بلوچستان : زورانسری آوار جنگ بوتگیں کماشے ءَ ھوار پنچ مردم یل بوتگ انت

بلوچستان ءِ جتا جتائیں ھند ءُ دمگاں زورانسری آوار جنگ بوتگیں پنچ مردم یل بوتگ ءُ وتی گِساں سر بوتگ انت –

دی بلوچستان پتر ءَ سربوتگیں ھالانی رِد ءَ گوستگیں سال ءَ فروری ءَ زورانسری بیگواہ بیتگیں مردم آجوہ بیتگ ءُ وتی لوگ ءَ سر بیتگ۔

اھوالانی ردءَ گوستگیں سال ءَ 5 فروری ءَ چہ سبی ءَ پاکستانی پوج ءِ دست ءَ بیگواہ بیتگیں ھاشم ڈومکی یک سالے ءَ پد وتی لوگ ءَ سر بیتگ۔

اھوالکار ءِ رِد ءَ ھمے سال ءِ دھ مارچ ءَ بلوچستان ءِ تیاب دپی دمگ گوادر امبی کلانچ ءَ زورانسری آوار جنگ بوتگیں صابر ء ماسٹر عبدالغنی گوستگیں بیگاہ ءَ یل بوتگ ءُ وتی گِس ءَ سربیتگ –

بلے ھمے یکیں کھول ءِ دگہ پنچ مردم ھنگت گار انت –

چہ پنجگور خدابادان سراوان ءَ گوستگیں روچاں آوار جنگ بوتگیں ورنا مظاہر زاکر ھم یل بوتگ ءُ وتی گِس ءَ سربوتگ – زانگ بہ بیت اے ورنا پاکستانی پوج ءَ چہ جند ءِ گِس بیڑ ءِ میان ءَ آوار جتگ ءُ بیگواہ کتگ –

ھمے وڈ چہ تربت ءَ ھمے ھال انت کہ گوستگیں روچاں چہ گھنہ ءَ دزگیر کنگ بیتگیں صغیر احمد ءُ اختر علی یل کنگ بیتگ انت –

اھوالکار ءِ رِد ءَ اے مردم گوستگیں روچ بزاں چار اپریل ءَ سھب ءِ ادار چار ءَ پاکستانی پوج ءَ چہ جند ءِ گِس ءَ بیڑ برگ ءِ میان ءَ دزگیر کتگ انت ـ کھول ءِ مردماں آیانی یل بوگ ءِ ھبر راست کتگ –