زاھدان: ایرانی لشکر ءِ دست ءَ جنگ بیتگیں مردمانی کھول ماں مکی میست ءَ مولانا عبدالحمید ءَ دوچار کپتگ انت

روکپتی بلوچستان ءِ بنجاھی شھر زاھدان ءَ گوستگیں روچ ءَ دپبوج ءِ وھد ءَ ما مکی میست ءَ سی ستمبر ءَ بزانکہ “جمعہ خونین ” ءِ کھولاں ماں اود ءَ مکی میست ءِ پیش امام عبدالحمید بلوچ ءِ گون ءَ نیاد کتگ-

نیاد ءَ اسرمند بیتگیں کھولانی مات ءُ گوھار ءُ زھگ ءُ دگہ سیاد ءُ وارس ھوار بیتگ اَنت-

اود ءَ روکپتی بلوچستان ءِ نوک دربروکیں گشندھی ءِ ازمکاری ءَ ھدانور لجئی ءِ ماس ھم ھوار بیتگ کہ آئی ءَ جتا جتائیں بنگپانی سر ءَ وتی درد ءُ رنجانی گم ایرآورتگ اَنت-

آئی ءَ گوشتگ کہ ’جمعہ خونین ءِ مردمانی کھولاں ھچ انساپ نہ رس اتگ ما تنی وھدی ھم انساپ ءِ تلبگاریں بلے ھرچ نیمگ ءَ انساپ ءِ بندین دراں ابید دگہ ھچی گندگ ءَ نیت اِنت ‘-

اود ءَ گندگ بیت اِنت کہ آیاں مولانا عبدالحمید بلوچ اسماعیلزئی ءَ وتی توار ءِ جنزینگ ءَ جست گرگ ءَ اَنت ءُ ایانی دستان وتی کشگ بیتگیں مردمانی اکس ھم گندگ بنت –

زانگ بہ بیت روکپتی بلوچستان ءِ بنجاھی شھر زاھدان ءَ گوستگیں سال ءِ سِی ستمبر ءَ ایرانی پولیس ءِ تیرگواری ءَ سد ءِ کچ ءَ مردم کشگ ءُ سَے سد ءِ کچ ءَ مردم زدگ کنگ بیتگ اَنت-

سیستان و بلوچستان ءِ اے وئیل ءِ سر ءَ انسانی ھکانی گل ایران ایمنسٹی انٹرنیشنل ءَ ھم وتی زھر ءِ درشان کتگ اَنت ءُ گوشتگ اے ھنداں کُشگ بیتگیں مردمانی توک ءَ گیشتر کساب سالیں ورناہ اَنت –

ایمنسٹی ءَ وتی درشان ءَ گوشتگ ات مھلوک ءِ ھکانی جنزینگ ءِ ھاتر ءَ چست بیتگیں توارانی گون ءَ انساپ بہ ءُ نانکہ چوشین رویش بہ بنت ءُ مھلوک ءَ سر ءَ چوشین زُلم ءُ زوراکیانی پژدر انسانی ھکانی لگتمالی اِنت-