بلوچستان ءِ دمگ کیچ ءُ کراچی ءَ چہ پاکستانی لشکریاں پنچ مردم دزگیر کنگ ءَ پد بیگواہ کُتگ ءُ ناشناسیں جاھاں بُرتگ اَنت۔
بیگواہ بیتگیں مردمانی پجار احمد نذیر، شعیب لیاقت، بابا مراد، وارث ءُ آصف ءِ ناماں چہ بیتگ۔
احمد نذیر ءُ شعیب لیاقت گوستگیں شپءَ تربت ءِ ھنکین آبسر ءَ چہ لشکریاں دزگیر کنگ ءَ ناشناسیں ھنداں بُرتگ اَنت۔ چم دستگیں شاھدانی ردءَ دزگیری ءِ وھدءَ لشکریاں ورناہ ترندیں لٹ شاپی ءِ نشانگ کُتگ اَنت ءُ گوں وت بُرتگ اَنت۔
زانگ بہ بیت آبسر ءَ چہ گوستگیں شپ ءَ سئے مردم لشکریاں دزگیر کُتگ کہ اِشانی تہءَ یکے ءِ پجار طاھر ءِ استاد عزیز ءِ ناماں چہ بیتگ۔
دومی نیمگ کراچی ءِ بلوچ گیشتری دمگ لیاری ءَ چہ سربیتگیں ھالانی ردءَ لشکریاں لیاری ءِ میتگ سرگوات کلری ءَ چہ بابا مراد، وارث ءُ آصف نامی ایں سئے مردم دزگیر کُتگ اَنت۔
اھوالانی ردءَلشکریاں لوگ ءَ بیڑ بُرتگ ءُ بابا مراد دزگیر کُتگ کہ آودہ کھول ءَ گھگیری ھم کُتگ چریشی آسر ءَ لشکریاں لوگ ءَ بیتگیں جنین ءُ چکانی سرءَ ترندیں لٹ شاپی کُتگ ءُ ھمے مردم بیگواہ کُتگ۔
وھدیکہ پولیس ءَ میریٹ ھوٹل ءِ سرءَ بیڑ بُرتگ ءُ آصف ءُ وارث زورانسری بیگواھی آماچ کُتگ ءُ ناشناسیں ھنداں برتگ اَنت۔ اھوالانی ردءَ سئیں بیگواہ بیتگیں مردم میریٹ ھوٹل ءَ سیکورٹی گارڈز اَنت کہ آ زورانسری بیگواھی ءِ آماچ کنگ بیتگ اَنت۔