وی بی ایم پی ءِ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی پنچ ھزار ءُ بیست ءُ ھشت روچ سرجم بوتگ انت – چہ تفتان ءَ باپاری نصیب اللہ بلوچ، عرفان بلوچ ءُ دگہ مردماں اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ گوستانک اے گپ ءِ شاھدی ءَ دنت کہ جھان ءِ ھر کُنڈ ءَ زلم زوراکیانی بگیری ءَ چست بوتگیں توار پہ کُشت ءُ کوش ءَ ایرموش کنگ نہ بوتگ انت ءُ ناکہ ھلاس کنگ بوتگ انت – مدامی زوراکاں جھد کارانی بگیری ءَ زوراکی ءَ گوں آ ایردست کنگ ءِ ھاتر ءَ وڈ وڈیں ھنر ھیلا کارمرز کتگ ءُ ھمے وڈا بلوچانی گوم ءَ ھم کنگ بوگ ءَ انت کہ ھما اولی روچ ءَ سال 1948 ءَ پاکستان ءَ وتی لشکر ءِ گوم ءَ زوراکی کنان ءَ کبزہ کتگ چرائی پد ھما انت اے ایردستی ءِ برجاہ دارگ ءِ ھاتر ءَ لشکر کشی، بلوچ ءِ چکچینی، ژانگولیں جونانی چگل دیگ ءِ ھنر کنگ بوگ ءَ انت –

ماما قدیر بلوچ ءَ گوشتگ دژمن نوکتر ھنر ءُ ھیلاں بلوچ جھد ءِ بگیری ءَ.کار کنگ ءَ انت بلوچ سیاسی باسک، ڈاکٹراں ھوار ھر تک ءُ پھناتاں سیادی داروکیں مردم جنگ بوگ ءَ انت – استان ءَ بلوچ زالبولانی توار ءِ ایرموش کنگ ءَ پیشیگیں وڈو ڈول وتیگی کتگ ءُ نوکیں دابے ءَ کنگ ءَ انت – آئی پدریں درور ایش انت کہ استان ءِ چیریں ادارہ سی ٹی ڈی گِسانی سر ءَ بیڑ برگ بیھار دیگ بلوچ زالبولانی سر ءَ توپک دارگ ءُ کہ ھک جھد ءَ دزکش بہ بنت وتی توار ءَ چست مہ کن انت بلے بلوچ مات ءُ گھاراں راستی توار ایرموش بوگ ءَ نہ اشتگ استان ءِ بیھار ءُ زوراکی وتی زمیر سر ءَ حاوی بوگ ءَ نہ اشتگ کہ ھمے سوب انت بلوچ زالبول پُرایمنیں جھد ءِ تہ ءَ وتی کرد ءَ جوانی ءَ پیلو کنگ ءَ انت –