ماھل بلوچ پنچ لک کلدار ءِ بدل ءَ زمانت ءِ سر ءَ یل بوتگ

ماھل بلوچ سَے ماھاں بندیگ بوگ ءَ پد مروچی یل کنگ بوتگ –

ھبدہ فروری ءِ شپ ءِ نھنگام ءَ چہ شال ءَ جند ءِ گِس ءَ زورانسری آوار جنگ ءُ پدا سی ٹی ڈی ءِ دست دیگ بوتگیں ماھل بلوچ ءِ گوستگیں روچ ءَ زمانت منّگ بوتگ ءُ مروچی یل کنگ بوتگ –

ماھل بلوچ مروچی چہ شال ءِ ھداہ جیل ءَ یل کنگ بوتگ – آ پنچ لک کلدار ءِ بدل ءَ زمانت ءِ سر ءَ یل کنگ بوتگ ءُ ماھل بلوچ ءِ یل کنگ ءِ ھبر آئی ءِ نزیکیں مردماں راست کُتگ –

زانگ بہ بیت ماھل بلوچ ءِ زورانسری آوار جنی ءُ دزگیری ءِ بدل ءَ سرجمیں بلوچستان ءَ زھرشانی ءُ نندانک جنگ بوتگ وھدیکہ سیاسی ءُ چاگردی تک ءُ پھناتاں سیادی داروکیں مردماں پریس کانفرنس کنان ءَ آئی ءِ دزگیری ءُ آئی ءِ سر جنگ بوتگیں بھتام رد کُتگ انت –

ماھل بلوچ ءِ زورانسری آوار جنی ءُ بندیگی ءِ بگیری ءَ ھر تکاں سیادی داروکیں مردماں وتی ھیال درشان کُتگ ءُ وھدیکہ سرکار ءَ ھوار پارلمنٹ نشتگیں بلوچ پاٹیانی سر ءَ سک باز تنکید کتگ –

ماھل بلوچ ءِ زورانسری آوار جنی ءِ بگیری ءَ نودربر ءُ سیاسی گلانی نیمگ ءَ بلوچستان ءَ ھوار پاکستان ءِ ایندگہ شھراں ھم زھرشانی کنگ بوتگ –

زانگ بہ بیت دزگیری ءِ میان ءَ ماھل بلوچ انسداد دھشتگردی ءِ آمیدگس ءِ نیمگ ءَ سَے رند ءَ دہ روچ ءِ ھاتر ءَ کاؤنٹر ٹررازم ڈیپارٹمنٹ ءِ دست ءَ دیگ بوتگ کہ چہ اودا ماھل بلوچ ءِ وت منگی بھتامانی تامر ھم شنگ کنگ بوتگ –

سَے ماھاں بندیگیں بلوچ زالبول ماھل بلوچ ءِ سر ءَ ھمے بھتام جنگ بوتگ کہ آ گوں بلوچ سلاہ بندیں گلاں گوں نزیک بوتگ وھدیکہ اے میان ءَ بازیں ٹی وی چینل ءُ ویڈیو ءَ آئی ءِ درشان شنگ کنگ بوتگ انت بلے پدا ھم مروچی ماھل بلوچ بلوچ چاگردی باسک عبدالغفار بلوچ ءِ نیمگ ءَ زمانت ءِ زرانی جما کنگ ءَ پد شال ہدہ جیل ءَ چہ یل کنگ بوتگ –