کیچ ءِ بُنجاھی شھر تربت ءَ ڈینگی وائرس ءِ سبب ءَ بازیں مردمے اسرمند بیتگ ءُ بیرانیانی کچ ھم گیش بوان اِنت-
گیشیں ھالانی رِد ءَ کیچ ءِ بُنجاھی شھر تربت ءِ ھند شاھی تمپ ءِ جھمنندیں کسان سالی ئیں ظاھر ء زاھد علی کراچی ءِ نادُراھجاہ ءَ الاج وھد ءَ مروچی بیران بیتگ-
کھول گوشگ رِد ءَ ڈینگی وائرس ءِ بوگ ءِ سبب ءَ تربت نادُراھجاہ ءَ برتگ اود ءَ الاج ءِ آسراتی نہ بوگ ءِ سبب ءَ کراچی ءِ یک نادُراھجاھے ءَ برتگ بلے اود ءَ الاج وھد ءَ آ بیران بیتگ-
زانگ بہ بیت کہ تربت تنی وھدے ڈینگی وائرس ءِ سبب ءَ سے بیرانی رپورٹ نکش بیتگ اَنت کہ آیانی تہ ءَ چہ گوکدان تاج محمد ء لعل محمد، کوشقلات ءِ جھمنند بیوروکریٹ گوستگیں ایکسئین اختر علی ءُ ورناہ زاھر ء زاھد ھوار اَنت-
ناسرجمیں ھالانی رِد ءَ ڈینگی وائرس ءَ چہ کیچ ءَ بیرانیانی کچ اشی ءَ چہ ھم گیشتر اَنت بلے لھتے کیس نکش کنگ نہ بنت-
ٹیچنگ نادُراھجاہ تربت ءِ ایم ایس ءِ رِد ءَ نادُراھجاہ ءَ ھمکروچ نکش کنگ بیتگیں کیس چل پنچ درسد ڈینگی وائرس ءِ نادُراھانیگ اَنت – ٹیچنگ نادُراھجاہ تربت ءَ کم ءُ گیش ھمکروچ دو ھزار نادُراھانی او پی ڈی بیت-