سراوان: پرپٹاں تیل کشیں دو مردم دگ ءِ وئیل ءَ بیران

روکپتی بلوچستان ءِ دمگ سراوان ءَ ایرانی مرساد ءَ تیل کشانی رندگیری کنان ءَ دو پرپٹ سواراں ٹکر وارتگ ءُ چریشی ءَ پرپٹاں لڈ اتگیں تیلاں آس کپتگ ءُ ھردوکیں مردم ستکگ ءُ بیران بیتگ اَنت-

گیشیں ھالانی رد ءَ سراوان ءِ دمگ ناھوک ءَ گوستگیں شپ ءَ ایرانی مرساد ءَ تیل ءِ باپار کنوکیں دو پرپٹانی رندگیری کنان ءَ پرپٹاں ٹکر وارتگ ءُ چریشی ءَ پرپٹ ءَ سواریں دو مردم ستکگ ءُ بیران بیتگ اَنت-

وئیل ءَ بیران بیتگیں مردمانی نام ءُ پجار زانگ نہ بیتگ اَنت – تامر بند ءَ گندگ بیت اِنت کہ اود ءَ ھردوکیں پرپٹاں آس کپتگ ءُ جمبیر اِنت –

ھالانی رد ءَ گوشگ بیتگ کہ پرپٹانی ٹکرورگ ءَ پد ءُ اود ءَ آس ءِ جمبیری ءَ پد مرساد ءِ پورس ءَ پُشت مانداتگ ءُ شتگ ءُ مردمانی کمک وتی جاہ ءَ پشکپتگ ءُ مردم ستکگ ءُ بیران بیتگ اَنت-

زانگ بہ بیت تیل ءِ باپار ھما جان کُشین باپار اِنت کہ ایشی ءَ بلوچستان ءَ بندوکیں مردم ھما وتی لاپ ءِ والینگ ءَ ھمے کار ءِ نیمگ ءَ وتی دیم ءَ ترین اَنت بلے اے کار پرایاں یک جان کُش ءُ زند ءِ ناوشیں درچے جوڑ بیت اِنت –

اے وڑیں وئیل بے کساس بیگ ءَ اَنت ءُ اود ءَ وڑے نا وڑے ءَ تیل کش ایرانی لشکر ءِ تیرگواری، رندگیری یا گاڑی ءِ چَپ بوگ ءَ مرگ ءُ زدگ بوگ ءَ اَنت –