بلوچستان : جتاجتائیں وئیلانی آسر ءَ ھپت مردم بیران، ھشت ٹپی بیتگ اَنت

بلوچستان ءَ جتاجتائیں دمگاں وتکشی ، تیرگواری ، دگ، کرنٹ ءُ جنگ ءَ چوپ ءِ وئیلانی آسر ءَ ھپت مردم بیران ءُ ھشت ٹپی بیتگ اَنت-

گیشیں ھالانی رِد ءَ ھُزدار ءِ دمگ وڈھ ءِ ھند لوپ ءَ لین کرنٹ ءِ لگگ ءَ چہ دو مردم ھما دمان ءَ مرتگ اَنت وھدے کہ یک مردمے ٹپی بیتگ- لاش ءُ ٹپی ئیں مردم ءِ جاور نگیگ گوشگ بیگ ءَ اَنت-

اِھوالکارانی رِد ءَ ھر سئیں مردم ٹیوب ویل مشین سر ءَ کار کنگ ءَ بیتگ اَنت کہ اناگاہ لین ءِ کرنٹ لگگ ءَ اے وئیل دیم ءَ اَتکگ-

دومی نیمگ ءَ چمن شاھراہ میزئی اڈہ ءَ ناشناسیں مردمانی تیرگواری ءَ چہ ھپیزاللہ الکوزئی نامیں مردمے بیران بیتگ-

ٍڈیرہ مراد جمالی ءَ ناشناسیں سلاہ بند لوگ ءَ پُترتگ اَنت ثناءاللہ بنلگزئی نامیں مردمے تیرگواری کتگ کُشتگ ءُ تتکگ اَنت-

ھمے وڑ چہ ژوب ءَ ھال اِنت کہ شیرانی ءِ دمگ کورئی وسطہ ءَ جنگ ءُ چوپ ءِ وھد ءَ اتکاپ ءَ نشتگیں شش مردم سک ٹپی بیتگ اَنت پہ الاج ھاتر ءَ نادُراھجاہ ءَ برگ بیتگ اَنت-

وھدے کہ مسلم باغ ءَ دگ وئیل ءِ آسر ءَ یک مردمے ٹپی بیتگ-

دومی نیمگ ءَ پنجگور ءَ ناشناسیں سبب ءَ چہ یک مردمے ءَ وتکشی کتگ ءُ وتکشی کنوکیں مردم ءِ پجّار جاسم ء غفار نام ءَ چہ بیتگ-

مردمانی گْوشگ اِنت کہ اے مرد ءَ وتکشی کنگ ءِ جُھد کتگ کہ بے ھوشیں جاوراں نادُراھجاہ ءَ برتگ کہ اود ءَ ڈاکٹرانی نہ بوگ ءِ سبب ءَ آ تربت ءَ برتگ کہ اود ءِ سر بوگ ءَ ساری بیران بیتگ-

دگہ یک وتکشی ءِ وئیلے نوشکی ءَ نکش کنگ بیتگ کہ اود وتکشی کنوکیں مردم ءِ پجّار عطاء اللہ لانگو نام ءَ چہ بیتگ-

تنی وھدے وتکشی کنگ ءِ سوب زانگ نہ بیتگ-

زانگ بہ بیت وتکشی ءِ وئیل ءِ دْرچ بلوچستان ءَ یکلشہ برجاہ ءَ اِنت اشی ءَ ساری ھم جتاجتائیں دمگاں وتکشی ءِ وئیل نکش کنگ بیتگ اَنت ھمے یکیں ھپتگ ءَ اے سیمی وئیل اِنت اشی ءَ ساری شال ءُ کوھلو ءَ زالبولے ءَ ھوار دو مردم ءَ وتکشی کتگ اَت-