مھمد امیری ءِ رجینتگیں کتاب “سلوچ ءِ ھورکیں جاہ” چاپ ءُ شنگ بوتگ

فارسی ءِ نامداریں گدار نویس مھمود دولت آبادی ءِ گدار “سلوچ ءِ ھورکیں جاہ”کہ مھمد امیری ءَ ماں بلوچی تہ ءَ رجینتگ چاپ ءُ شنگ بوتگ –

مھمد امیری ءِ ماں بلوچی ءِ تہ ءَ اے گدار یک کلگی جنین آدمے ءِ کسہ اِنت –

اے گدار اے وھدی بازیں زبانے ءَ چوش کہ انگریزی، فرانسیسی، آلمانی، ایتالیایی، ھلندی ءُ کردی ءَ رجینگ بوتگ ءُ ھنوں مھمد امیری ماں بلوچی ءِ تہ ءَ رجینتگ کہ ربیدان شنگکاری ءِ نیمگ ءَچاپ ءُ شنگ بوتگ –

وتی رجانک کتگیں کتاب ءِ درگت ءَ مھمد امیری ءَ گوں دی بلوچستان پوسٹ ءِ اھوالکار ءِ گون ءَ تران کنان ءَ گوشتگ کہ سلوچ ءِ ھورکیں جاہ، محمود دولت ءِ آبادی ءِ فارسی گدار “جای خالی سلوچ” ءِ بلوچی رجانک اِنت – اے گدار ایران ءِ اسلامی انقلاب ءَ سالے رند اولی بر ءَ فارسی ءَ چاپ ءُ شنگ بوتگ – دولت آبادی ءِ وتی گوشگ اِنت کہ آ وتی مزنیں کتاب کلیدر ءِ دومی ءُ سیمی جلد ءِ کاراں گوں دزگٹ بیت کہ ھمے نیام ءَ ایران ءِ ساواک شاہ ءِ حکومت ءِ گڈسری سالاں آئی ءَ گر اِیت ءُ زندان ءَ کنت ءُ تنی وھدی ھم دولت آبادی گوش اِیت من نزاناں کہ من ءَ اِش پرچا گپت ءُ زندان ءَ برتگ اش –

رجانکار ءِ رِد ءَ ھمے زندان ءِ وھد ءُ باریگ ءَ سلوچ آئی ءِ زھن ءُ دل ءِ سر ءَ وتی نقش بندی ءَ کنت، دانکہ دولت آبادی چہ زندان ءَ یلہ بیت ءُ اے پنچسد تاکدیمی گدار ءَ ھفتاد روچ ءِ توک ءَ سرجم کنت –

مھمد امیری ءِ رِد ءَ اے گدار رئالیستی گدارے ءُ چو دولت آبادی ءِ آ دگہ گداراں ایشی ءِ واقعہ ءِ پیش آیگ ءِ جاہ خراسان اِنت ءُ وھد ءُ زمان ھم ھمیش اِنت کہ ایران ءَ انقلاب سفید ءُ اصلاحات ارضی وتی زوراں بنت – گدار ءِ بنگپ یک دھاتی لوگمانے ءِ کسہ اِنت کہ یکروچے پگاہ، سھب ءَ، لوگ ءِ مردین بزاں پت، یبر ءَ گار بیت ءُ جنین بزاں مات پشت کپ اِیت گوں سے چک ءَ؛ دو بچک ءُ یک جنکے ءَ اے کسہ ھمے وڑ ءَ روان کنت ءُ دیمتر ءَ پد ءَ ھمے اصلاحات ارضی ءُ انقلاب سفید ءِ اثر اے لوگمان ءِ سر ءَ گندگ بنت – پد ءَ چکانی سر ءَ دگہ کزا ءُ ویل کپ اِیت ءُ یک بچکے پھک لنگ ءُ لُچ بیت ءُ جنک ءَ ھم کسانسالی ءَ سیر دینت گوں دگہ مزن امریں مردینے ءَ کہ پیسر ءَ ھم جنینی ھست ءُ داں گڈسر ءَ مات، توکی بچک ءُ مات ءِ برات ءُ دگہ یکے پہ سلوچ ءِ شوھاز ءَ کہ مردماں انچو گوشتگ جاھے یکے دیستگ اِش ھمائی ءِ رنگیں رواَنت –

رجانکار ءِ رِد ءَ دولت آبادی ایران ءِ ھستین ءُ زندگیں گدارنبیسانی تہ ءَ مستریں نام اِنت ءُ آئی ءَ ملکی ءُ درملکی بازیں دادے ھم دیگ بیتگ –

مھمد امیری ءَ وتی رجینتگیں کتابانی درگت ءَ گوشتگ کہ منی وتی جند ءَ تنی وھدی سے کتاب چہ فارسی ءَ کہ سئیں گدار اَنت بلوچی ءَ ترینتگ بابا سبحان ءِ کسہ محمود دولت آبادی، تھارماہ منصور علیمرادی، سلوچ ءِ ھورکیں جاہ محمود دولت آبادی ءِ کہ منی سیمی رجینتگیں کتاب انت –