آئی پی ایل 2023: آر سی بی ءِ 172 ٹارگٹ ءِ دیم ءَ راجستھان59 اسکور ءَ آل آؤٹ

انڈین پریمئر لیگ شانزدھمی سیزن ءِ شستمی گوازی ءَ رائل چیلنجر بنگلور ءَ راجستھان رائل یکسد ءُ دوازدہ رناں پروش داتگ – آر سی بی ءِ نیمگ ءَ دیگ بوتگیں یکسد ءُ ھپتاد ءُ دو ٹارگٹ ءِ دیم ءَ راجستھان ءَ بس دھ اوورانی تہ ءَ پنجاہ ءُ نُھ رن جوڈ کرت کتگ ءُ آل آؤٹ بوتگ انت – اے آئی پی ایل ءِ گوستانک ءِ تہ ءَ سیمی کمتریں اسکور انت – وھدیکہ آئی پی ایل ءِ شست ءُ یکمی گوازی چنئی سپر کنگز ءُ کولکاتہ نائٹ رائیڈر ءِ میان ءَ بوتگ کہ کولکاتہ ءَ شش وکٹان گوازی کٹ اِتگ –

آر سی بی ءُ راجستھان رائل ءِ میان ءَ بوتگیں گوازی ءَ رائل چیلنجر بنگلور ءَ اولسر ءَ بیٹنگ کنان ءَ یکسد ءُ ھپتاد ءُ دو رنانی ٹارگٹ داتگ – آر سی بی دوازدہ گوازیانی تہ ءَ دوازدہ پوئنٹانی ھمراھی ءَ پنچمی نمبر ءَ سربوتگ وھدیکہ پروش وارتگیں رائل ھم دوازدہ پوئنٹانی ھمراھی ءَ ششمی نمبر انت بلے آئی ءِ اے سینزدھمی گوازی بوتگ –

آرسی بی داتگیں ٹارگٹ پروشگ ءَ پہ راجستھان رائل ءِ نیمگ ءَ شیمرون ءَ نوزدہ بالاں سِی ءُ پنچ رن جوڈ کتگ ءُ رائل ءِ ٹاف اسکورر بوتگ اشی ءَ ابید جو روٹ ءَ بس دھ رن جوڈ کت کتگ ایندگہ لیبی دھ رنانی جوڈ کنگ ءَ ھم سوبمند نہ بوتگ انت –

آر سی بی ءِ نیمگ ءَ فاف ڈوپلیسس ءَ پنجاہ ءُ پنچ، وراٹ ءَ میکسویل ھمراھی ءَ شست ءُ نھ رن جوڈ کتگ وھدیکہ انوج راوت ءَ یانزدہ بالاں بیست ءُ نُھ رن جوڈ کتگ ءُ اسکور یکسد ءُ ھپتاد ءَ سر کتگ –

شست ءُ یکمی گوازی ءَ کولکاتہ نائٹ رائیڈر ءَ چنئی سپرکنگز ءِ دیم ءَ شش وکٹاں گوازی کٹ اِتگ – اشی ءِ ھمراھی ءَ کے کے آر ءَ دو پوئنٹ گپتگ ءُ پلے آف ءِ تہ ءَ سر بوگ ءِ امیت داشتگ –

چنئی سپر کنگز ءُ کے کے آر ءِ میان ءَ بوتگیں گوازی ءَ چنئی ءَ بیست اوورانی تہ ءَ شش وکٹانی تاوان ءَ یکسد ءُ چِل ءُ چار رن جوڈ کتگ وھدیکہ کے کے آر ءَ ھژدہ اوور ءُ سَے بالاں چار وکٹانی تاوان ءَ یکسد ءُ چل ءُ ھپت رن جوڈ کتگ ءُ چنئی ءِ داتگیں ٹارگٹ پروشتگ ءُ گوازی وتی نام ءَ کتگ –