بلوچستان ءِ دمگ ڈیرہ بگٹی ءَ ناشناسیں مردماں تیرگواری کُتگ ءُ یک مردمے کُشتگ ءُ یکے ٹپی کُتگ وھدیکہ سبی ءَ ناشناسیں مردماں جعفر ایکسپریس بمب اُرش ءَ نشانگ کُتگ۔
ڈیرہ بگٹی ءِ ھند مرو ءَ ناشناسیں سلاہ بندیں مردماں تیرگواری کُتگ ءُ یک مردمے بیران کُتگ وھدیکہ یکے ٹپی کُتگ۔
بیران بیتگیں مردمے پجار دین محمد پنام دینو مندوانی بگٹی ءِ نام ءَ زانگ بیتگ وھدیکہ ٹپی بیتگیں مردمے پجار محمد حسین سرکری بگٹی ءِ نامءَ بیتگ۔ وھدیکہ وئیل ءِ پشدر ءِ سوب داں انگت زانگ نہ بیتگ اَنت۔
زانگ بہ بیتگ لھتیں روچانی تہءَ اے ڈیرہ بگٹی نشانگ کنگ ءُ کُشگ ءِ اے سئمی وئیل اِنت،چر اِشی ءَ لھتیں روچ پیسر سنہڑی زیریں ءِ ھندءَ بندہ سالی ورناہ ارشد ء دین محمد مرہٹہ بگٹی وھدیکہ گوستگیں روچ ءَ سوئی یک مردمے نشانگ کنگ ءُ کُشگ بیتگ اَت۔
دومی نیمگ ءَ چہ سبی ءَ سربیتگیں ھالانی ردءَ ناشناسیں مردماں جعفر ایکسپریس بمب تراکے ءَ نشانگ کُتگ۔
لیویز ءِ ردءَ تراک جعفر ایکسپریس ءِ گوزگ ءَ پد بیتگ، اُرش ءِ تہءَ ھچ پئیمیں تاوان ءِ ھال نیست۔
لیویز جارکش ءَ گُشتگ کہ جعفرایکسپریس چہ مچھ ءَ لاھور ءَ رؤگ بیتگ، کہ سبی ءِ نزیک ریل ءِ پھاٹک ءِ سرءَ تراک بیتگ۔
لیویز ءِ ردءَ اُرش ءَ مساپر رکیتگ اَنت وھدیکہ ریل ءِ پھاٹکاں تاوان رس اِتگ۔