نبشتانک: مئے چاگرد ءِ وانندہ
نبشتہ کار: لیاقت کے بی
دی بلوچستان پوسٹ
وھدے کہ گالرد “چاگرد” کیت گڑا اُود ءَ مھتلپیں سوچ ءُ مھتلپیں ءِ مردم ءُ نظریات بیت۔انسان ءَ چہ لوگ با نیت ءُ لوگ ءَ چہ یک چاگردے جوڑ بیت انسان ءِ کِردار انسان ءِ پکر ءَ سر ءَ منحصر بیت انسان یک چاگردے Constitute دنت، اگاں یک مردم ئے ودی بیت نا آ بوتن ءَ چہ شر بیت نا ھراب بلکیں آ چہ ھمئے چاگرد ءَ رُود اِیت یا شَر بیت یا ھراب، اگاں آ یک شرے چاگردے ءَ پیدا بِہ بیت آ چاگرد ءِ مردم وانندگ ءُ زانتکار شریں بہ بنت آ ھم یک شرے مردمے جوڑ بیت اگاں آ یک ھنچیں چاگردے ءَ ودی بہ بیت آ چاگرد ءِ مردم بے شھور ءُ بد اکلاک بِہ بنت آ مردم ھم ھمیشانی وڑ ءَ ھراب بیت، آ چاگرد ھرابیانی تہ ءَ بوت آ ھم ھمے ھرابیانی تہ ءَ روت، مئے چاگرد یک ھنچیں کمزوری یے ءَ گوں ھوار اِنت آ روچ پہ روچ وَد ءَ اِنت دیم ءَ روان اِنت آ مئے باندات ءِ ھراب کنگ ءِ واست ءَ اِنت، ایشی ھتم کنگ ھما سنگتانی کار اِنت کہ آوان ونتگ ءُ سرپد اَنت، کہ ما یک چاگردے ءَ چون شری ءَ آؤرت کن ایں ۔
آوانی ھک بیت آ یک شرے کدمے بہ زور اَنت پہ وتی چگرد ءَ بلے ما چُش کُرت نہ کن ایں، پرچا کہ ما وترا وت چینج کُرت نہ کن ایں۔ وھدے ما وانگ ءَ رو ایں واتر وتی موکل ءَ کا اِیں پد ءَ ما ھمے ھساب ءَ بنت کہ ساری ءَ ھمے وڑ بوتگ اَنت، یا گنتر بنت، گُڑا ما پہ چاگرد ءَ یاکہ راج ءَ پہ چے کُرت کن ایں، یک روچے من ءُ منی یک واھندھیں سنگتے دگہ ھندے ءَ شُت ایں پہ گردگ ءَ منی سنگت ھر کجام مردم ءَ گوں ھوار بوت یا مستریں مردم ءِ بوتیں یا کستریں آئی سک بداکلاکی کُرتیں، من گُشت سنگت چش مکن تو یک واھندھیں تو بایدیں دگہ ءَ را را پنت بہ داتیں، گش اِیت “تو کے ئے من ءَ گُش ئے؟ تئی اوکات چے اِنت” من چار اِت اِیش ءَ وت ءَ را سُوچ نیست منی گُشگ ئِے چِی کنت، چُشیں مردم مئے ھند ءَ سک باز اِنت –
منی ھیال ءَ ھشکیں وانگ ءُ ڑگری مئے کار ءَ نئیت تانکہ ما وت شر مہ بہ ایں، اگاں ما دگہ کار کُرت نہ کن ایں، ما وت ءَ را داشت کُرت بہ کن ایں، چہ مئے وجہ ءَ دگہ یک پِسے وتی زھگ ءَ پہ وانگ ءِ واستا دیم بہ دنت۔ چو مہ بیت کہ مئے سُوچ نہ جنگ ءِ واستا یک چاگردے گَنتِر بہ بیت، باید اِنت ما وتی باندات ءِ واستا سُوچ بہ جن ایں، جُھد بہ کن ایں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔