رنکو سنگھ ءَ پد ماں پد پنچ چکاّ جتگ ءُ گوستانک ءِ نبشتگ، گجرات ءِ دیم ءَ کولکاتہ ءَ یاتگاریں سوبمندی –
انڈین پریمیئر لیگ شانزدھمی سیزن ءِ سینزدھمی گوازی گجرات ٹائٹنز ءُ کولکاتہ نائٹ رائیڈرز ءِ میان ءَ احمد آباد ءَ کنگ بوتگ کہ کے کے آر ءَ ھپت وکٹاں گوازی کٹ اِتگ – گوازی ءِ ھیرو مڈل آرڈر لیبی رنکو سنگھ بوتگ کہ آئی ءَ گڈی اوور ءَ یش دیال ءِ اوور ءَ پنچ چکا جتگ ءُ گوازی کٹارین اِتگ – اے گوازی ءَ آئی ءَ سرجمی ءَ بیست ءُ یک بالاں گوازی کتگ اے میان ءَ آئی ءَ 228.57 اسٹرائیک ریٹ ءَ چِل ءُ ھشت رن جوڑ کتگ ءُ ناٹ آؤٹ بوتگ آئی ءَ وتی اننگز ءَ یک چوکائے ءُ شش چکّا جتگ ـ
وینکٹیش ایئر ھم کے کے آر ھاتر ءَ مڈل آرڈر لیبی بوتگ – ٹیم ءِ نیمگ ءَ سیمی نمبر ءَ اتکگ ءَ آئی چِل بالاں گوازی کتگ اے میان ءَ آئی ءَ 205.50 اسٹرائیک ریٹ ءَ ھشتاد ءُ سَے رن جوڑ کتگ ـ ائیر ءَ وتی اننگز ءَ سرجمی ءَ ھپت چوکا ءُ پنچ چکا جتگ اشی ءَ ابید چارمی نمبر کپٹن نتیش رانا اتکگ ءُ آئی ءَ بیست ءُ نُھ بالاں چِل ءُ پنچ رن جوڑ کتگ –
چدوپیسر جی ٹی ءَ ٹاس کٹ اِتگ ءُ اولسر ءَ بیٹنگ کتگ کہ آئی ءَ بیست اوورانی تہ ءَ چار وکٹانی تاوان ءَ دو سد ءُ چار رن جوڈ کنگ ءَ سوبمند بوتگ – وجے شنکر ءَ بیست ءُ چار بالاں شست ءُ سَے رن جوڑ کتگ ءُ ناٹ آؤٹ بوتگ – اشی ءَ ابید سائی سدرشن ھم نیم سنچری کتگ کہ سیمی نمبر ءَ اتکگ ءُ سِی ءُ ھشت بالاں پنجاہ ءُ سَے رن جوڑ کتگ –
بالنگ ءِ میان ءَ کے کے آر ءِ تجربہ کار اسپنر سنیل نارائن ءَ درساں گیش سَے وکٹ گپتگ ءُ آئی ءَ چار اوور گوازی کتگ – نارائن ءَ ابید سویش شرما ءَ یک وکٹے گپتگ –
جی ٹی نیمگ ءَ کے کے آر ءِ بگیری ءَ سوبمندتریں بالر کپٹن راشد خان بوتگ کہ آئی ءَ ہیٹرک کتگ ءُ سَے وکٹ گپتگ – خان ءَ ابید الجاری جوزف ءَ دو ءُ محمد سمیع ءُ جوش لٹل ءَ یک یک وکٹے گپتگ –
یکشمبے ءِ روچ ءَ بوتگیں آئی پی ایل شانزدھمی سیزن ءِ دومی گوازی سن رائزرز حیدرآباد ءُ پنجاپ کنگز ءِ میان ءَ بوتگ کہ سن رائزرز ءَ ھشت وکٹاں گوازی کٹ اِتگ –
ایڈن مارکرم ٹیم ءَ پنجاپ کنگز وتی گِس ءَ تہ ءَ بے سوب کتگ – حیدرآباد ءِ بالراں اے گوازی ءَ جوانیں لیب پیش داشتگ – اے سیزن ءِ تہ ءَ پنجاپ کنگز ءِ اولی بے سوبی ءُ وھدیکہ حیدرآباد ءِ اولی سوبمندی انت – پنجاپ کنگز ءِ کپٹن شیکھر دھون ءِ نود ءُ نُھ رنانی اننگز پہ مپت شُتگ انت – حیدرآباد ءِ سوبمندی ءَ اسپنر مینک مارکنڈے ءَ جوانیں کرد ءِ پیلو کتگ، کہ آئی ءَ سرجمی ءَ چار وکٹ گپتگ انت –
پنجاپ کنگز ءَ سن رائزرز ءِ دیم ءَ یکسد ءُ چل ءُ چار رنانی ٹارگٹ ایر کتگ کہ ایڈن ءِ ٹیم ءَ 17.1 اوور ءِ تہ ءَ دو وکٹانی تاوان ءَ یکسد ءُ چِل ءُ پنچ رن جوڈ کتگ ءُ گپتگ انت – راہل ترپاٹھی ءَ ھپتاد ءُ چار رند جوڑ کتگ ءُ ناٹ آؤٹ بوتگ – ترپاٹھی ءَ چِل ءُ ھشت بالاں دھ چوکا ءُ سَے چکا جتگ – کپٹن ایڈن ءَ بیست ءُ یک بالاں سِی ءُ ھپت رن جوڑ کتگ ءُ ناٹ آؤٹ بوتگ – مینگ اگروال ءَ بیست ءُ یک رن جوڑ کتگ ءُ آؤٹ بوتگ –
چدوپیسر کپٹن شیکھر ءَ نود ءُ نُھ رن جوڑ کتگ ءُ ناٹ آؤٹ بوتگ، ءُ اشی ءَ ابید پنجاپ کنگز ءَ نُھ وکٹاں یکسد ءُ چِل ءُ سَے رن جوڈ کتگ – دھون ءَ اولسر ءَ بگر تاں گڈی ءَ وتارا جوانی ءَ داشتگ –
دھون ءَ وتی اننگز ءَ شست ءُ شش بالانی دیمپانی کتگ ءُ دوازدہ چوکا ءُ پنچ چکا جتگ – اشی ءَ ابید بس سیم کیرن ءَ پانزدہ بالاں بیست ءُ دو رن جوڈ کتگ – دھون ءَ موہٹ راٹھی ءِ ھمراھی ءَ دھمی وکٹ ءَ سِی بالاں پنجاہ ءُ پنچ رن ھواری ءَ جوڑ کتگ اشی ءِ تہ ءَ راٹھی ءِ بھر ءَ دو بالاں یک رن ءِ کپتگ –
سن رائزر ءِ نیمگ ءَ مارکنڈے ءَ پانزدہ رن داتگ ءُ چار وکٹ گپتگ، اشی ءَ ابید مارکو ءُ عمران ملک ءَ دو دو وکٹ گپتگ انت –