آئی پی ایل 2023: کولکاتہ نائٹ رائیڈرز ءَ رائل چلنجرز بنگلور ءِ دیم ءَ بیست ءُ یک رناں گوازی کٹ اِتگ

انڈین پریمئیر لیگ ءِ شانزدھمی سیزن ءِ سی ءُ ششمی گوازی ءَ کولکاتہ نائٹ رائیدرز ءَ بیست ءُ یک رناں گوازی کٹ اِتگ –

کے کے آر نیمگ ءَ دیگ بوتگیں دوسد ءُ یک رنانی ٹارگٹ آر سی بی ءَ پروشت نہ کُتگ ءُ آئی ءَ ھشت وکٹاں بس یکسد ءُ ھپتاد ءُ نُھ رن جوڑ کتگ ءُ اے آر سی بی ءِ ھشت گوازیانی تہ ءَ چارمی بے سوبی انت –

ٹارگٹ ءِ پروشگ ءَ آر سی بی اولی وکٹ سِی ءُ یکمی اسکور ءَ کپتگ کہ فاف ڈوپلیسس ءَ ھبدہ رن جوڈ کتگ ءُ آؤٹ بوتگ -پدا آر سی بی ءِ پنجاہ ءُ یک رن بوتگ انت کہ سویش شہباز احمد ءَ ایل بی ڈبلیو کتگ ءُ واتر دیم داتگ ـ آر سی بی ءِ نیمگ ءَ میکسویل ءَ ھم جوانیں گوازی پیش نداشتگ کہ آئی چار بالاں ہنچ رن جوڑ کتگ ءُ ورون دست ءَ آؤٹ بوتگ کہ پدا رند ءَ مہیپال ءُ وراٹ ءَ آر سی بی ءِ اسکور سد ءَ سرکتگ –

مہیپال ھژدہ بالاں سِی ءُ چار رنانی جوڈ کنگ ءَ پد آؤٹ بوتگ ءُ وراٹ ءَ اے سیزن ءِ تہ ءَ وتی پنچمی نیم سنچری سرجم کتگ کہ آئی ءَ سِی ءُ سَے بالاں نیم سنچری کتگ وھدیکہ پنجاہ ءُ چار رنانی جوڑ کنگ ءَ پد آؤٹ بوتگ چدوپد سویش دھ رنانی جوڑ کنگ ءَ پد رن آؤٹ بوتگ – کے کے آر ءِ نیمگ ءَ ورون چکروتی ءَ سَے وھدیکی سویش شرما ءُ آندرے رسل ءَ دو دو وکٹ گپتگ –

چدو پیسر اولسر ءَ بیٹنگ ءَ اتکگیں کولکاتہ نائٹ رائیڈرز کپٹن نتیش رانا سروکی ءَ پنچ وکٹان دو سد رن جوڈ کتگ – رائے ءَ بیست ءُ نھ بالاں پنجاہ ءُ شش رن جوڈ کتگ وھدیکہ رانا ءَ بیست ءُ یک بالاں چِل ءُ ھشت رن جوڈ کتگ – آر سی بی ءِ نیمگ ءَ ونندو ہسرنگا ءُ وجے کمار ءَ دو دو وکٹ گپتگ –