بی ایل اے ءَ چیریں ادارھانی کاروان ءِ سر ءَ بوتگیں پدائی اُرش ءِ سرجمیں ھال شنگ کُتگ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل سائٹ “ھکل میڈیا ” ءِ تہ ءَ کیچ ءِ بنجاھی شھر تربت ءَ چیریں ادارھانی کاروان ءِ سر ءَ بوتگیں پدائی اُرش ءِ سرجمیں ھال شنگ کُتگ ءُ گوشتگ کہ اے اُرش چیریں ادارھانی مزنیں اپسرانی سر ءَ کنگ بوتگ –

جارکش جیئند بلوچ ءِ رِد ءَ بلوچ لبریشن آرمی ءِ پدائی ٹولی ” مجید برگیڈ” ءَ مروچی نیمروچ ءِ وھد ءَ تربت بازار ءَ دشمن پوج ءِ چیریں ادارھانی یک “ہائی ویلیو” کاروانے ءِ سر ءَ پدائی اُرشے کُتگ ءُ دژمن سک باز جانی ءُ مالی تاوان داتگ انت – بی ایل اے اے اُرش ءِ زمّہ واری ءَ منیت –

جارکش ءَ دیمتر ءَ گوشتگ کہ کاروان ءَ ھواریں چیریں ادارھانی پنچ گاڑی چاکر چار راھ ءِ نزیک ءَ ھما وھد ءَ نشانگ کتگ انت وھدیکہ اے کاروان چہ تربت بالی پٹ در اتکگ ءُ دیم پہ آئی ایس آئی مزن کارگس ءَ روگ ءَ بوتگ انت – بی ایل اے ءِ انٹلی جنس ونگ ءَ اے پکائیں ھال سر بوتگ کہ اے کاروان ءَ چیریں ادارھانی مزنیں اپسرانی یک ٹولی یے سوار انت – تراک ءَ پد دژمن ءَ سرجمیں دمگ وتی انگیر ءَ کُتگ ءُ وتی درسیں جانی ءُ مالی تاوان چیر داتگ انت ، چریشی ءِ سوب ءَ مرتگینانی پجار ءُ آھانی رینک پلھال انو زانگ نہ بنت –

جارکش ءَ گوشتگ کہ بی ایل اے اے گپ ءَ تچک کنت کہ پولیس ءِ گاڑی ناکہ ما نشانگ کُتگ ءُ ناکہ اُرش ءِ زد ءَ اتکگ بلکیں مجید برگیڈ ءِ سوبمندیں اُرش ءَ پد ترس آماچیں دژمن پوج ءَ دگ ءِ دومی نیمگ ءَ رؤکیں پولیس وین ءِ سر ءَ تیرگواری کُتگ –

جیئند بلوچ ءِ رِد ءَ اے پدائی اُرش مجید برگیڈ ءِ شیرزالیں زالبول پدائی نمیرانیں سمیہ کلندرانی بلوچ پنام ءِ سمو ء عبید کلندرانی ءَ کُتگ – سمیہ کلندرانی ءَ ھپت سال انت کہ بلوچ لبریشن آرمی ءَ گوں بندوک بوتگ، وھدیکہ چار سالاں آئی ءَ رزاکاری مجید برگیڈ ءِ تہ ءَ کار کتگ – چار سالاں تاں گرانتریں تربیت ءِ تہ ءَ گوستگ اے میان ءَ مجید برگیڈ ءِ رھبندانی رِد ءَ آ ھمک وھد ءَ وتی زرتگیں پیسلہ ءِ سر ءَ چار بچار کنگ ءَ گوشتگ، آ وھد دیگ بوتگ کہ اے گپ ءَ باور بہ بکنائینیت کہ آ اے پیسلہ ءَ زورانسری یا جزباتی زورگ ءَ نہ انت بلے آ چار سالاں پد ھم وتی زرتگیں پیسلہ ءِ سر ءَ مھکم بوتگ ءُ مروچی دژمن ءِ سر ءَ سوبمندیں اُرش کُتگ ءُ وت ءَ بلوچ راجدپتر ءِ تاکانی تہ ءَ نمیران کتگ –

جارکش ءِ رِد ءَ بیست ءُ پنچ سالی سمیعہ کلندرانی اھوالکارے بوتگ آئی ءَ پنچ سالاں بلوچ لبریشن آرمی ءِ میڈیا ونگ ءِ تہ ءَ وتی پرز پیلو کتگ ءُ اے میان ءَ آئی ءَ بی ایل اے ءِ میڈیا ونگ ءِ مھکم کنگ ءُ آئی ءِ تالان کنگ ءَ وتی کرد پیلو کتگ – آ یک وانندہ ، تمرد ءُ راجی سنچ ءَ سریچیں باسک ءِ بوتگ، سمیہ کلندرانی نمیرانیں پدائی ریھان بلوچ ءِ دشتار ءُ بی ایل اے ءِ سروکیں رھشون نمیرانیں جنرل اسلم بلوچ ءِ نشار بوتگ – آ بنکی ءَ ھزدار ءِ دمگ توتک ءِ نندوک بوتگ کہ اودا سال دوھزار یازدہ ءِ ھژدہ فروری ءَ دژمن پوج ءَ سمیہ کلندرانی پیروک، ناکو بازیں وارساں ھوار بیست کس ءُ وارس زورانسری آوار جتگ ءُ بیگواہ کتگ انت کہ روچ مروچی بیگواہ انت –

جیئند بلوچ ءَ گوشتگ کہ بلوچ لبریشن آرمی دلیریں بلوچ زالبول پدائی نمیرانیں سمیہ کلندرانی ءَ سھر چکیں دروت ندر کنت ءُ اے کول ءَ کنت کہ نمیرانیں سرانی بدل بلوچ سرڈگار ءِ سرجمی ءَ آجوئی ءِ دروشم ءَ گرگ بیت انت –

بی ایل اے ءِ جارکش جیئند بلوچ ءَ وتی درشان ءِ گڈسر ءَ گوشتگ کہ اے وھدی بلوچ لبریشن آرمی مجید برگیڈ ءِ تہ ءَ بازیں بلوچ زالبولاں ھوار سدانی کچ ءَ پدائی دژمن ءِ سر ءَ کھر جوڑ بوگ ءُ اُرش ءَ ساجو انت – زورگیریں پاکستان ءُ آئی ءِ کمکار چین بلوچ ءِ آجوئی ءَ بہ منّ انت ءُ زوتاں زوت چہ بلوچستان ءَ در بیا انت اگاں ناں گڑا بی ایل اے ءِ ترندتریں اُرشانی ھاتر ءَ وت ءَ ساڑی بہ کن انت –