُٹّاں گوں دارگ ءِ جُھد ءَ بکنت گڑا آ اوشتگ ءِ بدل ءَ بے کِچّھیں اِشک ءِ تہ ءَ مَٹ بیت ءُ بے کچّھیں اشک سمیعہ ءُ شاری ءِ وڑیں جنکاں ودی کنت۔
سمیعہ بلوچستان ءِ چُک بوتگ کہ آئی ءَ ھر درد ءَ را وتی جان ءُ رگانی تہ ءَ سما کرتگ ھما وھد ءَ کہ آ گونڈویے بوتگ آئی ءِ ناکوزتک ءُ کھول ءِ دگہ باز مردم بیگواہ کنگ بوتگ ،بازیں مردمے شھید کنگ بیت ءُ بازینے داں مرچی بیگواہ انت۔ اے وڑیں درد دژمن ءِ ھاترا نپرت وھدیکہ وتی راج ءِ ھاترا مھر ءِ جزبگ ءَ زوریت ءُ آگاہ بیت ءُ اے آگاھی دژمن ءَ را تباہ کنت ءُ یلہ دنت۔
سمیعہ کہ پگر ءُ شھزانت ءَ گوں ودی بوتگ آ پگر ءُ شھزانت اِشک ءِ بُندریں شھزانت انت کہ مئے راھشون ءُ نوکیں بلوچ سِلاہ بندیں جھد ءِ جوڑ کنوک استاد اسلم بلوچ ءِ پِگر ءُ شھزانتی انت، ھمے پگر ءُ شھزانت ءَ را گیش مُھکمی ریحان جان ءِ لبزاں ءُ کاراں داتگ۔ ریحان جان ءِ لبزاناں پِدائی سمیعہ چش بیان کنت کہ وھدے مئے زندگی ءِ درستاں چہ ارزشتداریں پیسلہ ءِ زورگ ءِ وھد اَھتگ ءُ اے مئے زندمان ءِ نوکیں بنداتے ءِ ساھت بوتگ ، اود ءَ ما سانگبندی ءَ گوں بندگ بوگ ءَ اتاں۔ مسترینانی ءُ بزرگانی پیسلہ ءَ شہ پد ریحان جان ءَ منی واھگ زانگ ءِ کوشست کرت ءُ گشت کہ من ترا گُشگ لوٹاں ءُ اے پدّر کنگ لوٹاں کہ ھما سپر ءَ ما دراتکگیں ، اود ءَ زندگ بوھگ ءِ من ھچ وڑیں سوگند نہ کناں ءُ ھر وھد ءَ تئی گوما بوھگ ءِ دروگیں مُساماں کرت نہ کناں ءُ بلکیں من ترا آ زندمان ءَ دات مَہ کناں کہ ھر یک لس مردمے ءَ را رس ایت پرچاکہ اے سَپر ءَ چو کہ یک سِپاہی ءُ وتن ءِ پھریزوک بلاھیں جنگے کنگ ءَ آں ، اود ءَ مَرگ مئے دُرستاں شہ نزّوک ایں سنگت انت۔ ءُ گُڈّی ءَ گشتے کہ اے درستاں چہ ابید اوں تو منی زندگی ءِ بَھر بوھگ لوٹ ئےِ؟ من کندگاں گوں درّائینت کہ چے تو بے ھیال بوتگے کہ مئے زندگی ءِ مَکسد یکّین انت؟ من ھم ھمے مَکسد ءِ بَھرے آں؟ ءُ اے کَسانُکیں زندگی ءَ یکّے دوئمی ءِ ہمسپر جوڑ بِہ بہ ایں؟
اے ھما لبزاں کہ ایشاں وتن ءِ ھر آشک کدی ھم بے ھیال نہ کنت ءُ اے راھ ءَ وتی زندگی ءَ چہ سرگوزیت ءُ یک اَسلی زندگی یے درگیجیت۔
چشکہ بلوچ راجدپتر ءَ سمّو یک راجدپتری نامے کہ مِھر ءِ چیدگ انت ءُ سمّو ءِ دیمونی دگہ سک باز سمّو ودی کنگ ءِ سوب جوڑ بیت کہ بُندری اِشک ءِ پِگر ءُ شھزانت ءِ سر ءَ اوشت انت وتی دوستداراں درگیج اَنت۔ بیست ءُ چار جون ءَ راجدپتری کسّہ ءِ بوھگ ءَ پد بھشت اوں شاتکامی ءِ شرپداری ءَ چہ شادان بوگ ءَ انت پرچاکہ بھشت ءَ وتن ءِ راستی ایں آشک استاد اسلم بلوچ ، شاری بلوچ ، ریحان بلوچ ءُ دگہ سمیعہ ءِ وشّاتکی ءَ کنگ ءَ اَنت ءُ آئی ءَ را مرادباتی دیگ ءَ انت کہ مرچی آ اِشک ءُ مِھر ءِ گوناب جوڑ بوتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔