بلوچ گھگیری ءِ نشان ھمل جیئند ءِ گرافک ناول ایمیزون ءَ شنگ بوتگ

بلوچستان ءِ گوستانک سازیں نام ھمل جیئند ءِ زند ءِ سر ءَ گرنچ دیگ بوتگیں اے ناول ای بُک ءِ دروشم ءَ شنگ کنگ بوتگ –

گوادر ءِ جھمنندیں ورنا نبیل احمد بلوچ ءِ نیمگ ءَ ھمل جیئند “بلوچانی زھم” ءِ بنگپ ءِ سر ءَ شنگ بوتگیں گرافک ناول ایمیزون ءِ تہ ءَ ھم پہ بھا ءَ دست کپ ایت –

اے درگت ءَ ناول اکسکاری دروشم ءَ ناولگرنچکار نبیل احمد بلوچ ءِ گوشگ انت کہ آ سک باز وش انت کہ آئی اِی بُک گرافک ناول ایمیزون ءِ تہ ءَ شنگ بوتگ – آئی ءَ گوشتگ کہ من وتی کتگیں کارانی سر ءَ شات آں –

نبیل احمد ءَ گوشتگ کہ اے گرافک ناول 15می سدی ءَ چہ بلوچستان ءَ سیادی داروکیں نامداریں جنگول ھمل کلمتی ءِ درگت ءَ انت کہ آئی ءَ مکران ءِ زر ءِ سر ءَ کبزہ کنوکیں پرتگالیانی بگیری ءَ ھما وھد ءَ اُرش کتگ کہ وھدیکہ پرتگالیاں ھندوستان ءُ اُمان ءِ زر ءِ گپتگ ءُ نوں مکران ءِ زر ءَ گرگ ءِ شور کتگ –

آئی ءَ گوشتگ کہ کسھے تہ ءَ دیمتر ءَ نبشتہ کہ پرتگالیاں وتی زورگیری ءِ وھد ءَ لوئس ڈی المیہ ءِ کمانداری ءَ بازیں جاھاں اُرش کتگ بوتگ بلے ھر رند ءَ ھمل جئیند ءَ گوں وتی جنگولانی ھمراھی ءَ پرتگیز ارشکار پد کنزین اِتگ انت ءُ گڈی ساہ ءَ تاں وتی راج ءُ ماتیں سرڈگار بلوچستان ءِ گون ءَ مھر کُتگ ءُ یک تمرد ءُ باکردیں بلوچے ءِ وڑ ءَ وتی جان ءِ دیمونی داتگ –

نبیل بلوچ ءَ چہ وانوکاں دزبندی کتگ کہ آ اے کتاب ءَ الم بوان انت ءُ ایشی ءِ ھمراھی ءَ ایمیزون ءِ تہ ءَ منی کار ءِ دلبڈی دیگ بہ بیت تانکہ تانکہ گیشر کار کنگ ءِ ھب بہ بیت –