ڈاکٹر دین محمد ءِ زورانسری بیگواھی ءِ چاردہ سال
ٹی بی پی شونگال
ڈاکٹر دین محمد بلوچ سیاسی باسکے ءَ اَت، گیر پارلیمانی ءُ آجوئی دوستیں سیاست ءِ پِڑا چئرمین غلام محمد ءِ ھمراہ ءُ بلوچ نیشنل موومنٹ ءِ سنٹرل کمیٹی ءِ باسک اَت بلوچ راجی اگبالانی جد ءُ جھد ءَ گوں بندوک بیتگ۔ پاکستان ءِ پوجی ادارگاں مشرف ءِ پوجی زورشاھی ءَ بگر داں مروچیگیں جمھوری اھد ءَ بلوچ راجی اگبالانی جُنز ءَ گوں بندوکیں ھزارانی کچ ءَ باسک زورانسری بیگواہ کنگ بیتگ اَنت، کہ بازیں سالاں چہ پوجی ادارگانی دزگیری ءَ اَنت، ایشانی تہ ءَ ڈاکٹر دین محمد بلوچ ھم ھوار اِنت کہ آ بیست ءُ ھشت جون دو ھزار ءُ نھ ءِ شپ ءَ ھزدار ءِ اورناچ دمگ ءَ چہ نادراھجاہ ءَ کار ءِ نیام ءَ زورانسری بیگواھی ءِ آماچ کنگ بیتگ۔
ڈاکٹر دین محمد بلوچ ءِ زورانسری بیگواھی ءَ چاردہ سال سرجم بیتگ اَنت ءُ آئی ءِ جِنک وتی پِت ءِ یل بئیگ ءِ ھاتر ءَ گوستگیں چاردہ سالاں چہ پاکستان ءِ پارلیمنٹ، آمید گِس، سیاسی ءُ مردمی اگبالانی ادارگانی دروازگاں ٹُکّگ ءَ اَنت۔سمی دین محمد ءَ ماما قدیر ءُ فرزانہ مجید ءِ ھمراھی ءَ شال داں کراچی ءُ کراچی ءَ بگر داں اسلام آباد ءَ لانگ مارچ کُتگ۔ کراچی، شال ءُ اسلام آباد ءَ ڈاکٹر دین محمد بلوچ ءَ ھوار ھزارانی کچ ءَ زورانسری بیگواھیں مردمانی یل کنائنگ ءَ پہ زھرشانی نندانک ھم داتگ اَنت۔ یک دھکے ءَ چہ گیشتر وھد گوستگ بلے وتی پِت ءَ یہ کنائنگ ءِ ھاتر ءَ مھلب ءُ سمی دین محمد ءِ جھد برجاہ اِنت۔
پیسر ءَ بلوچ سیاسی باسکانی زورانسری بیگواھیانی ھد داں بلوچستان ءُ کراچی ءَ بندوک بیتگ، بلے نوں چہ مزن ھوریں ڈیھاں ھم سیاسی باسکاں پاکستان ءِ دست ءَ دیگ بئیگ ءَ اِنت۔ راشد بلوچ متحدہ عرب امارات ءَ پاکستان ءِ دستءَ داتگ اَت بلے پنچ سال گوزگ ءَ پد ھم آئی ءَ آمید گَساں آرگ فیر ٹرائل ءِ ھک دیگ بئیگ ءَ نہ اِنت۔ راشد بلوچ ءِ مات پنچ سالاں چہ آئی ءِ آجوئی ءِ ھاتر ءَ جد ءُ جھد کنگ ءَ اِنت بلے داں اَنگت متحدہ عرب امارات ءُ پاکستان ءَ راشد بلوچ ءِ بابت ءَ ھاموش اَنت۔
بلوچستان ءَ سمی ءُ مھلب ءِ پئیمیں بازیں زھگانی کسانی پریس کلب ءُ دگانی سر ءَ زھرشانی کنان ءَ گوستگ، بلوچ شورش ءِ نیام ءَ یک سرجمیں پدریچے زورانسری بیگواھیانی آماچ بیتگ بلے پاکستان ءِ واکداریں ادارگ وتی پالیسیانی سر ءَ دوبر چاری کنگ ءَ ساڑی نہ اَنت ءُ بلوچستان ءَ زورانسری بیگواھیانی درچ یکشلی ءَ برجاہ اَنت۔
ھمک سال ءِ وڑا سرجمیں جھان ءِ مسلمان پہ ائید ءَ ساڑی بئیگ ءُ وشیانی تہ ءَ دزگٹ اَنت بلے بلوچستان ءَ زورانسری بیگواھیں مردمانی کھول ائید ءِ روچ ءَ وتی دوستیگیں مردمانی یل کنائنگ ءِ ھاترءَ زھرشانیانی ٹھینگ ءِ تہءَ دزگٹ اَنت۔
مھلب، سمی، سائرہ، راشد ءُ زاکر ءِ مات ءُ زورانسری بیگواھیں مردمانی کھولانی ائید کراچی ءُ شال پریس کلب ءِ دیم ءَ زھرشانی کنان ءَ گوز ایت۔ پاکستان ءِ سیاسی پاٹی ءُ مردمی اگبالانی ادارگ ءُ چہ پاکستان ءَ پسہ گروکیں جھانی راجانی ادارگانی زورانسری بیگواھیانی سر ءَ ھاموشی ءِ سوب ءَ بلوچستان ءَ یک مردم نیستی ءِ جاور ءِ ودی بیتگ۔