بی ایس او آزاد ءِ دراجیں پند
نبشتہ کار: نوکاپ بلوچ
دی بلوچستان پوسٹ
دُنیا ءِ بُندپتر ایردستیں راجانی آجوئی ءِ جُنزاں سینگار اِتگ، بُندپتر ءِ ھمک اھد ءَ زورگیر ءِ ھلاپ ءَ گھگیری کتگ ءُ آئی ءَ را چہ وتی سرڈگار ءَ گلینتگ۔ ھما راج کہ آیاں زورگیری ءُ ایردستی ءِ دیم نہ داشتگ ءُ ھاموش بوتگ اَنت تاں آیانی راجی شُناس پَشت نہ کپتگ۔ چوناھا ایردستی ءِ ھلاپیں جُنزانی گُڈی ءُ آسری مکسد وتی ڈگار، راجی شناس ءُ وتواجھی ءِ پدجَنگ اِنت۔ دُنیا ءِ ھمک آشوبی جُنزانی ساہ ءُ ارواہ ورنا بوتگ اَنت ءُ ھست اَنت۔ درائیں جُنزاں ورنایانی مزنیں بستارے بوتگ آیاں مدام زورگیر ءِ ھلاپ ءَ پاد آھگ ءِ سکین راج ءِ ورنایانی اندر ءَ پیداک کتگ ءُ آیاناں جھد ءِ بھر جوڑکتگ۔ دومی جھانی جنگ ءَ اپریکہ ءِ ایردستیں زمینانی ورنا اردیں کہ پرتگال ءِ جِتائیں شاھدربراں پہ وانگ ءَ رو اَنت اُود ءَ زورگیر ءِ مُشتگیں وانگی رھبند ءِ ھلاپ ءَ ورنایاں یکمشت کن اَنت ءُ”سینٹر آف افریقی اسٹیڈیز “ءِ بُنھشت ءَ ایر کن اَنت؛ ھمے پتر ءَ چہ ورنایانی سیاسی ءُ پگری ھیلکاری ءَ کن اَنت۔ ایردستی ءِ ھلاپ ءَ جھد ءِ بھر بنت امیلکار کیبرال کہ آ زمانگ ءَ اود ءَ وانگ ءَ بیت ءُ سرکلانی بھرے بیت کہ رند ءَ گنی بساؤؔ ءُ کیپ وردےؔ ءِ آجوئی جنز ءِ رھشونی ءَ کنت۔ روچ ء مروچی بُندپتر آئی ءَ را مزنیں آشوبی رھشونے سرپد بیت۔ ھمے سیاسی ءُ پگری مھکمیانی برورد ءَ اپریکہ ءِ ورنایاں وتی راجی واب(مِشن) ءَ پول اَنت ءُ زورگیر ءِ ھلاپ ءَ پہ جنگ ءَ جاڑیگ بنت۔ ھمے وڑیں درورے مارا بنگلہ دیش ءِ آجوئی ءِ سَپر ءَ گِندگ ءَ کیت کہ اُود ءَ ورنا وتی زاتی واب ءُ واھشتاں کربان کن اَنت ءُ پہ وتی مھلوک ءِ آجوئی ءُ آسودگی ءَ داں گُڈی نَپس ءَ جھد ءَ گوں بندوک بنت ءُ دژمن ھر زوراکی ءُ ناروائیانی دیم ءَ چو کوہ ءَ مِک بنت۔
دُنیا ءِ ایدگہ ایردستیں راجانی وڑ ءَ بلوچ اُوں داں ھما روچ ءَ کہ ایردست بوتگ اَنت گھگیری کنان ءُ پیداک اَنت۔ اے دراجیں سَپر ءَ بلوچستان ءِ ھر کوچگ ءُ میتگاں وتی راجی سروک ءُ جھدکارانی کبرستان آباد کتگ اَنت، بلے بلوچ چہ جھد ءَ کدی پشت نہ کِنز اِتگ ءُ نئیکہ کنز ایت۔ اے سپر ءَ بلوچ ورنایاں مدام پہ راجی شناس ءِ رکینگ ءَ وت ءَ را منظم ءُ یکمشت کنگ ءِ جھد کتگ داں دُژمن ءِ دیم دارگ بہ بیت۔ اے واب ءِ بندات 1962ءَ چہ بلوچ ایجوکیشنل آرگنائزیشن ءَ بیت کہ اولی رند ءَ بلوچ ورنا وت ءَ یکمشت کنگ ءِ ھاتر ءَ گلے ءِ بُنھشت ءَ ایر کن اَنت؛ اے گل ءِ مکسد بلوچ ورنایاں یکمشت ءُ یکراہ کنگ ءَ ھوار آیانی سیاسی ءُ پگری ھیلکاری بیت داں آ دیمتر ءَ بلوچ جُنز ءَ را مَنانکی ءُ سائنسی رد ءَ بہ جُنزین اَنت ءُ دژمن ءَ پروش بہ دینت۔
اے ھمے زمانگ انت کہ ایوب ءِ ھکومت اتکگ ءُ بلوچستان ءَ سرجم ءَ آس روک اِنت، سیاسی چست ءُ ایرانی سر ءَ پابندی اِنت۔گل ءِ نام ءَ را ایجوکیشن ءِ لبز ءِ مان کنگ ءِ مکسد ھمے بیت کہ دژمن مہ زانت ورنا سیاست کنگ ءَ اَنت؛ آ چَرے گپ ءَ رازیگ بہ بیت کہ گل ءِ منّ ءُ مراد وانگی جیڑھانی گیش ءُ گیواری اِنت۔ اے سپر داں 1967ءَ گل ءِ اولی کماش چنگیز عالیانی سروکی ءَ برجم اَت بلے اے زمانگ ءَ گل ءِ کار ءُ پروگرام ایوک ءَ کراچی ءَ بوگ ءَ ات انت پمیشکا گل ءِ مھکمیں سنگت ءُ جھدکارانی میان ءَ ترانے چست بوت کہ چون بلوچستان ءِ کُنڈ کُنڈ ءَ سر بوگی اِنت ءُ بلوچ ورنا یکمشت ءُ یکراہ کنگی اَنت۔ ھمے ترانانی برورد ءَ 26 نومبر 1967ءَ کہ کونسل سیشن بوت گل ءِ نام ءِ تہ ءَ لبز ایجوکیشن کشگ بوت نوں گل سرجم ءَ بلوچ نودربر ءُ ورنایانی اَت دیوان ءَ پیسلہ زورگ بوت کہ نوں گل وت ءَ را بلوچستان ءُ سندھ ءِ ھر ھما دمگ ءَ سر کنت کہ اُود ءَ بلوچ آباد اَنت۔ ھمد ءَ بی ایس او دیم ءَ کیت، بی ایس او کہ بلوچ جُنز ءِ ساہ ءُ نپس اِنت، آئی ءِ اولی کماش عبدالحی بلوچ ءُ جنرل سیکٹری بیزن بلوچ گچینگ بنت؛ امیت ھمے بیت بلوچ ورناہ جوانیں بانداتے ءِ نیمگ ءَ رھادگ بنت بلے چوش نہ بیت چہ ھمداں بی ایس او ءِ لیڈرشپ ءِ وت ماں وتی نہ مَنّگ سر کش اَنت چیاکہ آیانی یک ٹولی یے نیپ ءُ دگہ ٹولی یے پیپلز پارٹی ءِ رندگیری ءَ کنت، ایشی ءِ سوب ءَ بھتام جنوکائی ءُ کَچّہ چینی(نقط چینی)ءِ ناکُٹوکیں دْرچے بندات بیت، پادکشی ءُ بھتام جنی بی ایس او ءَ ٹُکر ٹُکرانی تہ ءَ بھر ءُ بانگ کنت۔ آ زمانگ ءَ پیپلز پارٹی ءِ منوکیں ٹولی ءِ گلہ ھمیش بیت کہ عبدالحی گوں وتی ٹولی ءَ بی ایس او ءَ سردارانی دست ءَ دیگ ءَ اَنت ءُ عبدالحی ٹولی نند ایت ءُ پیپلز پارٹی ءِ ٹولی عبدالرحیم ظفر ءُ ھمراھانی پُچکاں بیت۔ کمے مدت ءَ رند بی ایس او دو ٹکرا بھر بیت، عبدالرحیم ظفر ءِ سروکی ءَ دومی بی ایس او انٹی سردار جوڑ بیت ءُ یک نیمگے عبدالحی ٹولی ءُ دومی نیمگ ءَ عبدالرحیم ظفر ءِ ٹولی بیت۔ عبدالحی ٹولی نیپ ءِ ءُ اینٹی سردار پیپلز پارٹی منوک بیت ءُ پرایاں کار کنت۔
اے چست ءُ ایر ھمے وڑ ءَ جنزان بنت داں 1972ءَ بی ایس او اینٹی سردار ءِ اولی کونسل سیشن ءَ رند تاج بلوچ آئی ءِ اولی کماش بیت۔ دومی نیمگ ءَ بی ایس او عوامی ءِ کونسل سیشن اردو کالج کراچی ءَ بیت کہ آئی ءِ کماش عبدالنبی بنگلزئی گچین کنگ بیت کہ مروچی آ بلوچ راجی جُنز ءِ براھمندگیں ناماں چہ پجارگ بیت اِنت۔1974ءَ اے دوئیں بی ایس او تپاکی ءِ پتر ءَ پہ آیگ ءَ رازیگ بنت ءُ ھوری ءَ کونسل سیشن ءَ کن اَنت کہ اود ءَ ایوب بلوچ کماش ءُ یاسین بلوچ جنرل سیکریٹری نامینگ بنت داں 1986ءَ بی ایس او یک سرجمیں ءُ برجمیں گلے بیت، بلے 1986ءِ کونسل سیشن ءَ یاسین بلوچ کماش گچین کنگ بیت داں پد ءَ جیڑہ سر کَش اَنت ءُ ڈاکٹر کھور خان 1987ءَ بی ایس او سھب ءِ نام ءَ دگہ بی ایس او یے جوڑ کن اَنت۔ 19می کرن ءِ گُڈی دَھکاں بی ایس او بُندپتری پولنگی یے چِنت۔ اے بی ایس او بُندپتر ءِ ناوشیں دور ءُ باریگے زانگ بیت کہ بی ایس او ءَ مردمانی زاتی واھشت ءُ پارٹیانی دزمانجی انگیر کن اَنت۔
اے سرجمیں چیزانی بوگ ءَ ابید اوں بی ایس او ءِ مُھکمیں نظریاتی سنگت وڑے نہ وڑے ءَ جھد کن اَنت کہ بی ایس او ءَ ایوک ءَ ورنایانی یکمشت کنگ ءُ راجی زلمانی ھلاپ ءَ آوازے جوڑ بہ کن اَنت۔ نمیرانیں فِدا بلوچ ءِ وڑیں رھشون اوں بوتگ اَنت کہ پہ ورنایانی سیاسی ءُ آشوبی ھیلکاری ءَ روچ ءُ شپ اِش نہ چار اِتگ؛دژمن ءِ ھلاپ ءَ مھکمی ءَ اوشتاتگ اَنت بی ایس او ءِ بُندپتر ءَ را نمیرانیں حمید بلوچ وڑیں بامرد مزن کن اَنت کہ وتی سر ءِ کربان کنگ ءَ چَک ءُ پد نہ بنت بلے دژمن ءِ بلوچ ءَ را”بھا زوریں سپاھی “راجی جوزگ ءِ میان ءَ اڑاند بنت اِنت۔
بی ایس او ءِ پرشت ءُ پروش، بھر ءُ بانگی ءِ بام ھما وھد ءَ دنت اردیں راجی سروک ءُ آ زمانگ ءِ بی ایس او محراب ءِ کمک کماش ڈاکٹر اللہ نذر بلوچ 2002 ءَ بی ایس او آزاد ءِ بُنھشت ءَ گوں تچکیں لیکھے ءَ ایر کنت کہ بی ایس او آزاد پہ راجی آجوئی ءَ ورنایانی سیاسی ءُ آشوبی ھیلکاری ءَ کنت۔ ایشی ءِ بُنکی سبب بی ایس او محراب ءِ کماش نادر بزنجو ءِ پاکستانی پارلیمنٹ ءِ بھر بوگی بیت۔ھما روچ ءَ رند ڈاکٹر اللہ نذر گوں ایدگہ نظریاتی سنگتاں پارلیمانی سیاست ءَ گِستا بوگ ءِ داوا ءَ کنت ءُ جُتا بی ایس او آزاد ءِ کونسل سیشن ءَ ایر کنگ بیت ءُ آئی ءِ اولی کماش ءَ ھم ھمائی ءَ را گچین کن اَنت۔ آ زمانگ ءَ بی ایس او آزاد ءُ محراب ءَ ھوار دگہ دو بی ایس اوں بیت یکے بی ایس او مینگل بیت کہ بی این پی مینگل ءِ بیرک ءِ چیر ءَ سیاست کنگ ءَ بیت دگہ یکے بی ایس او استار بیت کہ بی این پی عوامی ءِ پلامرزی ءَ کنگ ءَ بیت پد ءَ بی ایس او استار کماش حمید شاہین ءِ سروکی ءَ بی ایس او آزاد ءَ گوں ھوار بوگ ءِ جار ءَ جنت۔ ھوار بوگ ءَ رند بی ایس او آزاد وتی نام ءَ آزاد ءَ چہ متحدہ کنت، بی ایس او متحدہ ءِ کونسل سیشن پنجگور ءَ کنگ بیت، ڈاکٹر امداد بلوچ کماش ءُ سعید بلوچ جنرل سیکریٹری بنت۔ بی ایس او آزاد ءُ استار ءِ ھور بوگ ءَ رند نودربر سیاست ءَ گوں بَستگیں سنگتانی میان ءَ دگہ ترانے جَھ جنت کہ کُلیں بی ایس او ھور کنگ بہ بنت ءُ 2006ءِ کونسل سیشن ءَ بلوچ جنز ءِ شھسواریں رھشون بشیر زیب کماش، زاھد بلوچ کمک کماش ءُ گلزار بلوچ جنرل سیکریٹری گچین کنگ بنت۔ اے سیشن ءَ کُلیں بی ایس او ھوار بنت ءُ بی ایس او ءِ دیم ءَ سنگل ءِ نام آرگ بیت؛بلے کونسل سیشن ءِ میان ءَ ایراد سر کَش اَنت ءُ محی الدین بلوچ جتا بی ایس او یے جوڑ کنت کہ بی ایس او پجار ءِ نام دنت ئے ءُ بی ایس او سنگل وتی اے نام ءَ دور کنت ءُ پد ءَ بی ایس او آزاد کنت۔
چہ ھما روچ ءَ بی ایس او آزاد وتی سپر ءَ بندات کنت بلوچستان ءِ دمگ دمگ، کوچگ کوچگاں وت ءَ سر کنت ءُ بلوچ ورنایاں پہ آشوبی جھد ءُ زمین ءِ آزاتی ءَ سکین دنت۔ ایشی ءَ زورگیریں پاکستان پہ وت ءَ مزنیں ترسے سرپد بیت چیاکہ بی ایس او آزاد ءِ سنگتاں ورنا ھمے باور کنائینتگ ات انت پہ آزاتی ءَ جنگ ءُ گھگیری ھمک پُسگ ءِ سر ءَ پرز اِنت۔ دومی نیمگ ءَ نمیرانیں گلام مھمد ءِ سروکی ءَ بی این ایم بلوچ ءِ لوگ لوگ ءَ سر اَت، مھلوک ءِ میان ءَ راجی سنچ ءُ گلامی ءِ راستی پدر ات انت۔ بلوچستان ءَ چوشیں لوگے پشت نہ کپتگ اَت کہ پاکستان ءِ ھلاپ ءَ پاد نہ یتکگ اَت۔ یک نیمگے سلاھبندیں گَلاں دژمن ءَ را دار دپ ءَ داتگ اَت گڑا دومی نیمگ ءَ بلوچستان سرجم ءَ war zone یے جوڑ بوتگ اَت۔ بی ایس او آزاد ءِ ورنایاں نہ شپ چار اِت نیکہ روچ۔ بلکیں آ مدام جھد ءَ گوں ھمگرنچ ات انت، آجوئی ءِ اوگام اَت، کوکار اَت، جلسہ اَت، جلوس اَت دگّانی سر ءَ آس روک ات انت، سرکاری دپتر بُن ات انت، پیر ءُ ورنا، چُک ءُ زالبول درست پاد اَتکگ اَت انت ءُ آزاتی ءِ اوگاماں میتگ دو میتگ ءَ کرتگ ات۔
دژمن چَرے اُلسی جنز ءَ دلترک اَت ءُ بی ایس او آزاد ءَ سرجم ءَ کریک ڈاؤن کنگ لوٹگ ءَ اَت، ایشی ءِ بندات 8 جون 2009 ءَ گل ءِ کمک کماش زاکر مجید ءِ آوارجَنی ءَ چہ بیت کہ آ روچ ء مرچی دژمن ءِ زندان ءَ ازیت اوپار کنگ ءَ اِنت، ایشی ءَ چہ رند بی ایس او آزاد ءِ بنجاھی مجلس ءِ باسک کمبر چاکر آوار جنگ ءَ پد نمیران کنگ بیت۔دژمن ءِ سرجمیں تاکت بی ایس او آزاد ءِ سرجم ءَ پروش دیگ ءِ سر ءَ بیت پد ءَ گل ءِ بنجاھی جونیئر جوائٹ سیکرٹیری سنگت شفیق آوار جنگ بیت ءُ آئی ءِ ژانگولیں جون ویرانگے ءَ دور دیگ بیت۔ ھمے وڑ ءَ رندتر ءَ بنجاھی مجلس ءِ باسک کامریڈ قیوم چست کنگ ءُ کشگ ءِ شوربندی ءِ زد ءَ کیت گوں۔ بلے پہ بی ایس او آزاد ءِ لیڈرشپ ءَ اے چوشیں گپے نہ ات انت چیا کہ بی ایس او ءِ سنگت سرپد ات انت کہ دژمن بِھ نہ لوٹ ایت جھد ھمے وڑ برجاہ بہ بیت، سنگتانی آوارجنی ءُ ژانگولیں جون لیڈرشپ ءَ مھکم کنگ ءَ ات انت۔ سنگتاں کربانی ءِ وڑیں عظمیں راہے گچینتگ اَت، مرگ کوپگاں زرتگ اَت، جنزگ ءَ ات انت، کار کنگ ءَ ات انت ءُ گلءَ را مہمھکم کنگ ءِ جھد ءَ ات انت۔
سئے سال گوں ھمے جاوراں گوست۔ 2011 ءَ آرگنائزنگ باڑی یے ٹھیت کہ لمہ ء وتن کریمہ بلوچ آرگنائزر ءُ ڈپٹی آرگنائزر زاھد بلوچ بیت۔ 2008 داں 2012 ءِ کونسل سیشن ءَ بی ایس او آزاد ءِ جوانیں کامریڈ ءُ سنگت نمیران کنگ بوتگ ات انت ءُ بازیں سنگتے دژمن ءِ ٹارچر سیلاں اَت۔ اے چاریں سالانی میان ءَ بی ایس او آزاد ءِ بنجاھی مجلس ءَ بہ گر داں ھنکین ءُ بُنزھاں بیا ھر کجا سنگتے نمیران بوتگ اَت، سنگتے بیگواہ اَت بلے آئی ءِ لیڈرشپ ءَ سرجمیں جاورانی مکابلہ کت ءُ گل ءِ نوزدھمی کونسل سیشن ءِ نیمگ ءَ جنز ات انت۔ چوشکہ لس مجلس مشکے ءَ برجم دارگ بوت ءُ کونسل سیشن ءَ زاہد بلوچ کماش ءُ لمہ ء وتن کریمہ بلوچ کمک کماش ءُ نمیرانیں رضا جھانگیر جنرل سیکرٹری گچین کنگ بنت اِنت –
اے زمانگ پہ بی ایس او آزاد ءَ سکیں سنگینے زمانگے اَت، یک نیمگے دژمن ءِ کشگ ءُ دور دیگ ءِ دْرچے بندات اَت دومی نیمگ ءَ بی ایس او ءِ ھلاپ ءَ رسانکدراں وڑ وڑیں گپ ءُ بھتام بندی بوگ ءَ اَت سیمی دژمن ءِ کریک ڈاؤن ءِ سوب ءَ بازیں ھنکینے ھلاس ءُ غیر فعال ات انت۔ بی ایس او ءِ سر ءَ پابندی جنگ بوتگ اَت ءُ رد کانودی کشگ بوتگ اَت؛ اے وڑیں سنگینیں جاورے ءَ نمیرانیں رضا جان بلوچستان ءِ جُتائیں دمگانی دورہ ءَ روت۔ نگیگی وتی جاگہ ءَ برجم ات انت بلے رسانکدر ءَ جتگیں بھتامانی سرپد کنگ ءُ ھنکینانی فعال کنگ المی اَت رضا جان سپر ءَ اَت ءُ دژمن ءِ چم ءِ چیر ءَ اَت داں 14 اگست 2013ءَ رضا جان کیچ ءَ ماں نمیرانیں امداد بوجیر ءِ گس ءَ دژمن ءَ گوں دیم پہ دیم بیت داں وت ءُ امداد نمیران کنگ بنت اِنت۔ دژمن ءِ سرجمیں زور انگت بی ایس او ءِ سر ءَ ات انت، ھر میتگ ءُ دمگاں بی ایس او ءِ سنگت دژمن ءِ چمانی چیر ءَ ات انت؛ ھمے میان ءَ گل ءِ کماش زاہد بلوچ ءَ 14 مارچ 2014ءَ چہ شال ءَ دژمن ءِ چیریں ادراہ آوار جن اَنت نوں پہ گل ءَ کارانی دیم ءَ برگ مزنیں چیلنجے بیت، بلے گل ءِ لیڈرشپ گوں مھکمی ءَ جاورانی دیم ءَ اوش ایت۔ اے انچیں وھدے کہ سوشل میڈیا ءَ بی ایس او آزاد ءِ ھلاپ ءَ مھلوک ءَ را بدل کنگ ءَ وڑ وڑیں دروگ ءُ بھتام بندی بوگ ءَ اَت اَنت؛ دومی نیمگ ءَ گل ءِ کماش آوار جنگ بوتگ بلے نمیرانیں رھشون لمہء وتنؔ ءُ ایدگہ سنگتاں مھکمی ءَ گوں جاورانی دیم ءَ دار اَنت۔ زاہد جان ءِ آوار جنی ءِ ھلاپ ءَ پروگرام ٹھین اَنت کراچی پریس کلب ءِ دیم ءَ داں 46 روچ ءَ مرگ ھڑتالی نندانکے جن اَنت۔
دژمن ءِ زوراکیانی دیم ءَ داران ءَ بی ایس او آزاد 20می کونسل سیشن ءِ نیمگ ءَ روت کہ نمیرانیں کریمہ بلوچ کماش ءُ عزت بلوچ عرف ثنا بلوچ جنرل سیکرٹری بنت۔ یکبرے پد ءَ بی ایس او آزاد وتی پہ زمہ واریانی سرجم کنگ ءَ بلوچستان ءُ بلوچستان ءَ در وانگی ادراھاں گوں وت ءَ منظم ءُ مھکم کنگ ءِ جھد ءَ کنت ءُ ورنایاں وتی پروگرام ءَ سر کنت، بلے دژمن دژمن اِنت آئی ءَ را ھچبر اوپار نہ روت کہ بی ایس او آزاد بہ مان ایت پمیشکا آ وتی چست ءُ ایرانی ھمبرائی ءَ گشادی کاریت ءُ پہ بی ایس او آزاد ءِ ھلاس کنگ ءَ چن ءُ لانچ کنت۔ کونسل سیشن ءَ سالے بوگی اَت کہ گل ءِ مرکزی انفارمشن سیکرٹری شبیر بلوچ چہ کیچ ءِ دمگ گورکوپ ءَ آوار جنگ بیت اِنت کہ آ روچ ء مرچی دژمن ءِ زندان ءَ آجوئی ءِ اوگاماں گوں کوکار ءَ انت۔ شبیر بلوچ ءِ آوار جنگءِ دو روچ ءَ رند کولواہ ءَ مشکے زون ءِ زمہ وارے نمیران کنگ بیت بلے بی ایس او اَت کہ پشت کنزگ ءِ نامے نہ زانت، ھر وڑیں جاوراں وتی پروگرامے برجم داشت؛ لمہ ء وتن کریمہ بلوچ ءُ ایدگہ کامریڈاں سنگتانی نمیرانیں ءُ زاندانی ئیں ارواہ وتی اندر ءَ پناہ داتگ ات انت ءُ جنزگ ءَ ات انت کہ دیر نہ گوست کہ گل ءَ را دگہ جیڑہے دیم ءَ اَتک کہ 15 نومبر 2017ءَ گل ءِ جنرل سیکرٹری عزت بلوچ گوں دو بنجاھی باسک نودان بلوچ ءُ چراگ بلوچ ءَ آوار جنگ بنت اے پہ گل ءَ مزنیں چیلنجے اَت کہ چوں وت ءَ را بہ دار ایت، بلے سنگتانی پگری ءُ نظریاتی مھکمی اَت کہ گل ءِ پروگرام اوشت ءِ آماچ نہ بوت ءُ 13 اگست 2018ءَ گل ءِ 21 می کونسل سیشن بنام ءِ عزت بلوچ ءُ لکمیر بلوچ برجم دارگ بیت کہ سھراب بلوچ کماش گچین کنگ بیت ءُ بی ایس او آزاد پد ءَ جنزان بیت ءُ وت ءَ بلوچستان ءُ بلوچستان ءَ در ورنایانی کر ءَ سر کنت ءُ وتی راجی زمہ داریاں وتی کوپگاں کنت۔ دژمن ءِ دیم ءِ دارگ ءَ پہ بی ایس او وتی نوکتریں ھکمت عملیانی بنیاد ءَ جنزان کنت داں 2020ءَ 22 می کونسل سیشن ءَ سوبمندی ءَ گوں کنت کہ ابرم بلوچ کماش ءُ مھرزاد جنرل سیکرٹری بنت اے سپر داں مرچی جنزان اِنت۔ بی ایس او آزاد مرچی اوں ورنایانی میان ءَ اِنت، آیانی سیاسی ءُ پگری رھشونی ءَ ھوار پہ بلوچ جنز ءَ کیڈر پیداک کنگ ءَ انت ءُ یکبرے پد ءَ 23 می کونسل سیشن ءِ نیمگ ءَ روگ ءَ انت، امیت ھمیش اِنت کہ چو مدامی ئیں وڑ ءَ اے رندی اوں کونسل سیشن جوانی ءَ گوں بیت، نوکیں لیڈرشپ کیت سپر ءَ دیم ءَ بران کنت داں ھما روچ ءَ کہ نمیرانانی سر ءِ وارتگیں سوگند سرجم نہ بیت داں سپر نہ کُٹ ایت، اے سپر ءِ میان ءَ لَٹ، ٹارچرسِل شھادت ھرچیز بوت کنت بلے سپر ءِ آسر تھنا بلوچستان ءِ آجوئی اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔