نمدی یے پہ لکی جان ءَ
نبشتہ کار: شیردل بلوچ
دی بلوچستان پوسٹ
لکی جان ھمبلوک دروت ءُ درھبات ئے چہ ھاوند ءِ دَر ءَ تئی دراھی ءِ لوٹوک آں۔ من زاناں منی درھباتی پہ تو سر کنگ نہ بنت، مئے چاگرد ءِ تہ ءَ اے وڑ ءَ گوشتگ ءَ اَنت، نااُمیتی ھم گناہ اِنت، باور وَ نہ بیت، بلے پد ءَ تئی گوں راج ءَ مھرانی بیسہ اَنت، وتی زرد ءِ پاھاریں درداں نمدی ءِ دروشم ءَ درشان کنگ ءَ آں گوں تئی گمجتیں زھیراں جیڑگ ءَ بلکیں دمانے ءَ زرد ءَ تاھیر بہ رس ایت، تو انچیں کارستے ءِ ھدابند بوتگ ئے سرڈگار ءُ راج ءِ پگر وتی کوپگاں زُرتگ ءُ پند بُر اِتگ، ھچبر شموشگ نہ بہ ئے، دوا کناں چہ زورگِریں ڈیھ ءِ کھریں زندان ءَ آجو بات ئے ءُ یکرندے پد ءَ گوں وتی ھمبلاں ھمنیاد بات ئے پہ تئی بچکند ءُ ادایاں زھیر وار اَنت ۔
شبیرجان تئی نام ءَ زانگ ءَ آں ، بلے من ءَ لکمیر ءِ نیم نامی بزانکہ” لکی جان پتو گوشگ ءَ سک ءَ باز دوست بیت، تو نا دوی ئیں کارستے ءِ ھدابند بوتگ ئے، آجوئی ءِ پڑ ءَ راجکاری کرتگ ءُ مھروانیں جھدکارے اِت ئے، زاناں تئی کارست ءِ کسہ ءِ آرگ پہ چُشیں چار گاریچاں پدّر بوت نہ بیت، تو کاملیں انسانے ءُ سرجمیں آشوبی بوتگ ئے ۔
لکی جان اولیگ رند ءَ دو ھزار یازدہ اَت من ترا دیست، جکّرو ءِ کسانیں میتگ ءَ بلے۔ ! تئی بچکند ءُ مھران کسانیں میتگ ءَ را بازار کرتگ اَت، تئی شیرزالیں گھار سیما بلوچ ءِ دوار اَت، بی این ایم آواران دمگ ءِ گچینکاری ءِ دیوان ، شھید ڈاکٹر منان جان ءِ سروکی ءَ برجم اَت، ما کُل تئی مھمان اِت اِیں، چہ ھما روچ ءَ تئی جپاکشی دیست سرپد بوتاں کہ تو راج ءِ باندات ءِ واست ءَ درپشوکیں استالے ئے چدّ ءُ پد باز بر ءَ دُچار کپتگ ءُ مُدام دیستگ تئی دست ءَ وانگی یے(کتابے ) ءُ ندے ( کلمے) گوں اِت اَنت، بی ایس او آزاد ءِ گل ءِ کاراں دست گلائیش ءُ تگ ءُ تاچ ءَ اِت ئے، پمشکا زورگِر ءَ ترا چست کُتگ ءُ زندانیگ ئے، ایردستیں راجے ءِ پُسّگانی سرپدی دیگ زورگریں ڈیھ ءِ روتگانی ولگوج کنگ ءُ دُزیں سروکانی گُٹگری زانگ بیت۔
لکی جان تو شھید ھمید بلوچ ءِ سسا ءِ رندگیری کُتگ آئی ءِ پہ وتی سرڈگار ءُ راج ءِ پھازگ ءَ پاھو ءِ ساد چُک اِتگ ، گُڈی کلوہ ئِے پہ راج ءِ پُشتپداں پشت گپتگ، وت ءَ دائمی نمیران کرتگ ئِے زاناں تو شھید رزا جھانگیر، کامریڈ کیوم ،کمبرچاکر ءُ الیاس نزر ءِ سوگات کرتگیں درونت وانتگ اَنت، انچو بیگواھیں رھشون زاکر مجید ءُ زاھد کرد ءِ پگر ءِ ھمراھداری کرتگ ءُ سرڈگار ءِ بستار ءَ شَرسرپد اِت ئے راج ءِ مھروانی ءِ سزا ترا تئی کھٹم ءَ دیگ بوگ ءَ اِنت۔
لکی جان وھدے تئی ترانگاں کپ آں، تئی شِیرکنیں بچکند گیرکاینت ،گڑا زرد ءِ دراھیں واھگ چو تُن مرتگیں درچک ءِ پُلان گیمر اَنت، زندمان ءِ وشیانی گواتے اوں بےتاھیریں زرد ءِ میتگ ءَ سر نہ کش اِیت کہ بود بہ کنت،تئی بیگواھی ءَ پد گوش ئے دْرین ءِ رَنگانی تہ ءَ زیبائی مان نیست ءُ تھاری یے ءَ مانشاتگ گیدی ءِ ھرچ کنڈان ءُ ھمک راجدوست ءِ گِداناں تاموری ءُ ابتکی ءَ پہ دائمی ھنکیں کرتگ، دراہ پتو تکاونسر اَنت، چَمّ تئی آیگ ءِ راھاں سک داتگ اَنت ءُ ودار ءِ گرانیں ساھتاں نپس کشگ ءَ اَنت۔
لکی جان: زاناں اے لگوریں دژمن ءِ کارمننداں ترا بندیگجاہ ءَ اے ھبر سھی کرتگ اَنت کہ ما بلوچ ءِ لاڑوکیں دُتگ ءُ بی ایس او آزاد ءِ گْوَستگیں سروک ءُ بی این ایم ءِ رھشون بانُک کریمہ بلوچ ءَ را چہ کینیڈا ءِ شھر ٹورنٹو ءَ چست کرتگ گُٹگر ءُ شھید کرتگ کُنٹ مان آپے ءَ بُک داتگ اَنت، چُشیں ھالاں بندیگجاھاں دے اَنت کہ مردم ءَ را ازیت بہ رس اِیت، وت شادمانی کن اَنت، وھدے کہ وتی کارمند اِش جاھے ءَ سرمچارانی تیراں مُردار بنت، گڑا ھال نہ دینت، اگاں ھال اِش دات گڑا وتی کَست ءَ گوں بندیگانی لٹ دیگ ءَ کش اَنت ءُ پدر کن اَنت۔
لکی جان گپّے زان ئے؟ ھما روچ ءَ ترا لشکریاں چہ گورپ ءَ چست کرتگ، تئی شیرزالیں گُوھار سیما بلوچ ءُ مھروانیں لوگ بانک زرینہ بلوچ لوگ ءَ نہ نشتگ اَنت، تئی اکس اِش گون اَنت،کدی مائی کلانچی (کراچی) ءُ کدی بےمرادیں پنجابستان ءِ بنجاھی شھر اسلام آباد زھرشانی کتگ اِش، چوناھا شالکوٹ ءِ ھما گدان ءَ پیرمرد ماما کدیر بلوچ ، نسراللہ بلوچ ءُ سمی دین بلوچ ءِ ھمراھداری ءَ پہ تئی آجوئی ءَ ھوار تیوگیں بندیگانی آجوئی ءِ توار جوڑ بوتگ ءُ مُدامی دگ ءُ چار راھاں زھرشانی کنگ ءَ اَنت، تئی مھروانیں گّوھار” سیما بلوچ ءَ گریتگ ءُ چَمّان ئِے چو رگام ءَ گورتگ،چوناھا اے وتگڑیں ڈیھ اسلام ءِ نام گپت، ھمایانی دیم ءَ چہ آیاں وت بہ ترس اِیت، امریکہ ءِ ریمنڈ، ڈیوس ،بھارت ءِ ونگ کماندار” ابھینند ءُ کلبھوش یادو ءِ واست ءَ انساپ ءِ دیگ ءُ انسانی ھمدردی ءِ گنجائش ھست،بلے بلوچ ءِ باریگ ءَ کسے ءِ دل موم نہ بیت، بلوچ ءِ مات ءُ گوھارانی چّمّانی ارس گندگ ءَ اِش نیاینت،پژن ءِ گپّے۔! گُڈی ءَ ھمے گوش آں، ماشاء اللہ اے چونیں اسلامی شوکیں ڈیھے ءُ زور ءِ مسلمان اَنت، زُوت چَہ کھریں زندان ءَ آجو بات ئے آمین.
تئی وداریگیں سنگت شیردل-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔