پد ءَ ائید اَتکگ
نبشتہ کار : شازیہ بلوچ
دی بلوچستان پوسٹ
باندا اَئید اِنت، گْوش اَنت کہ اَئید یک وشیں روچے ءُ اِے روچ ءَ مردم شاتکامی کن اَنت، گَل بنت ءُ وت ءَ سمبھین اَنت۔ مرد ءُ جنین آدم نوکیں پُچ ءُ چمپل گور ءَ کن اَنت، گوں وتی سْیاد ءُ وارساں ھَک ءُ پِھلی کن اَنت۔ تر ءُ گرد کن اَنت، سھیل ءُ سواد کن اَنت۔
ھو واکی اِے روچ وَ اَنچیں رُوچے بلے اِے ائید پہ بلوچ راج ءِ واست ءَ نہ اِنت! اِے روچ پہ بلوچ ءَ یک دردناکیں روچے، ابیتکیں روچے ءُ اَرس گْوارینگ ءِ رُوچے، چیاکہ اِے روچ ءَ ھَما راج ءُ مھلوک وش ءُ وشھالی ءَ گْوازین اِیت کہ آ آزات اِنت ءُ ڈیھ ءِ وتواجہ اِنت۔
آئی ءَ رَا ھچ گَم نیست، راج ءِ گوں وتی کول ءُ مردماں گل اِنت ءُ راج ءِ ھر ٹَک ءُ تبک ءِ یکجاہ اِنت۔ بلے بلوچ راج اِے روچ ءَ ھم پہ وتی بیگوائیں برات ءُ گْوھارانی واست ءَ دگ ءُ راھانی سر ءَ کپتگ ءُ آہ ءُ زاری کنگ ءَ اَنت، پریات کنگ ءَ اَنت۔ بہ چار اگاں یک گِسے ءِ یک براتے گار بہ بیت یک گوھارے زندان ءَ کید ءُ بندیگ بہ بیت یا یک لاشے دیگ بہ بیت گڑا آ گِس ءِ مردم چوں اَئید کُت کنت؟ آ چُوں اِے روچ ءَ پہ وشی گْوزینت کنت؟-
بلے بژن اِنت کہ مئے بلوچ راج اِے وشیں روچ ءَ پہ گریوگ گْوازین اِیت، دگ ءُ راھانی سر ءَ گوں ارسیگیں چماں زھرشانی ءَ گْوازین اِیت۔ اَئید روچ ءَ ھم مئے راج زھرشانی ئیں روانک کَش اِیت، کوکار کنت ءُ ابیتک بیت۔
اَئید! پہ مارا مئیا ءُ مارا مہ گریوین ، مارا ابیتک مہ کن ءُ مئے ٹپّاں تاجگ مہ کن، چیاکہ وھدے تو اِے روچ ءَ کا ئے ترا سکیں ملوریں گْواتے گون اِنت پد ءَ ھرگور ءَ یک ابیتکی یے شِنگ ءُ تالان کنت۔
اَئید! تو زان ئے وھدے کہ تو کا ئے گُڑا مارا وتی بیگوائیں بْرات یات کا اَنت ، مارا شھید بوتگیں بْرات یات کا اَنت ءُ پد ءَ ھمے گْوھار ءُ بْرات گِندئے زِندان ءَ بندیگ اَنت ۔ اِیشانی واست ءَ من سک ابیتگ باں چی ءَ کہ باریں چُنت سال بیت اِے ھمے یکیں تھاریں کوٹی ءَ پہ گُژن بندیگ اَنت ءُ مُدام بدوائیں دُژمن ایشاں کٹ ءُ شاپ کنگ ءَ اِنت۔ ءُ پد ءَ اِے ائید ءِ روچ ءَ من نندان ءُ وت ءَ گوں وت گریو آں پِٹ ءُ لانت بات چوشیں گُلامیں زِند ءَ، گُلامی ءَ لانت بات۔
اَئید تو پہ بلوچ ءَ مَئیا!
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔