آئی پی ایل 2023: ایشانت شرما ءَ گڈی اوور ءَ گوازی مٹّیں اِتگ ،ھاردک ءِ نیم سنچری پہ مپت شُتگ

آئی پی ایل ءِ شانزدھمی سیزن ءِ چِل ءُ چارمی گوازی گجرات ٹائیٹنز ءُ دھلی کیپٹل ءِ میان ءَ بوتگ کہ دھلی کیپٹل ءَ پنچ رناں گوازی کٹ اِتگ –

دھلی کیپٹل ءَ اولسر ءَ بیٹنگ کنان ءَ یکسد ءُ سِی رنانی ٹارگٹ ایر کتگ کہ گجرات ءَ ٹارگٹ پروشت نہ کتگ ءُ بیست اوورانی تہ ءَ شش وکٹانی تاوان ءَ بس یکسد ءُ بیست ءُ پنچ رن جوڈ کتگ – گجرات نیمگ ءَ سمیع ءَ وتی اولی سئیں اووراں پد ماں پد چار بیٹس مین آؤٹ کنت انت بلے امان خان ءِ نیم سنچری ءَ دھلی ءِ یکسد ءُ سِی رناں سر بوتگ انت –

پہ ٹارگٹ ءِ پروشگ ءَ گجرات ءِ بندات جوان نہ بوتگ شبھمن گل ءُ ڈیوڈ ءَ ھوار چار بیٹسمیناں دھ رن ھم جوڈ کت نہ کتگ کہ پدا رند ءَ کپٹن ہاردک ءَ جوانی ءَ گوازی کنان ءَ اے ڈبہ ءَ وتی کوپگاں زرتگ ءُ آئی ءَ نیم سنچری کتگ ءُ ابھینو ءَ ھم آئی ءِ جوانی ءَ کمک کتگ –

اشی ءَ ابید گڈسر ءَ راہل تیوتیا اتکگ اشی ءَ ھم اینریک ءِ اوور ءَ سَے چکا جتگ ءُ گوازی وشنود کتگ بلے گڈی اوور ءَ ایشانت شرما ءَ گوازی دیم تریں اِتگ ءُ دھلی کیپٹل ءَ اے گوازی پنچ رناں کٹ اِتگ –

محمد سمیع ءَ اے گوازی ءَ چار جوانیں بیٹس مین آؤٹ کتگ انت آئی ءَ فلپ سالٹ اولی اوور ءِ اولی بال ءَ آؤٹ کتگ ءُ پدا رند ءَ آئی ءَ منیش پانڈے، ری روسو ءُ پریم گرگ آؤٹ کتگ ءُ دھلی ءِ بیٹسمین سرین پروش کتگ انت – اے جوانی گوازی ءِ کنگ ءَ پد آ پرپل کیپ ءِ ھپتمی نمبر ءَ بوتگ ءُ نوں پریل کیپ ءِ واھند انت –