شیراز: بندیگیں مردمے پاھو دیگ بیتگ

روکپتی بلوچستان ءَ بندوکیں مردمانی پاھو دیگ ءِ درچ یکشل ءَ برجاہ اَنت زاھدان ءِ جھمنندیں مردمے ماں عادل آباد ءَ پاھو دیگ بیتگ –

گیشیں ھالانی رد ءَ روکپتی بلوچستان ءِ بندوکیں مردمے نشہ باپاری ءِ بھتام ءَ پاھو دیگ بیتگ-

پاھو دیگ بیتگیں مردم ءِ پجار یونس ریکی رخشانی ء شھنور جھمنند زاھدان ءِ نام ءَ زانگ بیتگ کہ آ چار زھگانی پت اِنت –

اھوالانی رد ءَ یونس ریکی ایرانی سال نود ءُ ھشت ءَ ما شیراز ءَ نشہ باپاری ءِ بھتام ءَ دزگیر کنگ بیتگ ءُ پد ءَ انکلاب ایران ءِ آمیدگس ءَ آئی ءِ سر ءَ پاھو دیگ ءِ ھکم داتگ بیتگ-

زانگ بہ بیت روکپتی بلوچستان ءَ اے دو ھپتگانی توک ءَ بیست ءُ دو مردم ءِ کساس ءَ مردم پاھو دیگ بیتگ اَنت کہ ایشانی توک ءَ یک زالبولے ھوار اِنت-

اے مردم گیشتر نشہ باپاری ءِ بھتام ءَ پاھو دیگ بیتگ اَنت کہ آیانی سر ءَ بھتام بیتگ آیاں نشہ باپاری کتگ بیتگ –

روکپتی بلوچستان ءَ سیاسی پھناتاں اے پاھو دیگانی پژدر ءَ زھر ءِ درشان اِنت ءُ گوشگ اِنت کہ ایرانی سرکار مردماں لاچار کنگ ءُ آیاں نشہ باپاری ءِ تکاں برگ ءَ اِنت-

گوستگیں آدینگ ءِ روچ ءَ روکپتی بلوچستان ءِ نامی ئیں عالم دین ءُ راجدوست مولانا عبدالحمید بلوچ ءَ نماز ءِ وھد ءَ گوشتگ ات ءُ ایراد گران ءَ گوشت کہ ایران ءِ سرکار مردماں روزگار نہ دنت ءُ مردم لاچار اَنت اے جان کُشیں باپار ءَ کن اَنت-