بلوچستان ءِ تالیم: ھژدہ لک زھگ دربرجاھاںچہ ڈن، دوسد ءُ شانزدہ دربرجاہ بند

بلوچستان ءَ زانت ءُ زانگ ءِ نزام روچ پہ روچ گنتر بوان انت – رپورٹ ءِ رِد ءَ ھژدہ لک زھگ چہ دربرجاھاں ڈن انت وھدیکی دوسد ءُ شانزدہ دربرجاہ بند انت –

الف اعلان ءِ کچ ءُ کساس ءِ رِد ءَ بلوچستان چہ دومی سوبھاں ءَ تالیم ، جانسلامتی ءُ انسانی ھکاں چہ زبھر انت ءُ درساں چہ پشت کپتگیں دمگ یے –

الف اعلان ءِ رِد ءَ بلوچستان ءِ سرجمیں آبادی تہ ءَ بیست ءُ ھپت لک زھگ بائدیں دربرجاھاں بہ شُتیں، بلے سرجمیں آبادی ءِ تہ ءَ بس نُھ لک زھگ دربرجاھاں رؤگ ءَ انت وھدیکہ ھژدہ لک زھگ دربرجاھاں چہ ڈن انت – بلوچستان ءِ سرجمیں دربرجاھانی کچ دوازدہ ھزار سَے سد ءُ چِل ءُ ھپت انت کہ آھانی تہ شش درسد مزن دربرجاہ انت –

رپورٹ ءِ رِد ءَ بلوچستان ءِ تہ ءَ ھپتاد ءُ شش درسد زھگ سرکاری دربرجاھاں وانگ ءَ رو انت وھدیکہ نوزدہ درسد زھگ درسرکاری دربرجاھاں رو انت وھدیکہ پنچ درسد زھگ دینی دربرجاھاں رو انت – دوسد ءُ شانزدہ دربرجاہ اے وھدی بند بند ءُ ایندگہ دربرجاھاں سِی ءُ ھپت درسد دربرجاہ ءِ یک کوٹی یے وھدیکہ چاردہ درسد ماسٹر دربرجاھاں نہ رو انت ءُ وتی تنخواہ ءَ گرگ انت -.

دربرجاہ ءِ یل کنوکیں زھگانی کچ گیش بوان انت چوش کہ پرائمری ءَ ھشت لک ءُ شست ءُ پنچ ھزار ءُ سَے سد ءُ سِی ءُ ھپت گونڈواں دربرجاہ ءَ داخلہ زرتگ بلے آھاں تہ ءَ ھما زھگ کہ مڈل ءَ سربوتگ انت آھاں کچ بس یک لک ءُ نود ءُ یک ھزار ءُ سَے سد ءَ سربوتگ – الف اعلان رپورٹ ءِ رِد ءَ اگاں اے ھساب ءَ بہ بیت گڈا وانوکیں مردمانی کچ مردینانی سِی ءُ ھپت درسد ءُ جنین پانزدہ وھدیکہ کوچگی دمگاں سِی ءُ پنچ درسد ءَ ھم کم انت –

زانگ بہ بیت الف اعلان پاکستان ءِ تہ ءَ درسرکاری گل یے کہ پاکستان ءِ تہ ءَ تعلیم ءِ درگت ءَ.کار کنت بلے پدا ھم سال دوھزار ھژدہ الف اعلان ءَ وتی درسیں کار یل کتگ انت ءُ ھنی ھمے سال ءَ 2023 ءَ اے رپورٹ شنگ کتگ –