بلوچ راج ءِ سر ءَ بوؤکیں زلم ءُ زوراکیاں سرجمی ریاستی مشینری کار انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجیں گل وائس فار بلوچ مسنگ پرسنز ءِ زھرشانی ءَ مروچی ءَ پنج ھزار ءُ چِل ءُ پنچ روچ سرجم بوتگ انت – مروچی کمیونسٹ پارٹی آف پاکستان ءِ بنجاھی جنرل سیکریٹری امداد قاضی ءُ کابینہ ءِ ایندگہ سنگتاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ زوراک بازیں سوھویں سراں وتی دیم سر جھل کنائینگ ءَ بے سوب بیت گڈا آھانی سراں چہ جان ءَ جتا وا کنت بلے آھانی سجدگ کنائینگ ءَ بے سوب بیت اِنت – مروچی ھزارانی کچ ءَ بلوچاں وتی سرانی کربانی داتگ ءُ زلم ءُ زوراکیانی سگ پد پہ بلوچ راج ءِ رکینگ ءَ مھکمیں ادارہ جوڈ کتگ کہ میان استمان ءَ سر بوتگ انت –

ماما قدیر بلوچ ءَ گوشتگ کہ ریاستی ایجنسیانی سیاھیں کرتوتاں نوں سرجمیں جھان سرپد انت – مروچی جھان اے ایجنسیاں ملک ءِ زمہ دار ناں بلکیں بلوچ راج ءِ چکچینی ءَ ڈیت اسکواڈ ءِ نام ءَ زانت – بلوچ پرزندانی آوار جنی ءُ کوش ءَ ھواریں ایجنسیانی کتکاریاں میان استمان دیم ءَ چیر دیگ ءِ جھد کنگ بوگ انت بلے زورگیریں ریاست ءِ مزن وزیر ءَ وت زاھر کتگ کہ بلوچستان ءِ تہ ءَ ایجنسی بلوچ ءِ چکچینی ءُ کشت ءُ کوش ءِ ھاتر ءَ مھار گٹ دیگ یل کنگ بوتگ انت – بلوچ راج ءِ سر ءَ بووکیں زلم زوراکیاں تھنا یک ادارھے ناں بلکیں سرجمیں ریاستی مشینری کار کنگ ءَ انت –

ماما قدیر بلوچ ءَ گوشتگ کی وفاقی وزیر داخلہ ءِ سروکی ءَ جھلی کمیٹی ءُ بلوچ چکچینی ءَ ھواریں پوج ایف سی ءُ سی ٹی ڈی ءَ پہ سیل جوڈ کنگ ءُ دیگ بوتگ کہ چریشی ءَ ھمے پدر بیت کہ بلوچ پرزندانی زورانسری آوار جنی ءُ ژانگولیں جونانی چگل دیگ پالیسی گیشی آرگ بیت –

ماما قدیر بلوچ ءِ گوشگ ات کہ وتگڑیں سوبائی سرکار ءَ ھم ایردستیں بلوچستان ءِ تہ ءَ ایمنی ءِ نام ءَ بلوچ ءِ بگیری ءَ مزنیں کچے ءَ برزی ارشانی جار جتگ پدا بولان سبی کلات ءُ ھوشاپ ءَ کاروائی بندات کتگ انت –