اپریل ماہ ءَ گل ءِ بیست ءُ سیمی بنجاھی لس مجلس نیاد برجم دارگ بیت – بی ایس او آزاد

بلوچ نودربر گل آزاد (BSO_A) ءِ بنجاھی ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ ھمے ماہ ءَ بزاں اپریل ءَ گل ءِ بیست ءُ سیمی بنجاھی لس مجلس نیاد لمہ ء وتن کریمہ بلوچ ءُ پہ آجوئی ءَ نمیران ءُ بیگواھیں بلوچانی یات ءَ برجم دارگ بیت –

بی ایس او آزاد ءِ بنجاھی جارکش ءَ سرجمیں ھال داتگ ءُ گوشتگ کہ بی ایس او آزاد ءِ ششمی بنجاھی مجلس ءِ دیوان بنجاھی کماش ابرم بلوچ ءِ سروکی ءَ برجم دارگ بوتگ- دیوان ءَکارگشاد اھوال، نگدی نشست، راھبند (آئین سازی)، تنظیمی امور ءُ آوکیں گامگیج ءِ ایجنڈھانی سرءَ گپ ءُ تران کنگ بوتگ ءُ بنجاھی مجلس ءِ دیوان نمیرانیں بلوچانی یات ءَ دو ساھت ءِ بیتواری ءَ گوں کنگ بوتگ – دیوان ءِ درسیں ایجنڈھانی سر ءَ بنجاہی مجلس ءِ باسکانی میان ءَ گوں دلجمی ءُ جوانی ءَ گوں گپ ءُ تران کنگ بوتگ –

ھمے وھد ءَ گل ءِ سرکماش ابرم بلوچ ءَ دیوان ءَ تران کنان ءَ گشتگ کہ وھد ءُ جاورانی لوٹ مدام مٹ بوان بنت ءُ وھدے کہ یک راجے چہ جنگی جاوراں گوزگ ءَ بیت گڑا پہ آئی ءَ ھمک وھد ءُ پاس بے کساس ارزشت دار انت۔ مرچی ھما ڈُبّہ ءُ زمہ واری کہ بلوچ ورنا ءُ ھاسکر بی ایس او آزاد ءِ باسکانی کوپگان انت آ باز سنگینیں زمہ واری انت کہ اود ءَ یک نیمگے آ گوں زورآوریں دژمن ءِ زوراکی ءُ ناروائیانی دیمپان انت کہ دومی نیمگ ءَ راجی آجوئی جھد ءَ را گیش پھال کنگ ءُ دیم ءَ برگ ءِ زمہ واری آھانی کوپگان انت- ھرچ راجے ءِ گور ءَ ورنا آئی ءِ سرین ھڈ ءِ بستار دار انت ءُ پاکستان چہ گوستگیں بازیں سال ءُ مدتاں بلوچ راجءِ سرین ھڈ ءِ سر ءَ زورآور اِنت ءُ آئی ءَ نزور ءُ ھلاس کنگ ءِ جھد ءَ انت کہ آئی ءِ سوب ءَ مدام بی ایس او آزاد ءِ باسک آئی ءِ زوراکیانی زد ءَ بوتگ ءُ است انت، بلے باسما ءُ زانشتی بلوچ ورناھاں بی ایس او آزاد ءِ پلیٹ پارم مھکم داشتگ ءُ زورآورءَ را تچک ءَ اے کلوہ داتگ کہ بلوچ ورنا کدی اوں آئی ءِ سرجھلی ءُ گلامی ءِ زندمان ءَ نہ من انت-

سرکماش ابرم بلوچ ءَ دیمتر ءَ گشتگ کہ بلوچ ورنایاں چہ سیاست ءَ دور دارگ ءُ آھاں چہ بلوچ راج ءُ گلامی ءِ بستار ءَ نا آشنا کنگ ءِ ھاتر ءَ اے وھداں زورآور جتائیں پندل سازگ ءَ اِنت ءُ اے رد ءَ آئی ءَ بلوچستان ءِ ھند ءُ دمگاں ھندی کاس لیس گیش دیم ءَ آورتگ انت ءُ دومی نیمگ ءَ بلوچ ورنایانی میان ءَ راجی سما ءُ آگھی ءُ باھند ءِ گندگ ءِ گوما دژمن ءِ پوج ءُ آئی ءِ چیریں ادارھاں بلوچ ورنایانی زورانسری گار ءُ بیگواھی ءُ آھاں وتگڑیں میڑانی نام ءَ کشگ ءُ چگل دیگ ءَ گیشی آورتگ – چہ زورآور ءِ نیمگ ءَ سی ٹی ڈی ءِ ڈولیں ناشرکاریں لشکریانی دیم ءَ آرگ ءِ مول ھم بلوچ ورنایانی میان ءَ ترس ءُ بیمے ءِ پاد کنگ ءِ یک بے سوبیں کوشست یے ۔ بلوچ زالبولانی سیاسی ءُ پکری بنیاتاں سمائی ءُ آشوبی اَملانی بھر بوگ ءِ ترس ءَ نوں دژمن سرجمیں بلوچستان ءَ بلوچ زالبولاں اوں نشانگ جوڑ کنگءَ انت –

آئی ءَ گوشتگ کہ چوشکہ یک نیمگے زلم ءُ زوراکی گڑا دومی نیمگ ءَ جتائیں پندلانی وسیلہ ءَ لس مھلوک ءُ ھاسکر بلوچ ورنایاں راجی جنز ءِ بارو ءَ رد ھیالی پیداک کنگ ءِ ھاتر ءَ جھد کنگ بوگ ءَ انت کہ وھد ءِ لوٹانی رد ءَ چرایاں آشنا بوگ ءُ آھانی مکابلہ کنگی انت- اد ءَ کہ یک نیمگے دژمن وتی تاکت ءُ جتائیں پندلانی وسیلہ ءَ بلوچ راجی جھد ءِ بگیری ءَ لانکبند اِنت گڑا ھمد ءَ دومی نیمگ ءَ رد آشوبی تاکت ھمک روچ ءِ رد ءَ راجی جھد ءُ جنز ءَ گوں ھمگرنچیں گَل ءُ جھدکارانی بگیری ءَ پروپیگنڈاہانی بھر بوان انت-

ابرم بلوچ ءَ گوشتگ کہ بی ایس او آزاد ءِ آشوبی باسکانی زمہ واری انت کہ آ مھلوک ءُ ھاسکر ورنایانی میان ءَ زورآور ءِ سافٹ شوربندی ءُ رد آشوبی روشتاں دیم ءَ بیار انت ءُ آجوئی جھد ءِ مھکم کنگ ءِ ھاتر ءَ گوں تمردی ءَ وتی کرد ءَ پیلو بہ کن انت –

بنجاھی مجلس ءِ دیوان ءَ درائیں ایجنڈاھانی سر ءَ گوں دلجمی ءَ گپ ءُ تران ء پد بنجاہی لس مجلس ءِ مدت ءِ آسر بوگ ءِ گوما بنجاھی مجلس ءَ بی ایس او آزاد ءِ بیست ءُ سیمی بنجاھی لس مجلس بیاد ءِ لمہ وتن بانک کریمہ بلوچ ءُ پہ آجوئی ءَ نمیران ءُ بنام ءِ بیگواھیں بلوچانی نام ءَ ھمے اپریل ءِ ماہ ءَ برجم دارگ ءِ پیسلہ کنگ بوتگ – کماش ابرم بلوچ ءَ بنجاھی لس مجلس ءَ آوکیں گچینیں کونسلران ءَ ڈاہ داتگ ءُ گشتگ کہ آ گل ءِ چہ درستاں مستریں دیوان ءِ بھر زورگ ءَ پیداک انت پمیشکہ آ گل ءِ چست ءُ ایر ءُ پروگراماں مھکم ءُ پھال کنگ ءِ ھاتر ءَ بنجاہی لس مجلس ءَ گوں دلجمیں تیاری ءَ بیا انت –